MZP PRESS RELEASE
Vawiin 8th November, 2018 tlai dar 2 khan PRISM President Room ah MZP hruaitute leh PRISM hruaitute 2018 MLA inthlan lo awm tur chungchangah an inkawm.
He hun ah hian MZP hruaitute hi PRISM President Pu Vanlalruata, General secretary Pu Ngursailova Sailo, Treasurer Pu HK Liansawta leh hruaitu dang ten an lo dawng sawng.
He hun ah hian MZP te chuan Ramri chungchang , Education Chungchang, Mizoram a Eiru chhuitu tur Lok Ayukta din chungchang leh Mizoram chhunga dan lova awm Chakma Foreigner chungchang a PRISM Party hmalak tum dan te an sawi pui a ni.
PRISM KAN SAWRKAR CHUAN EIRU CHU NA TAKIN KAN HREM ANG LOK AYUKTA THLARUK CHHUNG IN FUNCTION TIR KAN TUM
MZP President L. Ramdinliana Renthlei chuan MZP in Mizoram -Assam ramri chungchang a hma an lo lak tawh dan hrang hrang te a sawi a, Ramri hrulah Sipai tam zawk dah a tulzia te, kan ramri te a lo him zawk nan Boundary Developed pawimawh zia leh PRISM a lo Sawrkar chuan Zofate Chawlhbuk sak a nih theih nan hma lak an tum leh tum loh a zawt a.
PRISM President Pu Vanlalruata chuan, "MZP te nen MLA inthlan chungchang ah inkawm na hun tha tak kan nei thei hi lawmawm ka ti a, PRISM a sawrkar emaw sawrkar lo emaw Ram leh Hnam tan MZP te chu thawhpui zel kan tum a ni," a ti. "Ramri chungchang hi PRISM chuan kan ngai pawimawh hle a, Development nasa tak a kalpui kan tum a, International Boundary kan neih te hi kan veng uluk hle dawn a, Police Force pawh thahnem tak dah kan tum a. BSF te hian hmun thenkhat a chuan Chakma Foreigner te hi an lo hum thin avangin BSF Outpost awmnaah pawh PRISM chuan Police Outpost dah thuah kan tum a. Tin, Armed Police te hi theih tawp a tihchak kan tum a, Indo thei turin Training pek kan tum bawk. MZP ten Bairabi Zophai hmuna Zofate chawlhbuk sak an tum na hmun hi Mizoram chhung ngei a nih avangin PRISM chuan he Inner Line Forest Reserved Area 509 Sq/M hi kan sawrkar chuan kan la let dawn a ni." a ti.
PRISM President Pu Vanlalruata chuan, "Mizoram Zirna chhe mek leh Quality tla hniam mek hi PRISM chuan siamthat kan tum a, Education Department reng reng (School Education, Higher & Technical Education ) hi Minister pakhat enkawlna hnuaiah awm turin ruahmanna kan siam a, Directorate hi chu kum eng emaw chhung a ngaiin a kal anga kan sawrkar chhung ngei in Directorate pakhat ah dahkhawm hi kan tum a ni, chu chuan Directorate a zirtirtu attached hi a tibo ang. Zirtirtu tu pawh anmahni post ah theuh an awm anga zirtirtu indaih lohna a titlem thei dawn a ni. Khawpui chung bika Elementary Section hi zawi zawi a tih tlem hi PRISM chuan a duh a, thingtlang lam tan Elementary Section thazawk siam hi kan tum nghet tlat ani. Tin, Mizoram in kan vei leh kan mamawh All India Civil Service / Central Service ah Mizo tam zawk kan tlin theih nan hmalak kan tum a, Free Coaching Class te pawh kalpui ngei kan tum. Education Budget hi hetiang a hma kan la thei anih chuan dahbelh ngai lovin tun a kan Budget hian min daih dawn tih hi kan hrechiang hle a ni, hetiang a Education Minister pakhat in a enkawl theih chuan tullo tak a sum tam tak kan khawhral kha a bo thei dawn a ni." a ti.
MZP chuan Chakma Foreigner chungchang PRISM Party hmalak dan tur chungcchang a zawt a. Pu Vanlalruata PRISM President chuan, "Chakma Foreigner pung chak lutuk hi kan vei hle a, CADC Area hi keini chuan uluk tak a ven ngai in kan hria a kan ram a Chakma foreigner punchak na chhan berah kan ngai. He area a Mizo cheng te hi theihtawp in Development kan pe anga tun aia tam zawk Zofate kan chen theih na turin chenna tlak ah siam kan tum a ni. Village /Town Population Register kan siam anga hei hian nasa tak in foreigner lut ru tur a veng dawn a, foreigner awmsa hnawhchhuahna kawng tha tak a ni dawn a, kan tum ber Chakma Foreigner hnawhchhuah hi awlsam tak in kan kalpui tawh mai dawn a ni." a ti.
MZP chuan Mizoram a eirukna dodal a nih theihna tura PRISM Party hmalak dan tur chungcchang a zawt a. Pu Vanlalruata PRISM President chuan, "Kan din chhan ber, 'Eiruk do' kawng ah hian nasa taka hmalak hi kan tum ber a ni a, kan huat ber eirukna a ni, chuvang chuan eiruk do beihpui kan thlak dawn a, eiru chu investigation kan la anga action kan la nghal dawn a ni. Lok Ayukta hi PRISM a Sorkar chuan thlaruk(6) chhung in kan function tir dawn. Tin, eiruk do na atana pawimawh ber pakhat chu court hi a ni a, eiru ten court hun sawn hi an tum ber a nih thin avangin kan sawrkar chuan court hun sawn hma thin hi kan remti dawn lo a ni chu chuan eiru tam tak min hrem tir thei dawn bawk a ni." a ti bawk.
MZP leh PRISM Party hruaitute inkawm hona ah hian MZP lam atangin President L. Ramdinliana Renthlei hoin hruaitu thahnem tak an tel a, PRISM lam hi an President Pu Vanlalruata leh hruaitu dang thahnem tak an tel bawk a, inkawmna hun thatak neih a ni. MZP chuan kan hmalawk MLA inthlanpui lo awm tur pual hian Mizoram chhunga Political Party hrang hrang te a kawmkual zel dawn a. November 9, 2018 chawhnu dar 1:00 hian Mizo National Party nen inkawm hona leh November 10, 2018 chawhma dar 11:30 hian Mizoram BJP nen inkawm hona neih leh tur a ni bawk ang.
Sd/-
(H. LALTHIANGHLIMA)
Asst. Gen. Secretary
Post a Comment