ALL INDIA RADIO NEWS AIZAWL REGIONAL NEWS UNIT


NEWS COMMENTARY: 03.11.2018 (Zing dar 7)
Ziaktu : HC.Vanlalruata, Principal Correspondent, PTI

Mizoram election 2018Mizoram Assembly seat 40 inthlanna kan hnaih telh telh a, a chak tur inrinsiak bakah thu lêng vak mak fe fe a tam leh ta hle a. Rau leh zawl lam aţanga hmu ni lem lova mahni ţan lamte chan tivawng tura hrilhlawk huai tak tak phei chu kan intodelh leh tawh hle. Inthlan dawna an tihtur an sawi leh an thutiam, an dinna bial tan leh Mizoram pum tana an thutiam tihhlawhtlin tum tak taka bei erawh chu khawvar lam arsi ang pharh an ni thung a. Tih theih loh tiam mai mai leh tihpuitlin theih reng pawh a taka tihhlawhtlin an tum hauh loh intiam ching hi chu kan la ngah a. Nula laka tlangval lepchiah intiam dum ang chi hi chu kan ngah kumhlun dawn a ni awm e.

Kan kohhrante pawh hian inthlan dawn chuan thuchhuah hi an siam ziah a, a kohhran bil a an siam bakah kohhran hruaitute inzawmkhawm pawlte’n an siam bawk ţhin a, tunah pawh an siam leh tawh hlawm. Tlawmngai pawlte pawhin inthlan thuchah hi an siam bawk. Mahse, ngaih pawimawh a hlawh viau lo tih chu vawi tam tak kan inthlan hnu hian a chiang a, thuchah siamtute erawh chuan sim an tum chuang hlei lova. Dik tak chuan kohhranin inthlan thuchah a tihchhuah thinte hi an kohhran biakina chhiar chhuaktu kohhran secretary te ngei pawh hian zawm tinah an tin lemin a lang lova. An thuchah chhiara candidate atana tlak a tih ni lo mahse an awmna party candidate an vote tho tho ţhin.

Sawi tawh ang khan inthlan thuchah kan uksak lo ang bawk hian inthlan dawna thutiam (manifesto) sei tak tak duanga chhuah ţhinte pawh hian an intiamna hi an la thutak lem lo hle a. Țhenkhat phei chuan manifesto te chu an inphuah ţhat siak mai mai ţhin niin an sawi a nih kha. Hetianga inthlan thutiam, anmahni thutiam ngei an bawhzui tak loh chhan leh tihpuitlin chu sawi loh tihpuitlin tumna pawh an neih loh chhan chu an inziah ţhat siak mai mai ţhin vang hi a ni ber awm e. A taka tihpuitlin an tum leh tihpuitlin theih manifesto hi kan mamawh chu a ni.

Inthlan thutiamah hian district siam chungchang bik hi han luhchilh lawk ta ila. MNF sorkar laia Cabinet ţhukhawmin Saitual, Khawzawl leh Hnahthial te district hrang din a nih tur thu an han puang a, an puan hun kha kum 2008 inthlan hma lawk a ni a. District an puan dan kha ngaihtuah chian pawhin inawp remchan dan tur (administrative convenience) lam emaw ngaihtuahna leh district lian lutuk leh enkawl harsa ţhen hran a ngaih vang emaw lam a ni lo tih a chiang a. Inthlana chak leh theihna hmanrua atana an puan satliah a ang ber. Mahse, chiang takin an tla ta tho a nih kha.

Inawpna awlsam leh remchang ngaihtuahna vang ni hauh lova district hrang din hi ram hmangaihna thinlung aţanga lo chhuak leh ram tana ţha tura puitling taka ngaihtuahna atana lo chhuak a ni lo hrim hrim a. Tangkawng manna khawl pek intiam nen a danglam thui vak lo. India ram state dang ngaihtuaha an district pakhat mihring awmzat leh ram zau zawng zahve pawh tiat lo Mizoramin district 8 zet kan nei hi a tam tih tawh nak a laia pathum dang siam belh hi chu a senso sang lutuk tur nena chhut phei chuan ram hmangaihna thinlung aţanga lo chhuak thutlukna a ni thei lo hrim hrim.

