MI-SEHHEL DR. VANLALTANPUIA MLA


DR. VANLALTANPUIA HRINGNUN"MLA ka nih avang hian ka pu/sir min ti chuang suh u. Hmana min koh thinna 'Puite' ti khan min ko zel rawh u."

Congress Cabinet Minister hmingtha leh thusawi thiam, Bhavan leh Pu Hawla rin berte zinga mi, Pu Lalthanliana khing thlatu, Dr.TP-a Politic zin kawng hi a ropui hle. Hmanni lawka Zoram Politic khawvel rawn zuanglut ni mahse, Politic hun khirhkhan tawk nasa zingah a tel hial ang.

Kum 2014 kum tawp dawn khan SEDP Expert turin Pachhunga University College-ah Associate Professor-a a thawh laiin ram leh hnam hmasawnna tur Programme duang tura sawmna aw chu hriain, tawngtaina nen Pathian rawn chung zelin Zoram hmasawnna tura a part pakhat nan chu sawmna chu a pawm ta a ni.

'N' BIAL MNF-TE INNGHAHNA A THIM - A ENG LEH

Lunglei North bial viltu Dr.Lawmtea chuan hrisel lohna avanga bial a vil chhunzawm theih loh thu hriat a ni a. He biala MNF Party-te an hnual rawih a nih kha! Chutih karah Lunglei North bial MNF-te chu Cabinet Minister zei tak maiin MNF Party-te bet deuh tak maia a siam lai a lo ni bawk nen, bial khawhar leh bial thim zingah a tel hman hial ang tih tur khawpa an awm laiin Lunglei 'N' MNF-te hnem turin Dr.TP-a a lo lut ta a. A lo lut tih an hriat ruala bial mipuite lawmzia kha!

Kum khat chuang erh awrh unit leh group-te tlawh kual a, tiphur tak leh tihchak hna a thawh mek laiin Serkawn tlangval, Malsawmtluanga (MST-a) chu MNF-ah rawn lutin bial a rawn vil thuah zui ve leh ta mai le! Ani hi sum a nei bawk a, unit tin leh MNF worker pawimawhte harsatna hriain sum a thlauh thla zel zul zel ta mai si a. Chu mai nilovin veng leh khaw hrang hrangah Football Jersey-te semin, Central Project haichhuah sak turin school, khua leh veng thenkhatte chu a tiam chho ta zel nen, thawm neih len a tum nasa hle. Dr.TP-a nise, uluk tak leh fimkhur taka kalin, mipui moral tih chhiat hlau tak chunga campaign a ni ve thung. MNF Party-ah ngaihdan a phir chho tan ta reng mai.

DR. VANLALTANPUIA HRINGNUN - Political Career of Dr. Vanlaltanpuia, Member of Mizoram Legislative Assembly

MNF PARTY A CHANGCHHE TAN TA

Chutia MNF Party atanga bial viltu pahnih neih takah chuan boruak a sang chho tan ta hle! Lunglei 'N' Bial Official WhatsApp group pawh ralrel hman lo lekin party chhung worker-te inbeihnaah a chang chho hman a. A tawp a tawpah group hnih a piang ta hial a ni.

MST-a'n lamtang MNF chhungkuaah a siam chhoh char char laiin, Dr. TP-a erawh MNF inzawrhna ber, SEDP Programme avangin Zoram khawtin leh hmun tinah zin chhuak a campaign a ngai thung. PUC-ah class thulh loh hram a duh bawk si; MNF chhungkuaa amah support-tute zingah pawh vui hmuipu an awm chho hial a ni. Tv MST-a lah a hman si a. Full time-in a vil chawt mai a ni. Khawi khawiah emaw, eng eng emaw a lo tiam zel zul bawk nen, Dr. TP-a tan khua a thim tan ta!

'KASAUTI ZINDAGI KI' AN SAWI AIIN HE BUAINA HI A NEP CHUANG LO ANG

MNF Gen. Hqrs. atanga bial viltu tur green signal a chhuak ta. Dr.TP-a chu MNF Gen. Hqrs. te'n SEDP expert a nih bakah, Zoram dung leh vangah MNF tana Campaign puitu a nih avangte, a hahzia hriatpuiin lawmthu sawi nan Candidate hi an chantir dawn niin alang ta. Chutih laiin lehlamin 'a chiang lo, lo campaign chhunzawm r'u min ti' etc.(Thudik ber hriat harsa khawpin thu a tam, ral an bei hman thlawt lo) an lo ti ve bawk.

A tawp a tawpah Dr. TP-a Candidate a nih tur thu chu MNF President chuan Lungleiah a puang chiang ta a ni.

