Election Commission of India hi a inluling lutuk ta deuh em ni?
~ By Lalthara, IAS (Rtd)
Tun hnai maia Mizorama Bru chungchanga kan buai tak mup mup mai chhante kan chhut chian deuh hian, Election Commission of India hi a inluling ta lutuk deuh niin ka hmu a. Mipui mimir chu sawi loh, sawrkar hotu (politicians leh officers) te leh press /media lam mite pawh hian ECI nihna tak leh a power te pawh hi kan hre vak lo ni pawhin a hriat theih. ‘Mizo Aw’ chanchinbu editorial dated 9th November 2018 a thu ziak atang te pawh khan Election Commission hi kan hmu lian lutuk em ni chu aw a tih theih ta.
ECI thuneihna Article 324 of the Constitution of India in a sawi dan chuan ‘the superintendence, direction and control of the preparation of electoral rolls and the conduct of elections ….. shall be vested in the Election Commission of India’ tih a ni a. Tin, hemi hna thawhna tura sawrkar hna thawkte (manpower) te chu Election Commission in a mamawh leh a dil ang chu state leh central sawrkar ten an pe thin ang tih a ni mai a. Tichuan, heng electoral roll siam hna leh election conduct hna te hi state sawrkar hnathawk ten an thawk a ni ber a, ECI hi chu programme leh tihdan tur rawn ruahmantu, thu pe tu leh kaihuaitu a ni zawk a. Tin, CEO pawh hi state sawrkar officer, state sawrkarin an election department enkawltu atana an ruat (appoint) kha a ni bawk. ECI mi leh sa (a employee) a ni lo. ECI in appointment a pek tur emaw, a lo thlan chhuah tur te pawh an ni lo. Hei hi State sawrkar thuneihna a ni a; Indian Constitution hnuaia autonomous body pakhat (ECI) hian heng thilah hian a rawn inrawlh tur pawh niin a lang lo. State Home Secretary te phei chu state khat a hna laimu chelhtu an nih avangin ECI in a rawn transfer theih tur an ni lova, hemi hna chelhtu tur hi a duh duh a rawn thlan tur pawh an nih hek lovang. Heng hi tun hnaia Mizorama thil thleng tawh, mahse Indian constitution nena inmil hauh si lo a nih avangin han sawi lan ve hi a tha in ka hria a. ECI hian election khawihtu tura state sawrkarin a ruat zingah hian duh loh riau leh rin loh riau an nei a nih chuan, a chhan fel taka ziakin, state sawrkar chu thlak turin an rawn dil (request) tur ni zawk awm tak a ni. State sawrkar pawh in hei hi chu a tihsak ngei tur pawh a ni ang. Mahse state sawrkar hi ECI ang bawka constitution hnuai a din, constitutional authority a nih avangin ECI hian state sawrkar hnathawkte chungah hian direct taka thuneihna a rawn chelek hi Indian constitution thil tum dan nen pawh a inmil theih lo.
Chief Electoral Officer hna hi Nagaland sawrkar-ah kum 10 aia tam ka lo thawk ve tawh a, electoral roll revision leh election conduct hna pawh ka khawih tam ve tawh khawp mai. Kum 1990 a T N Seshana’n Chief Election Commissioner hna a rawn chelh khan, Constitution in a sawi bak tam tak thuneihna a rawn inpe chawp a, khatih laia central sawrkar leh state sawrkar te khan an ep ngam vak si loh avangin, a chunga kan sawi tak ECI thuneihna ni chiah lo khi a inpe ta teuh mai a, a hnua ECI te pawh in hei hi an rawn chhawm chho ve ta zel mai ni berin a lang. Tin, Seshana heti taka a rawn inlulin tak avang khan central sawrkar pawhin amah check nan ti niawm takin Election Commissioner pahnih ngawt an rawn dah belh ta a nih kha. Hemi hma zawng kha chuan India hian Election Commissioner pakhat chauh (CEC) a nei thin nghe nge a.
Dan leh hrai (law & order) ken kawhna hna hi chu state sawrkar thuneihna liau liau a ni a. Kum 10 chuang teh meuh CEO hna ka thawh chhung khan election hun laia law and order siam dan tur chungchangah hian CEO ka nihna ang chuan ka inrawlh ngai miah lo, police department ruahmanna hi ka lo enpuiin ka lo ‘amen’ pui ve mai thin zawk a ni. Ngaih dan kan neih chuan kan sawi ve a, mahse thutawp hi chu state sawrkara hemi lama thuneitute kutah dah a ni thin. Hei hi state dang zawng zawngah pawh an tih dan tho a ni thin. Election chhung hian law & order kenkawhna a fail emaw, a that tawk loh chuan mawhphurtu tur chu ECI emaw, CEO emaw ni lovin, state sawrkar a ni a. State sawrkarah pawh police department (Home Deptt) hi a mawhphurtu ber tur an ni. Hei vang tak pawh hian, mawhphurtu ni lovin, armed police deployment chungchanga thutawp lo neih ve tum ngawt hi thil tih chi ni pawhin a lang lo. Tin, Assembly Election a senso zawng zawng hi (armed police deployment huamin) state sawrkar tum tur a ni bawk.
