AIZAWL EAST II CANDIDATE JOINT PLATFORM - TIMES OF MIZORAM

Breaking

Home Top Ad

Post Top Ad

AIZAWL EAST II CANDIDATE JOINT PLATFORM

AIZAWL EAST II CANDIDATE JOINT PLATFORM KHA 


Nizan (09112018)-a Dawrpui Multipurpose Hall-a Aizawl East II Candidate-te Joint Platform kha TV aṭangin ka lo thlir ve a. Hetiang hi ka hmuh dan a ni :

Mizoram Politics1. BJP Candidate : BJP Candidate Pi Sawmi kha chuan sawi viau mah se, Zoramin BJP kan hmuh dan a hriat ve tho avangin a kha a chih deuh niin a lang, han sawi viau tur a hre lem lo.

2. MNF Candidate : MNF Candidate Pu RRR-A hi Zoram puma mi hausa lâr a nih avangin a chanchin leh amah hian ngaihven a hlawh ve hrim hrim a. Zu zawrh chungchangah te, Corruption chungchangah te, ṭhalaite khawvel thar din chungchangah te sorkar a sawisel nasa viau va. Ama experience aṭangin hnathawh a chak tawh thu a sawi. Sports chungchang a tuipui fâl hle a, a lo tlinga MNF-in sorkarna an siam a nih chuan Sport Minister nih pawh a beisei ru viau mai thei. Mi rin leh beisei aiin a che nawi a, sawi mai tur hre lova haihchham chang a ngah. A sawi tam ber chu rorel lai Party beihna lam a ni. Thlan tlin a niha sorkarna an chan huna bial chhung tana a hmathlir a sawi a, Check dam siam te, Dawrpui venga volley ball court siam te chu a sawi nasat an ni.

3. ZPM Candidate : ZPM Candidate Pu B. Lalchhanzova hi mi hawi zau leh viak ṭha, tawn hriat ngah leh inzir peih tak a nih avangin sawi tur a hriain hmathlir thui tak a nei. Mi harsa, Dawrpui venga mi in hnuai luah mai a nihna chuan a tizam lo va, ram siam ṭha turin sum leh pai ngah kher a ngai lo nia sawiin chu chuan nasa takin a tiphur niin a sawi. Lo thlang tling ta se, a vision a sawi chuan mipui kut a tibêng ring hle.

Sawhthing Kg khatah ₹50/- leh hmunphiah Kg khatah ₹100/- a an lak theih dawnzia a sawi a. Thil harsa a nih loh tur thu a sawi chuan mipui lawm a hlawh hle.

4. INC Candidate : INC Candidate Pu Lalsawta chuan Congress an sorkar leh chuan NEDP aṭang theih tawpa Mizoram siam an tum thu a sawi a. Congress sorkar, mahni lal ṭhutthleng hial pawh nam thlua mi dang kian thei Party hi Pathian zarah a sorkar leh dawn niin a sawi. A tlin huna a hmathlir nia Pu RRR-A sawi Check dam siam chu tunah Congress sorkar-in hna a thawk mek tawh a, chhunzawm zel a nih tur thu a sawi a. Dawrpui veng chhunga volleyball court siamna tur pawh Finance Minister a nih angin a hmun an lei vek tawh a, sorkar tharah chhunzawm a nih tur thu a sawi.

Pu RRR-A'n congress party hruaitute chungchanga corruption a rawn sawi chungchang chhangin, "Corruption kha an rawn sawi a, a sawi tur awm hi chu kan awm maw le. Pu B. Lalchhanzova te hian sawi ta se an inhmeh ang a, kei pawhin sawi ta ila ka inhmeh ang. Kum 1995-a second class contractor, khatih laia a contractor-puiten tuna bill tâng buaipuia an phet an phet laia a hausak dan pawh hriat theih loh te hi chuan sawi lo se a ṭha. Kan MPF hruaitute hian hun pek belh se la, insawi fiahna hun tlem pek belh teh se," a ti chuan mipui kut a tibeng ringin thawm a ṭha hle. Zu zawrh chungchang zawhna chhangin, "Zu zawrh phalna Sorkarin an pek chungchangah Pu Lalsawta, Finance Minister leh Aizawl East II INC candidate chuan Kohhran kan rawn lovang titu Excise changtu Minister khan khati khan a sawi ta phut mai a, kha khan kan Chief Minister atanga kan hotu dangte ka kha a ti chhih ta vek mai a. Kan party ah a awm lohna kha hmanni lawk anih avangin Manifesto ah pawh hian chumi chungchang chu kan ziak lang ta lo a ni.

Ṭhahnem ngai taka he Congress sorkar tana tawngtai thin Kohhran hote duh dan hi kan ngai pawimawh dawn a, Kohhran hote hi kan rawn dawn a ni," a ti.

Nizana an chet dan aṭang chuan mi lâr Pu RRR-A khan mi beisei a pha lo hle a, Corruption chungchanga Pu Sawta'n a chhan hnua zawhna an zawhah pawh a ṭawng bah deuh nawk nawk niin an hre hlawm a, mipui beisei a pha lo hle niin an sawi.

Pu B. Lalchhanzova a che ṭha viau va, tun ṭuma MLA-a thlan tlin a nih loh pawhin next election-ah chuan chance ṭha tak a neiin niin an ngai hlawm.

Pu Lalsawta a mi tak hle a. A thusawiah nuih dur durna tur thil a sawi dawn loh thu leh thil tak tak a sawi dawn thu thuhmaa a sawi ang chiahin a rawn thutak hle a. A tawpa an sawi hmaih leh sawi dik chiah loh tlip nana 3 minutes hun an pek leh vek pawhin Pu Lalsawta hian, "Ka sawi tawhho kha sawi sual emaw, sawi hmaih emaw, sawi fuh loh emaw ka nei lo va, sawi chhunzawm ka tum lo. Kan sorkar leh dawn a, Minister bial in nih ngei theih nan in vote hlu tak ka rawn dil che u a ni," tiin tawpna a siam a ni.

No comments:

Post a Comment

Post Bottom Ad