Mizo Zirlai Pawl Chuan Party Hrang Hrang An Kawm Kual - TIMES OF MIZORAM

Breaking

Home Top Ad

Post Top Ad

Mizo Zirlai Pawl Chuan Party Hrang Hrang An Kawm Kual

Mizo Zirlai Pawl MZP chuan Political Party hrang hrang te hmathlir leh tih tur intuk te zawtin an kawm kual a, Mizoram leh Assam ramri chungchanga hmalak dan tur an zawt a, MPCC Vice President Pu C.L Ruala chuan, ramri chin fel theihna’n lehkha pawimawh an neih te nen Supreme Court a kal turin an inpuahchah mek tih a sawi a. MPCC chuan sorkarna a siam leh anih chuan Mizoram State boundary enkawl bik tur Boundary Commission a din dawn a ni, a ti.

Mizo National Front (MNF) hruaitute an kawmnaah an party Senior Vice President Pu R Tlanghmingthanga chuan MNF Party-in Sorkarna an lo siam anih chuan Mizoram leh Assam inrina tak tak Sq. Miles. 509 chu neihlet leh tumin nasa takin hma a la dawn a ti a. Tuna Survey of India ten Mizoram leh Assam inrina MAP an hman chu phuahchawp ramri a nih avangin MNF party chuan a pawm lo a ti. Mizoram ramri zawng zawngah Force pawh dah belh anih tur thu leh MNF chuan ramri venhim hi na taka kal pui’’ an tum a ti a ni.

Mizoram Bharatya Janata Party (BJP) chuan Mizoram State leh State dang nen a inrina mai bakah International boundary zawng zawngah BJP chuan Sipai tam tak a dah ang, tih an party General Secretary Pu H. Ramthangsanga chuan a sawi a, chutiang tur pawhin ruahmanna siam tawh a ni a. Mizoram leh Assam ramri bik chu Mizoram ah BJP in Sorkarna an siam theih chuan rang taka sawifel nghal theih a ni, a ti. 

Central leh Assam-ah BJP chuan sorkarna a neih tawh avangin, he thil hi chu thil harsa a ni lo a, Tawngkam a sawifel theih a nih loh pawhin Law Court-ah kal theih a ni a. Law Court-a kal dawn hian sum tam tak a ngai dawn a. Chutiang tur MZP ten hmalakna annei anih chuan Mizoram BJP an Sorkar chuan senso zawng zawng pawh BJP chuan a tum vek anga, MZP in Zofate Chawlhbuk sak an tum pawh BJP a Sorkar chuan theihtawp chhuahin a pui ang a ti.
PRISM President Pu Vanlalruata chuan hmasawnna nasa tak a kalpui an tum a International Boundary te ven uluk hle a ni dawn a, Police Force pawh thahnem tak dah tum a ni, a ti. BSF te rin an kai zawh loh thin avangin BSP Outpost awm na ah pawh PRISM chuan Police Outpost dah thuah an tum tih a sawi a, Armed Police te theih tawp a tih chak an tum bawk a, MZP ten Bairabi Zophai hmuna Zofate chawlhbuk sak an tum na hmun hi Mizoram chhung ngei a nih avangin PRISM chuan he Inner Line Forest Reserved Area 509 Sq/M hi an sawrkar chuan an la let dawn a ni" a ti.

Zoram Peoples Movement ZPM Steering Committee Vice Chairman Pu Kenneth Chawngliana chuan an sorkar chuan ramri chungchang chingfel tur Boundary Commision an din anga, ramri enkawl tur bik department siamin ramri enkawltu tur bik Minister pawh dah a ni ang a ti a, Ramri hrul ah Police Force dah chu an ngai pawimawh hle a, a rang thei ang berin hma an la anga ramri hrul ah Police force thahnem zawk an dah dawn a ti a, hei bakah hian Bairabi Zophaia MZP ten Zofate Chawlhbuk sak an tum chu bawhzuiin a sa tu nih ngei an tum dawn a ni, a ti.

MZP hian ramri chungchang bakah, party hrang hrang ten zirna an kalpui tum dan te, dan lova Mizorma lo lut foreigner an dawnsawn dan tur te leh Lok Ayukta chungchang te an zawt a ni. -AIR News Aizawl

No comments:

Post a Comment

Post Bottom Ad