Pune Mizo Christian Fellowship an inṭhen darh leh ta - TIMES OF MIZORAM

Breaking

Home Top Ad

Post Top Ad

Pune Mizo Christian Fellowship an inṭhen darh leh ta

DAM LEH TLANG KHATAH THIH LEH RUAM KHATAH

~ Lawmnakima

Zirtawpni zan (Nov 16, 2018) khan Pune khawpuiah Pune Mizo Presbyterian Church (PMPC) chu din fel a ni ta. Kum 37 chhung Pune Mizote thlarau rawngbawlsak hna thawktu Pune Mizo Christian Fellowship chu a phel ṭan ta der mai!

PMPC din a ni hi Presbyterian member-te tan chuan a thlamuanthlak dawn mange. Mahse, kan ṭhalaite rilruah hian pâwl ram inthliarna awm hi hreawm kan ti vawng vawng.

Ṭhenkhatin Presbyterian Kohhran ding chu an lawm viau laiin Mizo hnam inpumkhat duhna rilru, hnam inpumkhat duhna rilru neite chuan an ngaithiam ngang lova, mahni pâwl rawngbâwlna ai chuan Mizo puite lungrualpui theihna dah pawimawh an tam si.

Pune Mizo te kan ṭap a ni! Min hnem thei in awm lawm ni?

Presbyterian Kohhran member ni si, inṭhenna duhlo tu, rilru na ngawih ngawih hi ka hnem thiam lo a, ka hnem seng lo a ni.

Darkar tin mai message ka dawng a, "U Lawmna, kan tuar thiamlo a ni," ti au aw ka hriat hian ka mittui a kaichhuak zel mai.

Rampawnah Mizo ṭhalaite zingah kum 10 chuang ka thiam angin rawng ka lo bawl ve ta. Inlungrual taka kan inkawm theihna hian hnam inpumkhat duhna min pe a, Kohhran daidangtu awm lovin kan inhmangaih tlang ngawih ngawih a ni.

Zanin a min rawn betu ka nau duhtak Mara nula chuan ṭap zawih zawih chungin, "U Lawmna, ka roomate 3 te hi an inkhawm hrang tawh dawn, engtin nge kan tih ang"a rawn ti. Hriat a va hrehawm em!

A roomate-te chu Mizoram hmarlam mi an ni ve thung si. Chhimtawp leh hmar tawp a Mizote min phuarkhawmtu Pune Mizo Kohhran chu kan lawikhawmna a nilo ṭan ta dér mai.

Mizoram kan Kohhran hruaitute u, Mizoram pawnah hian Mizote kan in unau a, hnam inpumkhatna kan zir a, kan in hmangaih tawn ngawih ngawih a sin. Min ṭhen hrang lo zawng hian rorel dan a awmlo em ni?

In fate hi an ṭhiante thlah phallo in an ṭap ngawih ngawih a ni. Mahni Mizo puite thlah phal loh avanga ṭap leh na thawm hian thinlung hi a vaw keh a, chhungrilah min rum tir vawng vawng mai a ni.

Pune-ah hian Mizo hnahthlak, Lai, Mara, Lusei te inpumkhatin Kohhran khatah kan lawi za a, hnam ang pawhin kan harhchhuak mêk a sin. Hnam inpumkhata Pathian fakho mek ṭhenhran kan ni ta mai hi a na vawng vawng a ni.

Ka naute rilru hreawm hi zan thum ka tlaivarpui ta.

Inlungrual taka Siamtu Pathian be ho thin kara inthenhranna hem thlaktu, intihhranna thlarau tuhtu, a fawh kaia tang thin, tha tho taka phusa thin hote hi inpumkhat tura min zirtirtu leh inpumkhat dan min kawhhmuhtu kan biak Pathian mithmuhah hian an dinhmun hi eng tak ni ang maw?

Engtikah emaw chuan pâwl ram zauh duhna hnualsuatin Mizo Hnam angin kan la harh thar leh ngei ang.

Chu hun chu rinna mitin (mittui karah) kan thlir reng a ni !

Kan va nghakhlel em !

No comments:

Post a Comment

Post Bottom Ad