MNF BAN RUNPUI A THLENG TA

Chei le, MST-a'n Candidate a changlo tih hriat rual rualin Pu Duhawma nena an thlalak te, BJP hotute nena sawizawmna te hriat tur a awm chho tan ta. Candidate kan lo changlo ta zawk a nih pawhin lawm takin ka thawhpui ang tih te kha chu a lang ta miah lo. Boruak a sosang zel si nen, a tawp a tawpah MST-a chu ZPM Candidate turin a chian thu hriat a ni zui ta.

MNF Party-a amah tantute infawmkhawmin inthlan hmaa ni hnih chiah a awm thleng khan amah MST-a zuitu Block President-te nen lam an la chhuak a nih kha. Tichuan chhuah runpui chu a indawt chhho ta zut mai a ni.

MNF Party atang a chhuak hriattheih chin te :-

Block President - 2
Block OB/EC Member - 8
Group OB/EC Member - 7
Unit President - 8
Unit OB/EC Member - 48
Frontal President - 2
Frontal OB/EC Member - 6

Heng bakah hian hriat kim loh deuh leh MNF member tam tak lak pen an nei nual nghe nghe a ni.

MI-SEHHEL DR.TP-A TAK TAK KAN HMU TA

Hetia MNF chhungkua a buai nuai nuai lai zawng khan Pu Mathana chuan theihtawpin bial a lo vil thung a. Tu te emaw mawng chu a lo hiat char char ni te pawhin a hriat. Chutih laiin MST-a tantu te'n, 'Dr. TP-a'n chuti ang chuan a ti' tih vel thu an lo lentir nasa bawk nen, Dr TP-a hi tuamdam, lakkir leh insawifiahna hun a hmang deuh chawt a ni ber mai.

Hqts leh Sub-hqts mai bakah he lai bial hre chiang inti te chu an bei dawng hman hle anih kha. Mahse Dr Tp-a erawh a hmelah beidawnna hmel hmuhtur a awm ngai lova, tha tho takin hlim sangin hmalam eng lam athlir a, chu lam chu apan lui tang tang ani. Chu mi hmel an hmuh chuan MNF N bial worker te ati phur a ati thatho a, beiseina asiam thar sak leh thin ani.

A kal tawhna lama champion tumtlat thin Dr. TP-a hi heng harsatna nasa tak te hian timangang ve thin mahse, tawlhsawn emaw, beidawn emaw, lungngaia kun mai hi a tum ngailo hrim hrim a ni. College atangin Friday Class ban veleh Lunglei 'N', a bialah tlanphei thinin, weekend hun awl zawng zawngah Campaign nan te, tuamdam leh thawidam hna te a va thawk tang tang thin. Lehlamah SEDP Programme-ah pawhpen a lo ni thin nen, hun a neilo thin hle. Monday zing dar 3-ah te thovin zing dar 9-a class tan hman turin a bial atangin Aizawl lamah a tlan haw leh vang vang thin a ni.

Hetiang reng renga hun a hman chhungin hmel hmuh hreawm a pu ngai lova, a vui ngai hek lo a. Pathian hnenah Candidate hial a chan avangin lawmthu a sawi mawlh mawlh zawk thin.

MIPUIIN BORUAK AN THLIR

Lunglei North bial chu Cabinet Minister tha ber leh Congress banpui pakhat, Mathana chuan sawrkar sum NLUP leh Contract hna nen a bei nasa mup mup khawp mai a. Tv. MST-a ni se, sumah a buailo tih hriat takin NGO leh Worker-te hnena pek leh sem a ri chho zut mai bawk si.Dr TP-a ve thung chu University-a a hlawh chhuah leh a unaupa, Pu Chawia te nen tangkawpa theihtawp an chhuah bak chu tih ngaihna dang, sum lamah chuan an hre lo. Amaherawhchu Pathian an rinchhan tawp thung.

Chuvangin Lunglei North-ah hian Pu Mathana hi he'ng boruak karah a tlin leh mai ringtu hi Zoram mipui 98% vel an ni hial ang.

A SASEH TAK TAK A THLENGTA

Dr.TP-a chuan University atangin dan ang thlapa leave/chawlh dilin, SEDP Campaign pawh lo hrethiam tawh tura an hotute ngenna nen, hunpumin Lunglei 'N' a lut ta. MST-a zuitute a la let tan a. Congress kulhpui te, ZNP unit la awm te a thiat chho tan ta zel a. Mahse he'ng lawmluhte reng reng hi an hming leh nihna Social Media-ah anmahni ngeiin dah tura an tih loh chu thup tlat a ni thin. Congress leh ZPM phei chuan hmingthup lawmluh chungchangah fiamthu thawh nan leh elhsen nan an hmang hial a nih kha.

