SORKAR THAR THLIRNA - He Thuziak Chu Mitin Chhiar Atan A Va Tha Em



David Sailo 26th December

Mizoram ministerRINLOH MAWHPHURHNA -

Mawhphurhna hrang hrang an han siam rem a, mipui nawlpui rin loh tak taka thil kal a awm nual. Kum 4 tling zawn tawhte an Speaker a, vawikhat tlinna an Minister nawlh bawk a, Opposition laia tling ve ngar ngarte an Deputy Speaker bawk a. Heng zawng zawng hi Remruattua ruat a ni tih pawm mai a ngai a ni.

Engineer a nih avanga Engineering lam Department chang tura ngaih tlat te, Doctor nih vanga Health nena hmeh bel mai te, Lehkhathiam tak nih vanga Education chang tura ngaihna te kan nei thum hlawm a, awm pawh a awm ve viau mai. Mahse ngaihtuahna lehlamah chuan a lo tha ber hauh lo. State danga Education chang tura lehkhathiam ni miah lo an dah tlat thinte hi ka hrethiam ve uar uar tawh. Central a BJP Sorkar hlim pawh khan pawl 12 chauh pass a an sawi Smriti Irani kha Education (MHRD) an chantir ve mai bawk kha.

FAKNA/SAWISEL HMA LEH TLAI A AWM LO

Sorkarna an siam tan atanga langsar ta ber chu MLA/Minister te zingah Pu Robert Romawia, Pu ZR.Thiamsanga te Two Wheeler hmangin an hun pawimawhah an kal tih kha a ni. Hetiang deuh hian Dy Speaker chu a Bike tawng tawh lam nen a la vei lauh lauh an ti bawk. Hei hi thil ropui takah kan ngai a, a chhan chu MLA an nih tawh chuan anmahni zuitute nen lam hian an tawh a lo khirh thang tawh a, hetiang an ti ta mai thil ho lam taka ngaih theih ni mahse fak an hlawh viau pawh hi a mawh love.
Mizoram minister
Fak nan a la hma lutuk ti pawl tan pawh thil tha chu faka chawimawi dan zir mai a tha a, an dik lo thuai a nih pawhin selna hmachhawn ngamtur khawpa tuang chhah thlan chhuah an ni tih hria in sel hreh lo bawk ila.

KUM A THAR ANGA -

2019 ah Office an han luah sang sang a, October/November vela Campaign laia thahnemngai taka beihpuitute an rawn lang tiam tiam ang. Block, Group leh Unit hruaitute nen. Chhungkhat laina te nen an bathlar thlengin kan zi leh mup mup dawn a, lal ropui takah mipui zawk hian kan siam leh dawn a ni. Hetiang taka mamawhtu, tlawntu hi ther huang thin lo ila chu an VIP dan pawh a nep mahna le.

An bialah an tlin lawmna an nei sang sang anga, pawl lehlam tana awm nuam lo rawk khawpin ke an pen leh ngei ang. Hetiang hunah hian inzawn luk luk te, Parthi awrh sen loh te, chawimawina thuziak(Citation) khawi khawchhuak eng eng emawni ten pek phet kan tum leh anga. Term hmasa a Minister pakhat chuan thuziak min pek ringawt hi Buara 2 khat tlatin Kudamah kan dah a ti. Tlaktlum tum hian insawiluh leh infak tlawr lamah phe suau suau lo ila, Sorkar danglam te pawh a beisei awm deuh mahna. A mipui bawk hi a ti lal em em tu kan ni leh fo thin.


FATU A NÊP -

MLA thenkhat an lawina Kohhraah Fatu ah an tang a, an thlalak ngaisang takin kan ti darh chuai chuai a, Kohhran kawra hmanna dik tak a ni. MLA pawh nise Kohhranah MLA Post a awm ve lova, an ruatna anga an tihhlawhtlin mai kha an tih tur a ni. An fatu tak avang khan an mawhphurhna zawk ram hruainaah chhete mahin hmathar kan kai phah lova, an lawina Kohhranah chuan fatu tura ruat awm tawk tak an ni tihna a kawk mah zawk a ni. Kohhrana hunpui chang pha, Kohhran ban tak tak awm fumfe lovin a fatu chi hlir an ni ang tih mah hlauh nak lai a!!

A BUL TAN TLUKIN A TAWP KHARNA -

Bul tanna ah hetiang hian VIP lirthei thlauhthla duh an awm ringawt pawh hian lung a kuai tlang a, 2021 kum tawp lam thleng hi thlir pha se hetiang dinhmun hi ni chho zel thei se a duhawm ngawt mai. Sorkar hmasa ah khan mittui nen bul kan tan a, pu ber danglam hmuh kan in beisei a, mahse LALNA chan meuh chuan beisei ang a ni leh thin lo. Bul tan that kan thiam a, a tawp khar dan dik kan zir tello thin. Heng thil tha ni a an hriat bul tanna atana phur tak maia an hman hi a tawp khar chhoh nan pawh a tlak viau a ni tih hre thar leh ila, Sorkar tha TLUANTLING nei turin kan thlan chhuah ten hma la se a duhawm ngawt mai.

TLIN LEH TLAK KAR -

Vote 3 leka chak Tuivawl bialtu kha Minister a ni ta mai a, Vote thum leka chak lo kha Bhavan khawhar nghaktu a nih a ngai ta bawk a. Tlin leh tlak kar a hla viau a, kan lal viau a nih pawhin Pu Zorama te, Pu Hawla te ruat zui zel theih kan ni lova mipui thuneihna bawka paih thlak theih kan ni tih lai hi a taka nunpui an mamawh ber. Vote tlak dan en mai chuan Sorkar tha lo chu kum 5 hnu ah pawh kan paih hreh dawn tawh lo tih a lang reng a nia!!

Post a Comment

0 Comments