Retheite retheih chhan, hausate hausak chhan:
- K Sapdanga (ZPM MLA Candidate)
Mi min sawi duh dan turte hre vek chungin, kan thiam loh zawng tak politics kan han luhchilh ve ta a, hei hian chhan a nei ve a - 'Retheite retheih chhan chhui chhuaka siam ṭha tur leh, hausate hausak chhan hi a dik loh chuan do turin' kan pen chhuak ve ta rawih a ni.
Thingtlang naupang, hak tur nei mumal lo ṭhin, retheih awmzia lo tem tawh tan chuan, tunlai khawvela miin in leh lo chu sawi loh khawvel hmun dang ang maia 'engkim' an neih tawh laia chaw chhum tura la harsa, gas connection pawh nei thei lo, damdawi takngial pawh lei thei lo hmel hmuh hi a hrehawm ngawih ngawih a ni.
Heng mirethei kan tih zingah hian mi taima leh thawkrim em em an ṭhahnem hle a, nimahsela an rethei tlat si hi puih an ngai a ni. A ngaihna an hre loa, a enkawltu sorkarin a ngaihna an hre hek lo - pawisa tlem te te a khat tawka pekin a siam lian zo lo a, a aia tam pek tuma intiam an lo la chhuak cheute hi vote zawnna mai a ni. Retheite retheih chhan hriat a, lei rem an rah theihna kawng zawn a hun ta.
Hausate hausak chhan hi chhui ila - taimak leh remhriat avanga hausa, thiamna leh finna avanga hausa an awm. Chutihlaiin politics khelh fuh avanga hausa thut te, thil dik lo tih avanga hausa thur thur te, thiamna bik pawh nei lo chunga midang aia hna hmu thei riaute hi hausak dan dik lo leh rinhlelhawm a ni. Political party pisaa lawi taimak deuh avanga hausate pawh a awm theih a ni tih Mizoramah kan hmu ta.
Rethei zawng zawng kan siam hausa thut thei lo, dik loa hausate vawi leh khatah kan hnuk hniam thut thei lo a nih pawhin, ZPM a sorkar chuan tuna kan kal dan ai chuan a danglam ang. Retheite retheih chhan kan hriaa tihdik kan tum dawn. Mi hausa thenkhatte dik lo taka an hausak dan kan hriaa kan titawp dawn a ni.
Chutiang tih tumna leh tih duhna nei lo ila ZPM a pian kher hi a ngai dawn em ni? Tunah hian party pahnih, retheite tirethei zual a, dik lo taka hausakna kawng hawngtu kan hmuh mek hi.
Pathian leh mipui zarah ZPM hi kan sorkar a nih ngai chuan, kan ziaawm ngei ang tih chin hi chu a sawi ngam a ni. Tute emaw angin huaisen takin tiam piap piap duh phei ila, ZPM sorkara kan danglam dan tur hi chu uar taka sawi tur a awm dawn a, chutianga thu uar em ema patling ṭhankin ve meuhina sawi chiam chiam chu midang kutah i dah teh ang.
MLA inthlan lo awm turah Aizawl East I mipuite khawngaihna ka dil a, hnathawk thei dinhmuna min dah a nih chuan Mizorama bial entawntlaka chhuah tumin theihna zawng zawng ka hlan ang. Kan biala retheite retheih chhan hre turin ka fang chhuak tawh a, he bial, 'ruling bial' ni zar zar si hian puih a ngai takzet a ni. Aizawl bialah hian keini aia puih ngai hi an awm kher awm lo e.
ZPM hi a sorkar a nih ngai chuan, Mizoram hian hmel danglam a hmu ngei ang.
Post a Comment