REIEK-AH “ZOFEST-2018” ROPUI TAKIN NEIH A NI DAWN: TEL TUM ZOHNAH THLAK AN TAM HLE
~CT Lalrinawma
Nov 29, 2018 (MSR): Kum dangah pawh hlawhtling taka “ZOFEST” lo buatsaih thintu Mizo Zirlai Pawl, Gen.Hqrs, Mizoram chuan Dec 4-7, 2018 chhungin Reiek khuaah “Zofest-2018” a buatsaih dawn a, hetah hian tlang hrang hrang leh hmun hrang hranga Zofate chuan tel an tum sup a ni. He ZoFest 2018 thupuiah hian, “INSUIHKHAWM LEH ZAI I REL ANG U” tih thupui hman a ni dawn a ni.
Tel tura chiang chinah chuan:
Myanmar atangin- Chin (Haka), Tedim, Kachin, Hualngo, Ashu leh Chin hnam hrang hrang te :
Bangladesh atangin- Pang, Bawm, miria/Mire
Assam atangin- Biate, Sekechep,
Manipur atangin- Paite, Hmar, Kaihpeng, Ranglong, Chiru, Aimol, Darlong, Vaiphei, Kom, Zou
Arunachal Pradesh atangin - Singpho
Mizoram atangin- Lai, Mara, Hmar, Pang
North East State atanga Students Organization hrang hrangte an rawn tel bawk ang.
Khuallian turin:
Pute- C.L. Ruala MP, Lok Sabha
Dr. C.Vanramsanga, IES, Secy to the Gov’t of Mizoram, Samuel Changsan, EM, North Cachar Hills, Ngamrothang Hmar, EM, North Cachar Hills.
He “ZoFest” lo awm turah a thlengtu tur Reiek mipuite pawh an phurin, Pandal lian tak sain Nov 22 atangin an hnatlang mup mup tawh a ni. ZoFest T-Shirt siam a ni a, pakhat man Rs 300/- a ni.
RAWTNA:
ZoFest chhungin “Reiek Tlang” leh “Khuangchera Puk” te chu tlawhtu tam tak awm ngei tura ngaih a ni a, Reiek Tlang chuan Mizote thawnthuah, lungti leng si, thawnthu lungchhiat thlak tak (tragedy myth)a nei a, hman lai khawvel mifing hmasa Greek hote suangtuahna khawvel ai pawha nep bik chuanglo a neih chu Mizo tawng leh English hmangin Booklet lo siam ngei ni sela. “Ngaite hip, Chhim thlipui leh khuang ruah pui sur maw i tuar le?!Ngaite hippp” ti a, a tawpa tawpah Ngaiteii ngentu Tlawng lui nuar so phul bulh bulhah, Ngaiteii bakkilh, themtleng leh thembu an thlak pawha Tlawng lui tuilian a kam duh si loh vanga amah Ngaiteii ngei mai chu ui tak leh mittui tla zawih zawih chunga tuilian an len tir tak thu te,
Tin, Mizo Pasaltha (Hero/Knight) huaisen hmingthang Khuangchera chanchin ngaihnawm taka ziakna chu siam bawk ni se. Heng thawnthu pahnih ringawt atang pawhin “Zoram khawvel” a chengten Mizoram chu rawn tlawh an chak phah huai huai dawn a ni.
Chulo lehah chuan, “Reiek Tlang” chuan turten tui ina plastic botle/mineral water bur te leh Pepsi, Coke, Beer, Fanta, Zu bottle, etc leh an thil ei inna nylon/sarang ip te an thehthang liam mai mai loh nan, “Bawlhhlawh Bawm” leh "Toilet" tha tak hun/ siam ni bawk se. Chutiang a nih loh pawhin hetiang thil eiin tur ken luh chu Reiek Tlang kal turte tan khap ni bawk se
Hong Kong, Bangkok, Singapore, Seoul, Guangzhou nula tlangvalte incheina anga inchei pha ve tawh, ke hnuai leh underwear thleng pawh a “world branded” thawmhnawa inchei, rim tih tui nan leh hmai tlang tihrual nan te pawh Paris, New York, Seoul fashion industry kut chhuak hmang tawhtu Mizote chuan kan mikhual tur Mizoram pawn atanga “Zohnah thlak” lo kal turte entawn tlak rengin, “FAINA leh THIANGHLIMNA” ah tih hmuhtu i lo ni ang u. “Khep khep” mai dawn a!! “Mizo kan ni, kan hmel a tha. Kan tum a sang bawk si”. ~CT Lalrinawma
Post a Comment