Rev. Chanchinmawia Thih Danah L.T. Hrangchal In Sawi Tur A Hria Ang - R Lalzirliana - TIMES OF MIZORAM

Breaking

Home Top Ad

Post Top Ad

Rev. Chanchinmawia Thih Danah L.T. Hrangchal In Sawi Tur A Hria Ang - R Lalzirliana

Kan Pastor thihna hi Politics khelh nan an hmang duh a nih chuan, khatih laia SP L.T. Hrangchal, tuna an Candidate ni ta hi zawt rawh se, thudik a sawi duh chuan sawi tur a hria ang
Mizo National Front
General Headquarters
Mizoram : Aizawl

Press Release

Pu R.Lalzirliana leh Pu Lalrinliana Sailo-ten Seling-ah Press mite hmaah an dinhmun leh Rev. Chanchinmawia boral chungchanga inpuhmawhna reh theilo sawifiahna an nei.

Vawii ni 21.11.2018 (Nilaini) hian Ex-Home Minister Pu R.Lalzirliana leh Pu Lalrinliana Sailo Ex-Minister-te chuan Seling-ah Press mite kovin an dinhmun leh Rev. Chanchinmawia boral chungchanga inpuhmawhna reh theilo chu sawifiahna hun an nei a. Pu R.Lalzirliana chuan, "Vawiinah hian Chalhfilh leh Tawi bial inrina lai tak Seling-ah Press mite kan koh chhan chu a bikin Pu Hawla hian kei leh Pu Rinliana hi kan tlak theih ngeina turin 'Tuifimin a daih loh chuan Tuinu pawh kan hmang ang' tih a sawi a. Pu Hawla hova kan awm lai khan kei leh Pu Rina hi MNF au thlatu ber kha kan ni ve a. Mahse, tha taka kan unau MNF-ten min lo kuangkuah leh hi an rilru a puitlingin an fakawm ka ti takzet a ni. Pu Hawla hian kum 2013 inthlan dawn khan kei leh Pu Rina hi tla turin min lo duh tih kan hre daih tawh a. Saitual leh Khawzawl chu District pek theih a ni lo ang tih Pu Hawla nen an ti ti dun Pu John Siamkunga'n a sawi chhuah khan kei pawh ka ăng nasa hle a ni. Kei leh Pu Rina hi Congress-ho hian thudik lo leh thil chhe tinrengin min bei mahse, min khawngaihtute an pung zel a. 

A zawnin MLA-ah term 4 thlantlin ka lo nih tawhnaah tun tum hi ka campaign hahdam ber tum a ni daih thung. Pu Hawla Champhai lama a ding leh hi mak ka ti hle a. Champhaia buaina a chhuah lai khan kei pawh Home Minister ka nih angin thuneitute inrawlh tura ka tih pawhin Pu Hawla chuan min zilhhau a. Department hotute kha engmah ti lo turin a hrilh a, Circuit House tihchhiat kha repair a phal lo. Champhai mipui thih pawiti lo, thisen chhuah leh tawrhna tinreng an tawrh pawitilotu kha, tunah Champhaiah thlangtling tura a inbeisei leh ngam hi a mak ka ti takzet. Inthlan result a lo chhuak ang a, Congress-ho hian tuna opposition MLA an neihzat hi an neih ka ring lo," a ti.

Pu R.Lalzirliana chuan, "Hman ni lawk khan Congress Thlifimah kan Sakhaw puithiam Rev. Chanchinmawia thih dan an thar thawh leh a. Mi thihna party-ten politics-a hlawkna tel tum nan hman an tum hi thalo ka ti hle a. A hretu chu chunglam khi a ni a, dawt hmanga inbeihna chu a tlo lo a, a tui tlalo telh telh ang. He mi lo rik chhuah lehna chhan awmze dik taka kan ngaih chu, Thansanga Chhinga vengin 'Pu Zorama'n that turin min tir a ni' a tih vang a ni. Home Minister ka nih angin he thu hi khatih lai khan ka ngai pawimawh hle a, chhui chhuah ngei pawh ka duh a. Thansanga kha ka ko a, 'Tute emaw fuihpawrh i nih chuan a pawi ang, i hre chiang em?' ka ti a. 'Ka thian Lungmuana pawhin a hria' a ti a. Lungmuana chu ka ko a, ani chuan "Ka hre reng reng lo, 'tiang hian Thansanga hian a lo ti leh ngawt thin a' a ti a. Sum tuakna mai maiah an ti nia ka hriat vangin bawhzui tlakah ka ngai ta lo a ni. Kan Pastor thihna hi Politics khelh nan an hmang duh a nih chuan, khatih laia SP L.T. Hrangchal, tuna an Candidate ni ta hi zawt rawh se, thudik a sawi duh chuan sawi tur a hria ang. He thilah hian tute emaw puh tuma thiltih tum an la awm chuan, thil dang pawh kan la sawi leh ang," a ti bawk.

Pu Lalrinliana Sailo pawhin, "Congress sorkar tla tur hian sawi tur mumal an nei tawh lo. Thu mu hnu Rev.Chanchinmawia thih thu kum 10 hma lama mite an rawn tharthawh leh mai mai a ni. Congress chuan Manipur-a MLA corrupt tak Chaltawnliana chu chah chhuakin tunah kan bial velah a campaign mek a. Manipur politics ze thalo hi an rawn pal lut ang tih ka hlau hle a ni. Congress chuan pawisa sem bak chu engmah tih theih an nei tawh lo. Congress leh BJP chuan Vai campaigner an chah chhuak mek a, MNF chuan vai campaigner kan mamawh ve lo," a ti bawk.

(R. LALHMANGAIHA)
Joint Secretary
Media & Publicity Deptt
Mizo National Front
Memo No.MNF/Media/2018/01/373
21.11.2018
Sawma Sailo Vlmsa Sailo

No comments:

Post a Comment

Post Bottom Ad