Mizoram People Forum (MPF) chuan political party-te nena thawhhona thuthlung an siam tawhte theihtawpa tihlawhtling tura tan an lak laiin party emaw candidate ten an bawhchhe leh thin a ti a.

MPF Gen. Hqrs. chairman Rev B. Sangthanga chuan inthlanna zalen, thianghlim leh felfai neih a nih theih nana political party hrang hrangte nen thawhhona tha an neih avangin lawmawm an tih thu a sawi a. Hei hian ram politics leh inthlanah a tha zawngin nghawng a nei chho zel nia an hriat thu te, kumin MLA inthlan turah pawh party-te nen uluk takin, Election Commission dan en chung leh party tin te pawm tlan theih tur thuthlung party president leh chairman theuh ten hming an ziahhnan thu te a sawi a. Chutihlaia an thawhhona thuthlung bawhchhiat a awm ngei nia a lan thu a sawi a ni.

House to house campaign chu MPF lam chuan neih miah loh chu an duhdan a nih laiin, party-te nawrna avangin candidate te chauhin MPF Local Forum-te nen an nei thei ang, tih thawhhona thuthlungah ziah a ni tih MPF hruaitute hian an sawi a. Mi rilru hruai sual thei thil sem chi reng reng tih loh nise, tih pawh a awm tih sawiin, hmun thenkhatah mimal, pawl leh kohhran anga candidate-te intiamtir, an tlin chuan thil tihsak tur ang chi tih loh nise, tih a nih thu an sawi bawk.

Zawhna chhangin, candidate-te intiam tir ang hi hmun thenkhat a awm tih report an dawng tawh tih MPF general secretary Rev.Dr Lalbiakmawia chuan a sawi a. Manifesto leh policy pawnlama thil sem leh sem intiam ang chi pawh tih loh tura tih zingah a tel tih sawiin, "Manifesto/policy chhung lam ami erawh chu tihngaihna a awm lutuk lo a. Tih loh nise chu MPF duh dan ber chu a ni," a ti.

Sawrkar danin inthlan kaihhnawih thila kumtlinglo te hman a phal loh avangin kawng zawh emaw lehkha sem emaw thil dangah pawh hman loh tur a nih laiin hetianga tih thawm hi hmun thenkhatah a awm nia an hriat thu an sawi a ni.

Ruai theh chungchangah, party bil bik chauhin an tihkhawm ang chu hriatthiam loh theih loh chin a awm laiin, Mizoin vantlang ruai a tih ang chi a awm tih MPF hruaitute hian an sawi a. An ran talh zat leh thildangah pawh hetiang hi chu a hriat mai tih sawiin, election danah pawhin inthlan kaihhnawiha mipui kohkhawm nana ruai theh chu a phal loh thil a ni tih an sawi.

Banner, flag leh poster te chu thawhhona thuthlungah, election dan enkawp chungin tar zat tur te siam a nih laiin, hei pawh hi bawhhchiatna a awm zeuh zeuh niin an sawi.
MPF leh party-te thawhhona thuthlung chu party lam leh mipuiah pawh hriat ala hlawh tawk lo nia an hmuh thu MPF hian an sawi a. Uar zawka inhrilhhriat chhoh mek zel a ni, an ti.

Post a comment

Powered by Blogger.