MIZORAM M.L.A. INTHLAN LEH HINDUTVA THURUK - TIMES OF MIZORAM

Home Top Ad

Post Top Ad

MIZORAM M.L.A. INTHLAN LEH HINDUTVA THURUK

- Dr. Ramdinthara Sailo

A chipchiarin kan sawi hman lo. Hindutva laimu erawh chu "India ram pumpuiah Hindu sakhua leh culture hi zawm vek ni rawh se" tih hi a ni mai. (Hindu hoah hian an culture leh sakhua then hran theih a ni lo. An sakhua hi an Culture a ni a, an culture hi an sakhua a ni!)

An ngaihdan thenkhat:

1. India (Bharat) hi Ram Thianghlim-a neitu sakhuate chauh India ramah an cheng thei an ti. Muslim ho ram thianghlim chu Mecca a ni a, Kristian ho chuan Jerusalem an nei bawk a, chuvangin heng sakhuate hi India ramah an awm thei lo.

2. India Independence tirh ata "engatinge Congress sawrkar hian sakhaw tlem zawk Muslim leh Kristiante duata mi tam ber Hindu sakhua zuitute min ngaihthah bik? HINDUSTAN hi Hindute ram a ni."

3. Khawvel ram ropuite anga India ram tiropui tur chuan "Hindu rama siam a ngai".

Hindutva atchilha chawisangtu berte chu RSS ho hi an ni:
India independence hma daih atangin tan an lo la tawh thin a, mahse, sawrkarah thuneihna an neih loh avangin hma an sawn thei lo. Hnam tlem leh hnuaihnung zawk chawisan tumna policy hi Hindu sakhua kalh tlat a nih avangin Mahatma Gandhi te kha an haw em em a, a thattu Nathuram Godse-a pawh kha RSS ruh tak a ni. He an rilru put hmang hian BJP / RSS ten eng vanga Congress party hi haw tlat nge an nih a hrilhfiah hle. (A ziaktu hi eng party mah ka ni lo aw)

RSS an thangharh: 
An thil duh tihlawhtling turin sawrkarah thuneihna chan a ngai tih hriain Political Party Jana Sangh party an din a, chu chu a hnuah Janata party tiin, a hnu lehah Bharatya belhin "Bharatiya Janata Party (BJP)" an lo ti ta a ni.

BJP hmalakna hmanrua (tawktarh) 3:

1. Development
2. Congress sawrkar paih thlak
3. HINDUTVA (Hei hi an thil
tum laimu ber ni mahse an zep tlat a, an puan hnuaiah an thukru thin!!!)

INDIA RAM PUM SYSTEM THLAK AN TUM MEK: 

India rama a lal ber 3-te hi RSS bela chhum hmin diam tawh (RSS Swayamsevaks) an ni vek:
1. President: Ram Nath Kovind
2. Vice President: M. Venkaiah Naidu
3. Prime Minister: Narendra Modi

India ram state Governors zawng zawng 70% vel hi RSS/BJP mi leh sa vek an ni. "Mizoram Governor Kummnam Rajasekharan pawh hi chung zinga mi chu a ni."

HINDU ho duh ang thlapa India Danpui (constitution) tihdanglam hun te pawh a lo la thleng lo vang tih sawi a har ta.

University leh Research Institute pawimawhah an mi leh sa an dah mek dan te, Indian History Hindu thlirna atanga an ziah that sikul tam taka an zirtir tan mek te, India ram khawpui pawimawh tak tak Hindu hminga thlak an tum mek te hi a chipchiarin kan sawi hman lo.

(Education, Health, Cultural thila an hma laknate tum tunah kan sawi hman lo)

MIZORAM LAMAH: 
India hmar-chhak ho hi tun hmaa Congress chakna leh Kristian tamna bial, India ram chhunga state hnufual ber berte awmna a nih avangin BJP tan beih an itawm hle ang. Tichuan, fing takin kum 2016-ah "North-East Democratic Alliance (NEDA)" rawn dinin, Congress ni lo tualto party te member atan an rawn thlem thlu ta hlawm a ni. Mizoram atang pawhin kan tualto party lian ber MNF chu NEDA member a ni ve nghe nghe.

NEDA kaltlangin BJP an lal zel:

Hmar-chhak state 8 te chu BJP lakah an tlu ta zawih zawih mai! Tunah hian heng state 8 zinga 7 ah BJP chuan sawrkarna a chang ta!! Hmarchhak state zinga 3 "Kristian ram" tia chhiar thinah meuh pawh Mizoram chiah a la ding!! Nagaland-ah chuan MLA 60 ah 12 chauh hmuin BJP chu sawrkar siamtuah a tel tho a, Meghalaya ah phei chuan MLA 2 chauh neiin BJP an sawrkar tho !! Mizoram-ah pawh BJP lalna hnuai Krismas hmantir min tumna chu NEDA kal tlang tho hian a ni. I HARH ANG U !!!

Kan Politiciante thusawi hi rintlak a tlem khawp mai! MIPUITE I MAWL LOVANG U! Internet leh khawvel news hre phak tan chuan NEDA kalphung leh BJP sawrkarna KAILAWN a nihzia chu chal anga chiang a ni !!

Tun atanga kum 100 an thlir:

Mizoram hi Hindu sakhua leh Culture hnuaia dah duhtute hi an hmanhmawh lo. Tun atanga kum 100 velah chuan an tum hi tihhlawhtlin ngei an inring. Tun MLA inthlan hi an kaw hreuh tanna hmanrua chauh a ni. Sawrkarna chang lo mahse min la bei zel dawn chauh! Tun inthlan hi Politics thil mai ni lovin Thalarau thil a ni tih hi Mizo Kristiante hian kan hriat thiam ava pawimawh em !!

TUN HI KAN RAM TAN THEIHTAWPA KAN TAWNGTAI HUN A NI E!

No comments:

Post a Comment

Post Bottom Ad