Mahse Dr.TP-a hian tum a nei a. A tumah a chiang a, plan mumal tak a nei bawk. MNF Party-a lo lut thar te te-te hi Cabinet Minister hausa tak leh Tlangval sum nei tak hian an umzui a, an thinlung duhna tak tak hmang thei lova an siam a hlauhpui vang a ni.

MNF THLI A TLEHTIR TA

Dr.TP-a'n theihtawpa bial a vil theih takah chuan Lunglei 'N' mnf-in hmasawnna hmuh tur an nei nasa hle. A au hla ber, he biala MLA lo ni tawh te aia thaa hnathawh a tiam te, MLA danglam tak nih a tiam te leh thalai hnathawh tur neilo a vei zia te hian hmun tina mipui rilruah a tla na chho em em a, lawmluh tur an indawt chho zut ta mai a ni. Congress OB te, ZPM/ZNP Unit leh hruaitute laklet/lawmluh tur programmme-a inthuah chho ta deuh zawt zawt mai a, vote thlak ni thleng khan member fee pe an awm hial nghe nghe a ni. A tawp ah zawng a luhlulna leh sehelna avangin chunglam malsawmna hmuin Lunglei N bial MLA alo ni ta a ni.

A PHENAH TU NGE AWM(?)

Dr.TP-a hlawhtlinna phenah hian kan sawi hmaih miah loh tur a awm. Chu chu a nau, Solomon HSS neitu leh Principal ni bawk, Sir Chawia hi sawi hmaih chi a ni lo. Ani hian full time-in a u awm loh pawhin bial a lo vil char char a, a u thachhang dawltu tak meuh meuh a ni. Dr. TP-a ai a awh zo hle a, Lunglei Dist. NGO leh Sports Committee hrang hrangah ram tan a kul a taia lo inhmang nasa tawh, mite hmel hriat em em a lo ni bawk nen, Candidate a ni zawk emaw tih hial khawpin Dr. TP-a hlawhtlinnaah hian a key pawimawh ber pakhat a ni.

TLIN HNU PAW'N MITE'N AN LA AWIH LO

Dr. TP-a hi result puanni khan Hnam Run ngeiah Chibai sema a kal kualnaah MNF Hqrs. lama hruaitute zingah, 'E, Pu TP, i tlin hi kan ring miah lo asin, a va mak em em' ti ngawih ngawih paha chibai/kuah ngawih ngawihtu zuk tam a mawle! Mahse ani chuan, 'kan tling thei a ni' a ti tlat thin. A chhut a, a zir a, a 'confi' em em a ni. Mahse Zoram mipuite chuan Mathana khing thla tur em chuan kan ring lo a nih kha ti rawh u.

Dr. TP-a hian bial hi uluk takin kum 2008 leh 2013 results-te nen, zan rei tak tak thleng a zir chiang thin a. Thatna lai leh chhiatna lai te, in cover theih dan turte hi a zirin a ngaihtuah nasa hle thin a ni. Research Person a nihna hi a lang nasa em em a. Mite hriatpui thlap Doctor nihna hial nei, India ram University tha ber atanga zir chhuak a nihna te hi a thil thlir danah a hriat thin hle. Heti ang mihring rilru chak leh thluak tha hi Zoram khawvel hian ram hruaitu atana kan nghahfak dik tak a nihzia hi a chiang em em a ni.

DR. TANPUIA KAM CHHUAK

"He ka hlawhtlinna hi keimah chauha ka hlawhchhuah theih a ni lo."

"A bul berah Pathian in ka dilna te, Kohhran dilna te a chhang a ni. Ka nupui min support tlattu leh ka chhungkua te chungah ka lawm em em bawk a. Tin, Lunglei North bial chhung Block, Group leh Unit zawng zawngte bakah, MNF worker zawng zawngte, mutmu pawh tuah hman mang lova inthawhrimna zar liau liau a ni. Bial chhunga min vote-tu te zawng zawng chungah lawmthu sawi sen loh ka ba. He ka lawmthu hi min pawmsak ka duh a. Kan bial chhunga lawmthu ka sawi let nan, kan bial development/hmasawnna hmangin nasa takin lawmthu ka la sawi let ngei ang."

"MNF General Hqrs-a kan hotu te, Sub- Hqrs. Lunglei-a kan hotute hmalakna azarah he dinhmun leh MNF Ministry hi lo piang leh ta leh hlawhtling ta kan ni."

"Tin, a bik takin Gen. Hqrs. Media & Publicity, IT (Tactical Room) member zawng zawngte chungah lawmthu ka sawi tak meuh meuh bawk a ni."

"Pathian leh kan Ram tan ka theihna zawng zawng hi ka bial leh Mizoram, Zofate tan hman ka tum tlat a ni."  Writer: Sp-a Jongte

Post a Comment

Powered by Blogger.