Mizoram Guv thusawiTualchhung Chanchinthar: Larsap Pu Kummanam Rajasekharan chuan India ram leh khawvel hmun hrang hranga Mizote chu India Constitution phal china an insuihkhawma an inunauna atan a sorkar chuan hna a thawk dawn niin a sawi.

Vawiina Assembly a thu a sawinaah Pu Rajasekharan chuan Mizo mipuite thinlunga hnam leh nunphung lama harhtharna a awm lai takin sorkar thar lakluh a ni a ti a. Mizoram sorkar chuan Mizo nihna ziarang leh hnam nunphung bakah tlawmngaihna a vawng nung tlat dawn a ni a ti a. Hmasawn chak taka ngaih Mizoramah hian muanna boruak tha tak a awm reng chu a sorkar ngaih pawimawh ber a nih thu leh chu chu hmasawnna atana pawimawh a nih thu a sawi a. Mizoram ramri humhalh turin khauh taka chet a nih dawn thu leh ramri a awm mipuite chu hmasawnna kawngah ngaih pawimawh an ni dawn a ni a ti a. Ram mi dik tak hriatna atana khawtina chengte chhinchhiah an nih dawn thu leh Mizoram tana nunna hlantu chhungte pualin ruahmanna hranpa duan a nih tur thu a sawi bawk.

A sorkar chuan lang tlang leh mipui tana thawk, eirukna awm lohna sorkar din a tum dawn tih sawiin Vigilance Commission/Lokayukta din tura chak taka hmalak a nih tur thu leh thuneihna semzai zawnga hmasawnna tichak tura sorkar a kal dawn thu Larsap chuan a sawi.

A sorkar chuan Socio-Economic Development Policy (SEDP) a kalpui dawn thu leh hei hi a hma thei ang bera kalpui tum a nih thu a sawi a. Mizoramin a thar leh siam chhuah theih tur ang chi hrang hrangah nasa taka hmasawnna kawng zawh tura tan lak a ni dawn a ni a ti a. Ram pum mi tin sum lakluh zat aia tam lalut thei tura theihtawpa tan lak a nih tur thu a sawi bawk.

Pu Rajasekharan chuan hmasawnna hna thawhna kawngah hian sorkar hmasa thiltih thate chu harsatna engemaw tak a awm a nih loh chuan chhunzawm a nih tur thu a sawi a. Mirethei leh pachhe zawkte hmakhua ngaih pawimawh a nih rualin hmasawnna ruhrel leh hmasawnna atana ruahmanna te chu state thanna atan ngaih pawimawh a ni tho dawn a ni, a ti. Kawngpui tha chu hmasawnna a kal chak theihna’n a pawimawh a ni a ti a. A sorkar chuan kawngpui siamthat hna a thawk vat dawn thu a sawi a. Tunah hian PWD ten National Highway 11 km 1465.938-a thui an enkawl mek thu tarliang project kallai 22 awmin km 827.20 thui niin a lian zual te chu Kaladan Multi Modal Transit Transport Project,NH-44A saim that leh Serkhan - Bagha kawng tihchangtlunte anih thu a tarlang a. World Bank Projetc-in kawngpui len khatte chu len hnihah tihchangtlun a tum thu sawiin Heng zingah hian Chhumkhum – Chawngte road, Champhai - Zokhawthar road, leh Tlabung – Kawrpuichhuah road-te pawh an tel thu a sawi a. Lengpui |umhmun tih changtlun leh Tumhmun dan siam a, ram hmun dangte nena intlawh pawhna atan lui hmanga inkalpawhna lam thawh a nih tur thu a sawi.

Kawlpheta lama intodelh chu sawrkarin a ngaihpawimawh thu Governor chuan sawilangin Tuirial Hydro Electric Project hman theih tura peih thuai a ni dawn a ti a. Tuivai Hydro Electric Project-a kawlphetah megawatt 210 pechhuak thei tur siam turin Mizoram sawrkar leh North Eastern Electric Power Corporation (NEEPCO) ten thawhdunna thuthlung Memorandum of Understanding pawh an ziah tawh thu a sawi a. Heng bakah hian ni zung chakna hmanga kawlphetah siamchhuah chu ngaihpawimawh a nih thu sawiin district khawpui tinte chu solar city-a siam tum a ni a ti bawk. Rualkhai zawka kawlphetah semchhuah a nih theihna turin hma lak a ni a ti bawk.

Governor chuan entrepreneurship lamah Mizoram chu India rama state tenau zinga hmasawn chak ber anih thu tarlangin Thalaiten eizawnna kawng hrang hrangah hmasawnna an neih theihna turin kawng hawnsak a nih tur thu leh lawmman tha tak tak pek tum a nih thu leh anmahni thuamchak tura programme kalpui a ni ang a ti a. Thaliten mahni ke a eizawnna din leh sumdawnna kawngah ramchhung mai nilo khawvel huap pawha inelna an hmachhawn theihna turin training leh thiamthil tihmasawnna turin awareness programme te ngaih pawimawh a nih tur thu a sawi bawk. 

Sawrkarin Mizorama chu India rama state fai ber ni tura hma a lakna chu chhunzawm zel a ni ang a ti a. Kum 2019-ah chuan khawpui lian, khawpui te leh thingtlang khuate chu chenna hmun fai berah siam a tum tih a sawi a. District tinte pawnlera inthiar awmlohna Open Defecation Free (ODF)-a siam kawngah Mizoram chu a hlawhtling hle a ni a ti a. Asian Development Bank puihnaa North Eastern Region Capital Cities Development Investment Programme (NERCCDIP) hnuaia hmalakna chu Aizawl khawpuia tui supply, thli paihna leh bawlhlawh sawngbawlna a tihhmasawnnaa hmanraw tangkai tak ani a ti bawk. Public Health Engineering Department ten Swachh Bharat Mission (Gramin) an kalpui chu programme pawimawh berte zinga mi a nih thu Governor chuan a tarlang bawk a ni.

Sawrkarin mi harsa leh puih ngai zawkte chhawmdawl turin welfare programme leh hna tam tak a thawh tur thu sawiin ruihhlo, zu, hmeichhia leh naupanga sumdawnna, kumtlinglo danbawhchhiatna leh insiamthatna hmun din turin home leh pawl engemawzat thawhpui a tum a ti a. Election Manifesto-a tarlan angin january ni 15,2018-a hman tan The Mizoram Liquor (Control & Prohibition) Act, 2014 chu tihtawp a ni ang a ti bawk.

Khualzin hip kawngah Mizoram sik leh sa leh ram mawi takin theihna lian tak a neih thu tarlangin Pu Kumanam Rajasekharan chuan Mizoram chu khawvel huap pawha adventrue leh eco-tourism lama tui mite tana tlawhpawh theih tura siam a tum thu a sawi a. Hemi tur hian State Institute of Hotel Management hawn tum a nih thu leh state chhunga khualzinte chawlhna tur hmunte tihchangtlun a ni ang a ti bawk. -AIR

Post a comment

Powered by Blogger.