Zin Loh Bill A Lâk Vanga Court-in Kum 3 Tâng Tura A Chungthu A Rèl Ex-MP Lalhmingliana'n COURT THUTLÛKNA A KHINGLÊT DAWN

Ex-MP Lalhmingliana Court-in Kum 3 Tâng

Mizoram aṭanga Rajya Sabha Member (MP) hlui Lalhmingliana chu thlawhtheihna ticket (air ticket) lem hmanga travelling allowance là (re-imburse)-a puhna thubuaiah thiamloh chantir a ni a, Delhi Court chuan kum thum chhûng tâng tur leh ₹ 11,00,000 chawi turin a ti. Lalhmingliana chuan Court thutlukna hi a khinlêt tur thu a sawi.

Lalhmingliana chuan Court thutlukna hi a khinlèt dawn thu sawiin, "Kârleh hian Delhi-ah ka chhuk thlà ang a, thil ṭul ang angte buaipuiin ka khinglèt ang," a ti.

Lalhmingliana chuan thubuai a neih hnuah ukilte ruaiin an buaipui ve reng tih a sawi a, a ukilte nena an inbiak reng thu sawiin, "Thil dik lo hai chhuah tur an hmuh loh thu min hrilh reng a ni. Chutiang a nih laia hetianga thutlûkna a lo awm ta thut mai hi kei pawhin mak ka ti hle a ni," a ti a, an puhnaah hian tih dik loh neia a inhriat loh thu a sawi.

A thubuai ngaihtuahna hmun an sawn thut nia sawiin, "Ka thubuai ngaihtuahna hmun hi an thlâk thut a, case history engmah hre loin thutlûkna a siam a ni. Thil dik tâwk lo a awm thei em, tih ka ngaihtuah a ni," Lalhmingliana chuan a ti. - CT Sangtea

Post a comment

Powered by Blogger.