MNF MZP InkawmVawiin 9th November, 2018 Dar 2 :00pm khan Mizo National Front(MNF) General Headquarters office ‘Mizo Hnam Run’ Aizawl-ah MZP hruaitute leh MNF hruaitute inkawmhona neih a ni a. MZP hruaitute hi Pu R. Tlanghmingthanga, Senior Vice President leh hruaitu dang ten an lo dawngsawng a. Tv. L. Ramdinliana Renthlei, President, MZP chuan MNF party-in, 1. Ramri chungchang, 2. Education chungchang, 3. Chakma Foreigners chungchang leh 4. Lokayukta chungchanga hmalak an tum dan leh hmachhawpte zawtin inkawmhona hun neih a ni.

Tv. L. Ramdinliana Renthlei chuan MNF Party hrauitute hnenah 1. ‘‘Mizoram leh State dangte inrina chungchanga MNF party hmalak tumna’’ a zawt a. MNF party hruaitute chuan ‘MNF Party-in Sorkarna an lo siam anih chuan Mizoram leh Assam inrina tak tak Sq. Miles. 509 chu neihlet leh tumin MNF party chuan nasa takin hma a la dawn a. Ramri buai chin felna awlsam ber chu Silai a puah phawt a ngai a, Mizoram border area pawh changtlung zawk leh hmasawnna turin hmalak a. Zofate chenna tlak tur leh nuam takin kan siam anga, tuna Survey of India ten Mizoram leh Assam inrina MAP hi phuahchawp ramri a nih avangin MNF party chuan kan pawm lo a. Ground demigartion a awm loh bakah rin thu mai niin, Border-a awm tur pawhin Border Security Force(BSF) pawh hi an rintlakloh avangin, Mizoram ramri zawng zawngah hian Force pawh dah belh anih tur thu leh MNF chuan ramri venhim hi na taka kal pui’’ an tum thu in MZP hruaitute zawhna hi an chhang a ni.

2. Mizoram Education chungchang MNF Party hmalak tumna : MNF party hruaitute chuan, Mizoram School Education Department tan tun ai hian Budget dah tam a, School timing pawh tih danglam ngawt a tum lo a, an ti a. Khawtlang leh mipui dinhmun a zira ennawn te, Department dangte angin Education service rules leh department enkawltu tur pawh MPSC kal tlanga lak a ni ang a, Khawpui chhung leh thingtlanga zirtirtu dinhmun inthlau lutuk chu MNF party-in a veizia leh Sorkarna an lo chang a nih chuan Mizoram pumah rualkhai taka kal pui a, Zirna in leh zirna pawh tha thei ang bera kal pui a nih tur thu MNF party hruaitute chuan an sawi bawk.

3. Chakma Foreigners chungchang : MNF party hruaitute chuan, ‘‘MZP ten ram leh hnam humhalhna kawnga Foreigners duh lohna leh huatna thinlung an nei chu a ropui a. MNF chuan hun kal tawh leh hmasa lamah pawh Chakma Foreigners chu nasa takin a lo dodal thin a. Chutiang rilru chu tunah pawh MNF party chuan a la pu reng a. A la dodal zel dawn a ni. MNF Party-in Sorkarna a lo chang anih chuan a tul dan a zirin Chakma Foreigners endik hnatlang kan nei ang’’ tiin, MZP hruaitute chu an hrilh a ni.

4. Lokayukta chungchang : MNF Party hruaitute chuan, ‘‘LOKAYUKTA chu Mizoram Assembly pawhin house a lo passed tawh leh hmang tura a lo rel vek tawh avangin, hetianga eirukna leh hlemhletna chhuia hrem theitu tur dah hi thil tha tak a ni a. Kan ram pawhin a mamawh tawh hle a ni. MNF Party chuan sorkarna a lo chang anih chuan Lokayukta chu rang taka hman nghal tur a ni,’’ tiin, MZP hruaitute hmaah MNF party hruaitute chuan an sawi bawk a ni.

MZP chuan Dt. 10.11.2018 (Inrinni) chawhma dar 11:30 hian BJP Party Office ah an hmalak tumnate zawtin kan kawm leh dawn a ni.

Sd/-
(LALNUNMAWIA PAUTU)
General Secretary

Post a Comment

Powered by Blogger.