MI CHHUANAWM DR. RAMDINMAWIA Ph.D CHANCHIN TLANGPUI

RAMDINMAWIA Ph.D CHANCHIN TLANGPUIVAPHAI TLANGVAL DR. RAMDINMAWIA Ph.D S/O PU VANLALNGAIA CHANCHIN TLANGPUI 

January 31, 1987, Inrinni zing dar 8-a piang,(Tunah kum 29 a nih chu.) a pu Thanhleia (L) in Lalramdinmawia (Mawitea) tia a hming a phuah hi, a unau zinga a upa lam atanga chhiara 5 niin, unau mipa 5 leh hmeichhia 4 a nei a ni.

Kum 1993 Class I zirin vaphai P/S III ah a lut tan a. P/S a zir zawh hian Vaphai Border M/S ah a lut a, Class VII Board Exam ah tha takin a pass a.

Kum 2000 khan Class VIII zir turin Govt. Chhaktiang High School Vaphaiah a lut a, exam apiangin a tichhe ngai lo hle a, class VIII a zirlai hian 1st term examah tuna a subject lak, maths ah hian marh 'O' (zero) a lo hmu ve tawh a ni. Kum 2003 khan HSLC chu 1st division ah pass in, Science ah letter a hmu a ni. High School a kal lai hian Class IX a nih atangin CBSE Course hman tan a ni a, zirtirtute pawh an subject ah an inzirchawp a ngai a. English phrase leh Maths ah zirtirtute harsatna a solve sak hmiah mai thin a ni. Bawng a kaih chang te, khawlai a len changte hian sign board/hoarding tara english word a hriat lohte a chhinchhiah a, lehkha thema a hriat lohte ak thain inah dictionary nen a zir thin a ni. 

Lehkha a zir ngawrh thei hle a, khuma a lehkha zirnaah a chhungten chaw an pek chang a awm thin a ni. Exam hmain tan a la a, exam tak takah hi chuan hrisel taka a exam theih nan a chawl hahdam thung a, ennawnna hunah a hmang thin. Mak ve tak chu, HSLC khawbunga a exam khan mi thirsakawr a chuang ru a, zawlseiah te a lo zu leng mai mai thin. Parade leh game a peih loh thin avangin sikul tlanbo chang a nei a, BRTF kawnglai a enru daih thin.

Kum 2003 atangin Baptist Higher Secondary School, Serkawn, Lungleiah Class XI leh XII a zir a, HSSLC chu kum 2005 khan tha takin a zo leh a ni. Higher a kal lai hian Beihrual kalkim lawmman a la a, zing tawngtai inkhawm a hlah mang lo va, Holy Bible Mizotawng leh Saptawngin vawi engemaw zat a chhiar chhuak a ni.

Kum 2005 atangin PUC, Aizawlah B.Sc. a zir chhunzawm leh a. B.Sc. a zirlai hian an collage ah pakhatna a ni satliah mai a ni lo va, a pass tha thei em em a ni. B. Sc. a zirlai hian break an neih hlekin collage library ah lutin, English thuhlaril hi a buaipui a, a chhiar ngat ngat thin. B.Sc. 2nd year a zir atangin Khawbel tlangval a zirpui nen Republic ah in an luah a, class inkalchhawkin, a kal lo zawk zawk an inhlawh thin a. Zanah class kal zawk hnen atangin an zir an inhrilhtawn mai thin. Krismas chawlhah a haw ve duh lo va, an collage bul kawrah buk sualin, eirawng a inbawl a, khawnvar eng hnuaiah a thiante chawlh hman laiin lehkha a lo zir ngat ngat mai zel a ni awm e. Private English Medium ah te pawh a inhlawh pah thin ani. B.Sc. ah hian exam apiangin a top a ni ngei ngei thin a ni.

