October 31, 2018 (Nilaini) khan Calvin Study Center, Aizawl Theological College bul tumin Reformation kum 500 tlin lawm kharna inkhawm neih a ni.
Kohhran siam thatna (Reformation) hi kum 1517 October 31-a Martin Luther-a’n thuchang 95 (95 Thesis) Saxony Bial Wittenburg khuaa All Saint’s Church kawngkhara a tar chhuah ni kha Reformation intanna anga ngaih a ni a. Kum 500 a tlinna ni kum 2017 October 31 atang khan a lawmna khawvel hmun hrang hrangah hman a ni a. Mizoramah pawh Calvin Study Center, Aizawl Theological College bul tumin Chanmari Presbyterian Kohhan Biak Inah hman a ni. Kum khat chhung a lawmna hman a nih hnuah Oct. 31 (Nilaini) khan a kharna hi Khatla North Presbyterian Kohhran Biak Inah neih a ni.
Kharna inkhawm hi Rev. Prof. Vanlalnghaka Ralte, Vice Principal, Aizawl Theological College chuan a kaihruai a. Aizawla Kohhran hrang hrang aiawh te leh mi sawm bikte nen Biak In khat tlatin he hun hi hman a ni. Aizawl Theological College zirlaiten Martin Luthera hla phuah Latin tawng leh German tawngtein an sa a, ATC Male Voice an zai bawk. Thupui, “Envisioning reformation in the 21th Century Mizoram” (Kum zabi 21-na Mizorama Reformation hmathlir) tih a ni a. Rev. Dr. Vanlalchhuanawma’n ngaihnawm takin a sawi a. Mizorama kohhran hrang hrangte thawhho leh inpumkhat chu hmathlir pawimawh tak a nihzia a sawi.
Lehkhabu pahnih, Calvin Study Center buatsaih chu tlangzarh nghal a ni a. ‘Calvin-a zirtirna leh Mizo nun Vol. 5’ leh ‘Siam Thatna Ropui’ tih te chu Pu Thankima’n lehkhabu lo pian chhuah dan leh a chhunga thu awm tlangpuite a sawi hnuah Rev. Dr. H. Vanlalauva’n a tlangzarh a. Heng lehkhabute hi Kohhran siam thatna chungchang chhui zui zelna leh kan ram tan a pawimawhnate tarlanna a ni.
ATC Faculty ten an buatsaih, Saptawnga ziak ‘The Reformation’ tih chu Rev. Malsawmzoliana’n sawihawnna a neih hnuah Rev. Dr. Zaihmingthanga’n a tlangzarh bawk a. Heng lehkhabute hi Synod Bookroom hrang hrangahte lei theih tura dah chhuah thuai tum a ni.
Source: Mizoram Synod
Post a Comment