ASSEMBLY-SPEAKER LALRINLIANA SAILO : MNF-in Assembly Speaker atana an vawrh chhuah minister hlui Pu Lalrinliana Sailo chu chuhtu awm lovin speaker atana thlan a ni.
Tukin dar 10 leh a chanve a tan tur Assembly pariatna inkhawm hmasa ber ni khatna-ah hian Assembly Speaker thar thlanna buatsaih tura duan a ni a. Mahse, hming pekluh theih hun tawp, nimin tlai dar 3 leh a chanve thlenga hming pelut dang an awm loh avangin chuhtu an awm ta lova. ZPM leh Congress party hruaitute chuan chuh leh chuh loh tur thu an ngaihtuah lo hrim hrim niin an sawi. Hetiang a nih tak avang hian Pu Lalrinliana Sailo hi speaker a nih thu Assembly House chhungah puan a ni ang. Hemi hma hian November ni 28 assembly inthlanpuia thlan tlin tharte thutiama lakluhna hun hman a ni ang a, Protem Speaker Pu Lalrinawma’n rinawmna thu a tiamtir ang. MNF ticket a Tuikum bial atanga thlan tlin Pu Lalrinawma hi Inrinni chawhnu khan larsap Pu Kummanam Rajasekharan chuan Protem Speaker atan thu tiam tirin a lo la lut tawh a ni.
Naktuk, assembly inkhawm ni 2-naah chuan larsap Pu Kummanam Rajasekharan chuan Constitution-in a phut angin House chhungah thu a sawi ang a. A thusawi chunga lawmthu sawina motion hi rorellai MLA pakhatin pulutin a tuka sawiho tura dah a ni ang. Inkhawm ni hnuhnung ber Naktipah chuan Prime Minister hlui Atal Bihari Vajpayee, Pu Chawngzuala leh Pu S. Laldingliana te sunna hun hman a ni ang a. Larsap thusawi chunga lawmthu sawina motion sawi hovin pawm tura ngaih a ni a. Deputy Speaker thlanna buatsaih a ni bawk ang.
Vawiin chawhma Dar 10:30 a Mizoram Legislative Assembly pariatna thukhawm hmasak ber tan ni-ah chuan officer senior zawng zawng kal vek tura hriattir an ni.
Sorkar thuchhuahin a tarlan danin assembly inkhawmah hian Pricipal Secretary/ Commissioner/ Secretary leh Department hotu ber zawng zawng te chu kokim taka tel vek tura ngen leh hriattir an ni a. Assembly session chhim tur official te chu, a tlai berah session tan hma minute 5 a la awmin an thutna turah thu fel hman vek tura beisei an ni.
Hetilai hian Mizoram Pradesh Congress Committee (MPCC) ticket-a tun assembly inthlanpui a tling MLA 5-te chuan nimin khan Congress Legislature Party (CLP) dinin an leader atan Minister hlui Pu Zodintluanga an thlang.
CLP leader atana thlan Pu Zodintluanga hi term thum, kum 15 chhung, zet CLP Treasurer hna lo chelh tawh a ni a. Deputy leader atan Minister hlui Pu C. Ngunlianchunga, Treasurer atan minister hlui Pu Nihar Kanti Chama, Secretary atan Pu K.T. Rokhaw leh Whip atan Pu Lalrindika Ralte te an thlang bawk a. CLP inthlan hi AICC Observer Pi Ampareen Lyngdoh chuan a hman pui a ni.
MLA 8 nei ZPM pawhin hemi hma lam hia Legislature party an lo din tawh a. ZPM Legislature party leader hi Pu Lalduhoma a ni a, Deputy Leader chu Pu Vanlalhlana niin Secretary atan Dr. Vanlalthlana chu thlan a ni bawk.
Tuna a lan danah chuan eptu party zinga MLA ngah ber Pu Lalduhoma hi Opposition group leader tur a ni dawn. - AIR
Post a Comment