EDUCATION SERVICE SIAM A NIH THEIH NAN HMA KAN LA DAWN - ZIRTIRTU INDAIHLO SEMRUAL KAN TUM

EDUCATION SERVICE SIAM A NIH THEIH NAN HMA KAN LA DAWN - ZIRTIRTU INDAIHLO SEMRUAL KAN TUM


MZP PRESS RELEASE
21st December, 2018

Vawiin 21st December, 2018 Chawhma dar 10:30 khan Pu Lalchhandama Ralte School Education Minister room-ah MZP hruaitute leh School Education Minister Pu Lalchhandama Ralte kaihhruaina in meeting neih a ni.

Meetingah hian School Education Minister leh MZP hruaitute hian inpawh tlang takin Mizoram Education siamthat dan chungchang sawiho a ni a, hun remchang hmasa berah meeting neih ho leh tura ruahman a ni bawk a ni.

Meetingah hian zirtirtu semrual chungchang te, Mizoram Education Service siam chungchang te, School Education Directorate pahnih(Elementary - Secondary) a thenhran chungchang te, CCE ennawna siamthat chungchang te, National leh State level a zirtirtu chawimawina dawng te hamthatna dawn tur chungchang te, School timing chungchang te, Hostel rules chungchang leh School fee chungchang te sawiho a ni.

Mizoram education Service siam dawn

EDUCATION SERVICE SIAM A NIH THEIH NAN HMA KAN LA DAWN - 
ZIRTIRTU INDAIHLO SEMRUAL KAN TUM

School Education Minister Pu Lalchhandama Ralte chuan, "Mizoram hmun hrang hranga zirtirtu indaihlohna kan sorkar in a hria a, kumthar School session tan hmain zirtirtu semrual hi a theih chen chen tih kan tum dawn a, hemi chungchangah hian MZP te nen pawh kan tan ho a tul dawn a theihtawp min chhuahpui turin ka ngen che u a ni, a ti. Mizoram Education Service siam pawh ka vei thin a ni a, Mizoram Education Service siam a nih theih nan theihtawp ka chhuah dawn a MZP leh Sorkar kan tangtlang anga Mizoram Education Service kan siam ngei theih ka ring a ni" a ti bawk.

Pu Lalchhandama Ralte chuan "School Education Directorate pahnih(Elementary-Secondary) a then hran hi kan School Education siamthat nan hian a pawimawh dawn hle a, harsa deuh pawh nise kan tantlan chuan kan ti thei ang, School Education Directorate pahnih(Elementary-Secondary) a then hran a nih theih nan theihtawp kan chhuah ho a ngai a ni" a ti bawk. CCE ennawna siamthat chungchang pawh sawiho a ni a, zirchiana siamthat a nih theih nan hmalak a tum thu a sawi bawk a ni. National leh State level a zirtirtu chawimawina dawng te hamthatna dawn thin State dang te dawn ang Mizoram a zirtirtu chawimawina dawng ten an dawn loh thin chungchang sawiho a ni a, Pu Lalchhandama Ralte, School Education Minister chuan lo enzui sak an tum thu a sawi a ni.

School timing chungchang sawiho a ni a, School timing sawn hma leh sawn tlai chungchangah hian la sawiho a, zau zawk a inrawn khawmna siam nise tia sawi a ni. Hostel rules chungchang leh School fee chungchang pawh sawiho a ni a, Minister chuan Hostel rules leh School fee khairual a nih theih nan Sorkar chuan chak takin a bawhzui dawn a, zirlaite tana tha ber turin Sorkar in hma a la dawn a ni a ti bawk.

School Education Minister Pu Lalchhandama Ralte hi Pu C.Lalmuanpuia MLA, Pu Lalrinsanga Ralte MLA leh Pi Esther Lalruatkimi Secretary School Education ten an tawiawm a, MZP hruaitute hi Tv. L.Ramdinliana Renthlei, President ho in hruaitu thahnem tak an tel a ni.

(H. LALTHIANGHLIMA)
Asst. General Secretary

Post a Comment

0 Comments