Tin, Bru ho electoral roll a thun chungchangah pawh hian thil hriat thiam harsa tak tak a tam ta mai. Representation of the People Act, 1951 leh Registration of Electors Rules, 1961 in a phal bak thlengin Bru ho hi duhsakna uchuak tak hmanga Mizoram electoral rolls a dahzui zel an niin, an vote thlak dan tur pawh special arrangement siam sak an ni zel a. Indian citizen te chu an awmna hmun (ordinary resident an nihna hmun)ah in ziaklut (enroll) maia tur an ni a. Ordinary resident ni tur hian khami polling station huam chhunga thla ruk vel lo awm tawh chuan a tawk thei a. Mizote pawh hi Chennai-ah te, Mumbai ah te, Delhi-ah te voterah kan inziak lut thei vek a, mi tam tak chuan an ti mek bawk a. Chuti a nih chuan eng vangin nge Bru te hi kum 20 chuang an lo awm tawhna hmun, Tripura state ah hian voter a an inziah luh ve mai loh? A chhanna ni awma ka hmuh chu “Political agenda – Bru Autonomous District Council din tumna – an neih avang hian hemi kar chhuah nan hian Mizoram voters ah a tam thei ang ber inthun belh zel an duh a, hemi an demand an hmuh hma chu Mizoram leilunga rawn chuan luh erawh chu an duh si lova, a lo lut duh te pawh an dang zel zawk a nih hi. Mizorama an lo luh vek chuan a kar fung tur an neih that loh an hlau a nih hmel ber ta mai. ECI lah hian Mizorama awm lo (ordinary resident ni lo) te hi an hming paih a hnekin, Mizorama piang pawh ni lo, Mizorama vawi khat mah an ke pawh rawn la nghat ngailo te pawh, Bru an nih mai avangin an thun belh mek zel niin a lang. Hmanni a YMA President in a sawi dan chuan heng Bru mi leh sa, Mizorama kum 20 chhung zet awm tawh lote hming paih (delete) chungchang hi ECI nen an sawi ho ngei a, ECI chuan hun a tlai tawh lutuk avangin, election zawha electoral roll revision neih hmasak berah ngaihtuah a nih tur thu an hrilh a. Mahse chumi hnu daih chuan electoral roll a thun thar tur dapin Tripura a Bru awmna hmunah official te an tir leh lawi bawk si niin a lang a. Hei hi tun hnaia Kolosib DC office mipuiin an hual chhan pawh kha a nih hmel a. Electoral roll a hming thun belh leh hming paih hi kal dun tur an ni a, lak hran theih niin a lang lo. He thil pawh hi hriat thiam a harsa ta.
Tin, tun hnaia thil lo lang leh pakhat chu Bru ho Tripura a tlanchhia te hi ‘special/notified class of voters’ anga chhiar niin, Mizoramah kum tam tak awm tawh lo mah se, Mizoram electoral roll-a thun reng theih tur leh, an vote dan tur pawh special arrangements siam sak theih turin ECI hian kum 2004 khan thuchhuah (order) an siam tawh ni awm taka sawina a awm bawk a. He order ah hian ‘Kashmiri pundit’ te Kashmir hel (militant) hote laka state danga tlanchhiate dinhmun ang kha Bru ho hi an pe ve ta mai niin a lang bawk. Mahse, J&K hi chuan Constitution hrang a nei a, election law te pawh a hrangin a nei vek a. J&K- a an tihdan hi Mizorama hman ve mai chi a nih loh hmel. Hengte hi ECI atanga zawh chian deuh a tha ang a; a lo dik ngei a nih phei chuan court-a khin mai pawh a tul mai thei.
India ram hi chi tam tak leh sakhaw tam tak awmna a nih avang hian, chi leh chi buaina (communal tension/flare up) hi a awm chamchi mai a. Shiv Sena ho thiltih avanga North Indians sing tam tak rual an tlan chhiat dan te, Punjab rama buaina avanga Bihar leh UP mite an tlanchhiat nasat dan te, hmanni lawka Gujarat state atanga Bihar mi sing li leh sing nga inkar rual vel zet an than chhuah dum dum thute pawh kha kan hre fur awm e. Hetianga tlanchhiate hi central sawrkar in emaw, ECI in emaw an umzui vak vak kan hre ngai miah lo bawk. Indian citizen te chu khawi state ah pawh an insawn thei a, an khawsakna hmun apiangah electoral roll ah an inthun thar thei a, chutah chuan vote an thlak mai tur a ni zawk. Heng tlanchhiate pawh hi, a ralmuan deuh hnuah a duh chu an rawn kir leh a, kir leh duh lo pawh an tam ang; an thu thu a ni mai.
ECI in emaw central sawrkarin emaw an umzuiin, kir leh turin an thlem chiam chiam ngai lo. Eng vangin nge heng Bru zinga kawhmawh bawltute hi duat taka, kum 20 chuang teh meuh kan umzui a, kan thlem kan thlem bik ang le? Hei hi a ni thil hriatthiam har ka tih chu. Mizo mipui leh sawrkar pawh hian tun hnaia ECI intiamkamna leh inremna thuthlung kan lo ziah tawhte zul zui hian tan kan khawh ve tlat a hun ta a ni lawm ni? State danga thil thleng ngai lo leh, thleng thei tura kan ngaih loh ang chi hi Mizoramah hian a thleng leh mai thin hi chu a mak a ni. Zofate hi i har thar the ang u. “Harh la, harh la, Zoram i tlai ang e”.
Post a Comment