Vanlalsanga Tochhawng
- Khawbung.
Chawhnu thlang her lamah Model veng Biak in a rawngbawlna nei turin, Zodin-ah taxi ka lo châng a. Taxi lo tlân hmasa ber chuan min la duh lo va, min kalsan mai a. Ngei ru ve tak chunga ka enliam zawh chiah chuan taxi pakhat ruak a lo tlân leh a. Ka chuan loh hlau ni awm takin amah zawk chuan minlo signal zauh a, ka hma zawnah tak rawn dingin ka lut mai a.
Kawngkâ ka hawng a, a hnung seat-a ṭhu tura ka lut chiah chu Driver ṭhutna hnuaiah hian envelop- pahnih leh wallet ni awm tak hi ka zuk hmu nghal a. Kan kùn hniam leh zual chuan envelop- pakhat zawk chu alo in hawng a, chutah chuan pawisa, Rs 500- hlira thun chu alo kâu tuar mai a. Kan la a, kan en chu ka phu zawk mai a. Wallet chu ka chhar leh a, chumi hnuah envelop pakhat kan en leh chuan pawisa bawk hi a lo ni a. Mak hi ka ti em em mai a.
Ka rilruah chuan neih daih duhna thinlung ka pu nghâl thuai a. Pawisa a ni tih ka hriat rual khan englai mai pawh a keimaha remchân lai zawng ve reng thlémtu chuan min rawn thlém nghal a. Rom 7:8 Nimahsela sualnain, thupek avang chuan remchan lai hmuin, awhna tinreng ka chungah a awmtir a. Dan lo chuan sualna chu thi a ni.
Nei daih ila tuman min hmu dawn lo tih pawh ka hrevek bawk a ni. Mahse, kha hmun taxi chhungah khan ka nunah setana leh a duhna te chu hneha awmin, thinlungin Pathian thu ka lo sawi tawh ram te chuan min rawn luah ve leh nghal thuai avangin, driver hnenah chuan ka va sawi nghal thuai a.
Taxi a tih din hnu chuan kan han enchiang a, envelop- pakhat zawkah hian phone nambar a awm a, kan han call nghal a; chu kan biak lah chu Nagaland- lam daih mi niin, ṭawng kan inhriat theih tak lohah chuan wrong nambar tiin a dah ta hmak mai a. Kan call leh pawn ala a, wrong nambar tiin a dah nghal zel avangin tih ngaihna avang ta phat mai.
Wallet kan han enkual a, adhaar card leh Voter ID-a a lan dan chuan Churachanpur(Manipur)- lam mi hi an lo ni daih bawk si a. A bul bawr dawr hnaiah vai ṭawng thiam an awm dah law maw tiin kan va zualko pui leh a, anni pawn nambar an han call chuan wrong nambar a lo tih zel avangin kan beidawng hman hle a ni.
Envelop kan han enchian leh chuan a hnung lamah phone nambar dang hi alo awm leh a. Kan han call leh chuan aneitu dik tak hian a lo la a. Amah lah chu a ṭawng pai em em mai a. Rilru mangang tak leh baih vai taka a awm mek lai chu a lo nih hmel bawk. Chùng pawisa tam zawk chu mi hrang hrangin an thawn kual, Mizorama lo zin, envelop-a a khungkhawm zel hi a lo ni a. Amah chuan New Capital pan thlak dawn chiahah a awm thu a sawi chuan kan rawn pe ang che kan tih avangin, a office dawrna hmunah kan zuk kal chuan lawm em em leh hlim hmel tak hian minlo dawng sawng a.
A rilru mangan lai leh baihvai lai tak mai a, a hlim hmel han hmuh chuan, chéng khat pawh dil ngâi miah lovin mitvâr man ni pah fawmin leh, lawmthu sawinan tiin Rs. 500- chu min pek a tum ta mai a. Driver hnenah lawmthu an sawi a. Driver chuan, keimah ni lovin ka passenger- te hnenah hian sawiru a ti leh zel a. Ka zak ru chem chem zawk. An lawm hlim hmel kha hmuhnuam ka ti bawk si. A neitu dik takin an hmu let leh kha a neitu aimah khan ka lawmna hi a tlém chuang bik hian ka ring hauh lo hial a ni.
Driver chuan, kha nu nena an inphurhna kha darkar hnih lai a kal tawh ang a ti a. Darkar hnih hnu féah chuan passenger tam tak a phurh tawh thu leh, engmah an lo hmu bik lo tih thu a sawi chuan mak hi ka ti em em mai a. Enga ti nge keimah kherin ka zuk hmuh tihte thlengin ka ngaihtuah kual a. Taxi ka lo phar hmasa zawk a ding duh lo te kha ka ngaihtuahnaah hian a lo lut kual zel a. Mihlim te ti ti takin, ngaihbel tur leh hmehbel tur ting khan thil awm a lo awm ve zel bawk nen.
Kha nu thil theih nghilh kha passenger dang ten an lo hmulo kha, a thlauh tunu kha Pathianin a hum sak vang nge, ka rinawm leh awm loh min fiahna turin Pathianin a lo dah zawk ni ang le tih te thlengin ka ngaihtuah reng mai a. A eng a pawh chu ni se, keima mimal nunah chuan khatianga pawisa tam kha vanneih thilthuah ka la nei ngai lo va. Chhar tur pawh ka la tawng ngai lo. Mi tena pheichham an manna ni duh mai tur leh, khatiang zat aia tam leh tlém daih pawh ruk tur an zawn reng laite a. Chhungril lama thlémna lo lang nghal, a hun leh hmun taka ka hnehna khan mi dang mai a ni lo. Keimah ngei hi nun hlimna min pek nasat zia ka ngaihtuah hian hei hi share loh theih lohniin ka ngai ta a ni.
"Thlémna hi khawi aṭang nge, engtin nge, engtikah nge a lo kal dawn tih kan hre lo. Thlémin kan awm reng lo va. Kan duh zawng tak leh châk zawng tak hmanga min thlém turin thlémtu chuan keimahni hun tawn ṭheuh zelah hian remchan lai a zawng reng a. Chutih hunah chuan rau tak leh phùr taka do let leh hneh tum angai hran lo. Kan chhia leh ṭha hriatna thiang tak hmangte hian, awlsam takin a hneh mai theih a. Tah chuan nun hlimna leh chawlhna kim hi a lo awm zel ṭhin zawk hi a lo ni."
1 Peter 5:8 Ngaihven ula, fimkhur rawh u; in khingpui Diabola chu sakeibaknei rùm ṭhin angin a ei theih tur zawngin a phi ruai ṭhin; Setana hi a ei theih tur zawngin a vak vel ruai a ni tih hre reng ila. A ei theih tur a zawn chhan chu, a ei vek theih loh vang a ni a. Chu a ei theih tur chu a ei theihna turin, mahni hun ṭheuh zelah hian remchan lai a zawng ṭhin a ni.
Post a Comment