Chutih rual chuan tuna he’ng district thar tur atana MNF sorkarin an lo puan tihlawhtling duh ta lo Congress sorkar hi fak ngawt theih an ni lo mai ni lovin dem loh theih an ni bik lo. Kum 1998 inthlan hma lawk khan district 5 an din belh ve tho a nih kha. Tunah pawh hian thutlukna fel tak siam a, tihpuitlin tlak leh tihpuitlin atana ţha lo nia an ngaih avanga tipuitling ta lo an niin a lang lova. MNF kutthlakna a nih avanga tipuitling duh ta lo an ang ber. Chumi piah lamah chuan a tirah khan dik an tih loh thu leh an sorkar pawhin tihpuitlin an tum loh thu an puang miah lo. Puan loh chu sawi loh district changtlung zawk an pek tur thu an
sawi reng zawk a – vote duh vang thovin dinna fumfe engmah an nei lo a nih kha.

Dik tak chuan political party zingah PRISM chiahin district siam belh hi ţul lova sum sen belhna mai mai a nih avanga tihpuitlin an tum loh thu mipui hriatah an sawi chhuak a, party dang zawng chuan tihpuitlin an tum thu hi vote zawnna’n an hmang chhunzawm reng a ni.

Inthlannaa chak theihna tur nia an hriat hi chu an bawh chak viau vek a. Kum 2008 inthlan dawnah pawh Prime Minister Dr Manmohan Singh kha helai Congress hruaitute khan NLUP chu Prime Minister’s Special Package aţanga sum sik chhuaka kalpui tur niin an puantir a. Mahse, eng special package mah a lokal ta lo. Cabinet Committee on Economic Affairs in Mizoram Plan sum pangngai sawk
heka NLUP atana sum serh hran a rawn phal kha package anga sawiin thudik lo hmangin tun thlengin mipui bum an la tum a ni. Plan sum pawn ami eng package mah sorkar laipuiin a rawn pe lova, plan pawna sum pek belh a awm hek lo. Congress hian kum 2008 inthlan dawn khan eiruk dona kawnga thuneihna sang nei, chief minister thleng pawha chhui thei State Vigilance Commission din an tiam a, a taka din tum lo tih hriat takin inkhualtelem deuhvin an kalpui a, a zuzi ta reng a. 2013 inthlan dawnah Lokayukta din an tiam leh a, tun thlengin an la din lova, inthlan hma thla 2 vel la awmah hian an din hman a rinawm ta chiah lo. MNF pawh hian an sorkar hmasak a MIP an kalpui hlawhchhamzia kha an la theihnghilh
a rinawm hauh lova. NLUP entawn deuh reuhva pawisa tam zawk sem tiama SEDP an rawn zuar leh pawh hi mipui vote hui theihna tawktarh mai tho a ni.

He ram leh mipuite hian kan vote hmanga thuneihna chang a inhaivur tum, chumi atana dâwt leh thu lehlang min tiamtu hi kan intodelh khawp a. Mipui erawh chu ei leh barah kan la intodelh lo nasa hle thung. Țhenkhatin kohhran duhdan ni a hria a, kohhran vote hui theihna tur a nih ringin zu khap bur an tum thu an sawi leh chiam chiam tawh a. Kan ram sum lakluh mai ni lovin kan khawtlang nun leh ţhalaite nun a nghawng chhiat leh nasatzia tur an ngaihtuah duh leh tawh lo. Hetiang mai mai a luangthli chheng nghin ang maia vote hmuhna tur nia hriat lama thle mai mai lo, ngaihdan leh pawmdan nghet nei, thutiama ding nghet tak mai ram hruaitu hi kan va mamawh tak em!

Tihpuitlin theih hauh loh tur tih hre reng chunga thil tiam hi mipui bumna tenawm tak a ni a, tihpuitlin tum hauh loh vote hmuh duh vang ngawta tiam nen a tenawm dan a inchen reng. Tih theih tur leh tihpuitlin tum chauh tiam sela, thutiam tawh chu tipuitling ngei bawk teh se. Ti puitling lo chu hnawl zel bawk ila. 

Post a comment

Powered by Blogger.