Shillong ah M.Sc a zir chhunzawm khan thla khata Rs. 6,000 hlawh theihna a exam a, a zirpui zingah exam ngam awm chhun a ni a, a tling chiang ngei mai. Lehkha zir phah chuan Delhi a a test a tlin avang chuan M.Sc a zir chhung zawng thla tin Rs. 6,000 a hlawh ta thin a ni. M.Sc a zir chhung hian topper a ni ngei ngei thin a. M. Sc. a chhuah hian NEHU pumpuiah pakhatna a niin thin a, M.Sc. a zawh rual hian CSIR-UGC NET (Maths) ah exam beiin, India rampumah pakhatna a ni ta hial a, M.Sc. a chhuah kum 2010 khan NET a India rampuma pakhatna a nih avang hian Vaphai Br.YMA pawhin chawimawina an lo hlan tawh a ni.
Kum 2010 a M.Sc. tha lutuk maia a pass avangin ramdang University pathumin institutiona Ph.D zir turin an sawm a, France a thlang a, Universite Lille 1 - Sciences ET Technologies, Villeneuve d'Ascq, France ah a kal a, a kum 5 na a lo her chhuah meuh chuan a Mathematics Subject a a thesis ziah ropui tak, " FONCTIONS DE HARDY DES SERIES L ET REPARTITION DES NOMBRES PREMIERS EN PROGRESSIONS ARITHMETIQUES" avangin a kalna University chuan Ph.D degree ropui leh hlu tak chu an hlan/pe ta a ni. Class VIII term exam a maths a mark bial hmu chuan a lehkha zir hun tawp lamah chuan a hmingthanpui ta a ni. Mawitea hi tunah Allahabad ah University a thawh hlawhin research a bei a, chumi chungin kum 5 dang a zir belh leh phawt dawn a, a duhtawk tawh angem tih chu Pa chauh lo chuan tuman amah pawh telin an hre kher awm lo ve???

A kalna University hming leh a thesis ziah bak a sawi tha duh lo va, a zir zawh hmaa lo intlangzarh vak hi a duh lo ni berin miten an ngai a, a chapo lo lutuk hi mite mak tih a ni fo. Lehkhabu ban mai theiha thutna bula awm chu a keu ngei ngei zel a, mut hma leh hunawlah lehkha chhiar lovin ka hmu ngai lo. Mizo inthlahchhawn dan History, B.Lalthangliana ziah hi Aizawla a awm chhunga a chhiar thin chu a ni. Thingpui, 'phan' an tih hi a ngaina hle a, a in zawh rualin a lum leh nghal a ni ber zel a.

France a a awm lai khan a nu leh pa hnathawh a phal tawh lo va, an mamawh tawk zelin a rawn phuhru mai ni awm tak a ni.
M.Sc. a zawh hlim khan a chhungten an chhungkaw harsat chhuanlamin IAS exam ve mai turin an ti niawm tak a ni a,"IAS chu ni duh ila hmanah ka ni tawh ang" a ti heu mai. Eng tak a thil tum ni ang maw ?

Ph.D a zawha Aizawl a lo chuan chhuah khan I&PR Deptt-in an kawm a, chuta mawitea zawhna dawn tul lo a tih ber leh nin ber a sawi chu, "Nupui I nei tawh em?" tih leh, "Eng hna nge I thawh tawh" tih hi a ni awm e. IPRO Mamawiin mak a tih thu mi lo hrilh nasa mai.

Sawi zawh sen a ni lo, a chanchin tlangzarh hi a hlau miau si a, a chhungte min hrilh theih chin leh kan hriat theih chinte kan rawn share che u a ni e.

Amah hi Pathian tih em em, Bible inchhawp reng mai, inkhawm thulh ngailo, nu leh pate thu awih tak a ni.

France atanga alo haw pawh, "Khawnge I awm kha?" tia pa hovin an zawh pawn Feren-ah ati mai. Mizo tawng dik taka tawng thin mi, inti changkanglo tak, inngaitlawm tak a ni.
Franch-English-Mizo Dictionery pawh a siam nghe nghe.

- Gilbert Renthlei
Lunglei chanchinthar

Post a Comment

0 Comments