KRISMAS LAWMNA RUAI THEH - KOHHRAN RUAI THEH - TIMES OF MIZORAM

Breaking

Home Top Ad

Post Top Ad

KRISMAS LAWMNA RUAI THEH - KOHHRAN RUAI THEH

LAWMNA RUAI THEHKrismas lawmna kalzelah vawiin khan District hrang hrangah Kohhran tam zawkin ruai an theh.

Aizawl khawpuiah chuan Kohhran hrang hrangin boruak muanawm tak hnuaiah hlim takin Krismas ruai an kilho a. Krismas ruai buatsaih hian tukin khawvar tirh atangin Kohhran mipuite an hnatlang a, ran hrang hrang bakah thlai leh ei tur dang hrang hrang an buatsaih a ni.

KRISMAS LAWMNA RUAI THEH - KOHHRAN RUAI THEH

Aizawl khawpuia Damdawi In leh Home hrang hrang awmna vengte chuan an huamchhunga damdawi ina damlote leh damlo awmpuitute tan bakah Home-a awm leh a thawktute tan ruai an buatsaihsak a; Office țhenkhata duty-te pawh sa an suah bawk.

Lungleiah pawh Kohhran hrang hrangten vawiin khan Krismas lawmna ruai an theh a.
Ruaitheh nan hian Kohhran engemawzat chuan tunhma deuha hman thin Disposable plate leh no aiah Steel thleng leh no an hmang uar a, hei hi thil tawihral hleithei loin Environment a tichhe zel tur venna atana hmalakna kawng khat a ni.

Kohhran hrang hrangte hian ruai atan Bawng, Vawk leh ar bakah arsa leh artui te an siam a, thlai chauh ei thinte tan bik pawh ei tur siam a ni.

Lunglei khawpuiah hian Kohhran thenkhat chuan chawhma lamah Pathian biak inkhawm pangngai an nei a, zaikhawm ringawta hun hmang an awm bawk. Damdawi in leh Police station awmna veng Chanmari leh Venglai Kohhran te chuan kumdang ang bawkin dam lo leh a awmpuitute tan bakah Police duty te tan sa an suah leh a. Ruaitheh zawhah kum dang ang bawkin Pukpui leh Kawmzawl lamah lirtheia leng thalai an thahnem leh hle a ni.

Lawngtlai District chhunga Krismas hmanna kalzelah vawiin khan Kohhran tam zawkin Krismas ruai an theh.

Niminah Kohhran engemawzat chuan ruai nen Krismas hi an lo lawm tawh a, nimina ruai lo theh tawh vawiina chhunzawm pawh an awm nual a; Kohhran tam zawk erawh chuan vawiin khan ruai siamin Krismas hi an lawm a; chhun lamah Krismas zaikhawm te neiin, Pathian thu leh hla hmangin Kohhran hote an inpawlkhawm a, tlaiah Krismas lawmna ruai hlimtakin an kilho a; nizanah pawh veng thenkhatah chuan zan rei tak thleng Krismas lengkhawm zai thawm hriat tur a awm a, District chhung boruak a muanawm a, thil duhawmlo lian tham thleng hriat tur a awm lova, zan lam ah Young Lai Association an duty reng bakah Lawngtlai Police te chhun zan zawmin an duty bawk.

Siaha-ah pawh niminah ruai nena hlim taka Krismas lawm a nih hnuin vawiinah pawh Kohhran tam zawk chuan ruai nen an lawm leh a, nilenga Pathian hming fak leh chawimawina neih a nih hnuah ruai kilho leh a ni.

Kohhran thenkhatah nimin khan thihna avanga Kohhran program khaihlak deuh a awm a, vawiinah pawh thihna avanga program duan lawk anga kal thei lo an awm bawk. Kohhran boruak a thain zaikhawm boruak pawh a nuam hle a, khawtlangah harsatna lian tham thleng a awm lo bawk.

Mamit khawpui chhunga Kohhran hrang hrangte pawhin vawiin khan Lal Isua piancham lawmna ruai an theh a, Kohhran thenkhatte erawh chuan nimin lamah an theh tawh avangin vawiinah an theh ve lo thung.

Kolasib-ah pawh Kohhran hrang hrangten Christmas ruai an theh a, boruak a nuamin harsatna thleng a awm lo. ~ PTCs/AIR

Post Bottom Ad