MANIPUR-A RAWNG TAKA RAN THAH A NIH CHUNGCHANGAH CM-IN HIGH LEVEL MEET A KO
Thawhtanni khan Manipur Chief Minister N Biren Singh chuan Wildlife Institute of India(WII) lama mithiamte leh State Forest Department lama officials-te nen high level security meeting neiin he hunah hian tunlaia ran thahna thleng mek chungchang chu an sawiho.
Hetianga thla hnih kalta atang tawha an ran vulhte beih a’n nih chhoh tâk zel hnu hian tunhnai deuh khan news site hrang hrangin a tarlan danin hmeichhe pakhat chu Dec 1st zan dar 6:30 velah khan Imphal East-a Khurai Heikrumakhong ah eng sa nge a nih hriat lohin a inthiar tur chu a bei(allegedly) a. JNIMS, Imphal-ah enkawl niin report atanga a lan danin a bânah hamna(scratch mark)hnuhma niawm hmuh a ni.
Heng thil thleng zozai avang hian mipui an raltiin an chiai hle a, a huhova duty-te insiamin a thenin he thila a mawhphurtu nia an rinhleh ramsa thenkhat(keite/sanghar lam) chu thah tumin silai leh hriamhreite nen an veh bawk a. Heng thil avang hian mi tam takin zan an chhuah ngam loh phah a, a thenin he pawikhawihtu ramsa hnawh kian nân halpuah te an hal bawk a.
Hetih lai hian CM Biren chuan mipuite chu chiai lo tur leh he thil chhuia zirchiang tur mithiamte an lo thlen tawh thu a hrilh a. Tin, CCTV camera leh thang te kam a nih thu a sawi bawk.
He thil chhuitu WII leh Forest Dept. lama officials-te chuan Zirtawpni khan Chingmeirong ah kalin he pawikhawihtu ke hniak leh êk nia an rin te chu lain an zirchiang a. Tuna a lan danah rih chuan heng pawikhawihtu hi Candidae family lam(ui,sihal, chinghnia, ram ui etc) emaw Cat(keite,sanghar, sazaw etc.) lam a nih an ring a ni.
Hetih lai hian hmun thenkhatah chuan pawikhawihtu ramsa nia rinhlelh hmuh nia report a awm nual a. Imphal East lama Khongman leh Pebiya Pandit Leikai inkâra leilet buh hmunah pawikhawihtu nia rinhleh ramsa an hmuh thu dawn a nih hnuin hetah hian he sa hi khaw chhung mite’n an chang/veh a. Thu dawnna pakhatin a tarlan danin Ragailong khuaah ramsa pahnihin vârak seh an tum lai chu tualchhung mite’n hmufuhin a bul Lampak Sports Complex lamah an um lut a, amaherawh chu an man hman ta lo a ni. Heng ramsa pahnihte kehniak nia an rin te chu Bangaluru, ATREE lama scientist, hetiang ramsa lam zirchiang mi Dr. Abi Tamin hnenah zirchian tura thawn a nih hnuin Dr.Abi pawh hian an sa rinhleha hi cats(sanghar,keite, sazaw etc.) family lam a nih a ring ve tho a ni.
Heng bakah hian Bishnupur District, Toubul Bazar bula in pakhatah chuan ramsa, eng sa nge a nih hriat chian loh pakhat chu mi inah lûtin, report an dawn hnuah Forest Dept. Officials, police leh tualchhung mite’n man tumin an bawh zui nghal a, amaherawh chu an hlawhchham a ni. Chutihrual chuan he inchhunga chhuat carpet-ah hian ramsa tina(claws) hamna ni ngei tura ngaih hnuhmâ(scratch marks) hmuh a ni.
Heng boruak kârah hian social media velah mipui tichiai zâwng leh ramsa humhalh ngai thenkhat(endangered animals) te tâna pawi thei tur thuthang dik lo vawrh darh a tam avangin State Police Dept. cyber-wing te chu hemi kaihhnawiha thudik lo vawrh darhtute manchhuak zung zung tura thupêk an ni.
Source- Northeast Now
The Sagai Express
Post a Comment