Kum kal ta, 2017 khan Tlabungin Khawthlangtuipui lian vangin harsatna nasa tak kan tawk a, chenna in 800 chuang zet a chîm. 

Tuilian vanga mipui tuarna a nasat tham avangin, Sorkar meuh tan pawh chet lak hleih theih a ni lo. Zep nak emaw, a Sorkar ber kha professional NGO-ten hmakhalhin, tuilian tuarte țanpui kawngah ke an pên khalh zung zung mai a ni. 
TUILIAN KARA ȚANPUITU HMEL  - PU B LALCHHANZOVA CHUNGA LÂWMTHU SAWINA
Tuilian tuarte țanpuia rawn pen chhuak NGO tam zawk kha mimal din ni chiah lo, Kohhran leh pawl indin nghet sa behchhana din a ni a; mahse, khang zinga tuilian tuarte tana rawn penchhuak Cod-Nerc kha Pu B Lalchhanzova din leh enkawl a ni.

A hlimchhawnah, tuilian tuarte mamawh zualpui sema an vir kual zak zak hnu-ah, a hnu lehzela an chhawr zui zel dan tur ngaihtuahin ruahmanna an duang a, kumin ațang khan 'PUITU PROJECT' tia vuahin a mamawhte chhawmdawl leh dawmkan hna an kalpui leh ta a ni.
PU B LALCHHANZOVA
A tawi zawngin, hlawhtling taka an kalpui he project kaltlang hian YMA, Tlabung branch-in lawng țha zet mai kan neih phah. He lawng hi Branch YMA-in enkawl mah se, a mamawh apiangten țangkai takin an hmang a, kumina tui a len nawn leh phei kha chuan, chhawmdawl hna thawh nan țangkai taka hman a ni zui ta a ni.

Phai lam ațanga an phurh thlen ar chi țha chu awmze neia semchhuah niin, chhungkaw tam takin hlawhtling takin ar an vulh a; an zingah hian tun hmaa ar la vulh ngai lo, an hlawhtlinpui tak avanga tun thlenga la vulh zui ta reng an awm. 

Chu mai ni loin, puanțhui zir duhte tan a thlawna zirna an hawng a; kawr țhui chu sawi loh, puan la chep chhin miah lote kha a hrana rawih mi thiamten an hrual a, a thlawna zir theihna hun an hawn chhung thla hnih a ral meuh chuan, mahni țhui ngei an ha fur tawh. Chu mai ni loin, an zavai hian puanțhuina khawl an dawng leh vek bawk. 

Cod-Nerc enkawltu Pu B Lalchhanzova zara mipuiten hlawkna kan chan hi ngawihbopui atan chuan a uiawm thlawt a. Mimal din professional NGO-in, hetiang taka khaw pum (Khaw pakhat mai ni lo) tuama mi dangte chhawmdawl hna kalpuia an hmalakna kan hriat vawi khatna a ni hial ang. 

Pu Chhantea hi tun hmain kan hre ngai bik lo. Mahse, Sorkar hotu lian zawng zawngten an ngaihthah, Mizoram ramri hrula khua - Tlabung tana kha ti taka a inpekna kha kan theihnghilh ngai tawh lo ang. 

Tin, mi rilru tluang leh tumruh, a nek lam na taka nek țhin, mi fing leh remhria, mi inngaitlawm leh thawkrim tak a ni tih kan hriat phah a ni. 

(Social media platform-ah tu emaw mimal fakna kan hmu foin a rinawm. Chu'ng zinga tute emaw faktu țhenkhat chuan eng emaw mimal hlawkna an tel vanga fak leh sawi mawi țhin an ni maithei. 

Tun țuma a chungchang ka sawi tak Pu Chhanzova hi mimal takin ka hlâwkpui lo. Mahse, amah avanga kawng hrang hranga hlâwkna teltute vang zawkin a thil tih hi pholan ve țulin ka hria a ni.) ~ Vanlalhriatpuia Khiangte

Post a Comment

Powered by Blogger.