TUALCHHUNG CHANCHINTHAR - EDUCATION MINISTER LEH SIKUL TAN HUN (NEWS COMMENTARY) - TIMES OF MIZORAM

19 Dec 2018

TUALCHHUNG CHANCHINTHAR - EDUCATION MINISTER LEH SIKUL TAN HUN (NEWS COMMENTARY)

EDUCATION MINISTER LEH SIKUL TAN HUN - MIPUI RORELNA HI KAN HRETHIAM EM? 



Kan Education minister thar Pu Lalchhandama Ralte hi sorkar hmasaa Education Minister puitu ber Pu Joseph Lalhimpuia nena inhre tha tak an ni a. Shillong-a zirna insanga an zirlai atanga tiho tawh an ni. Khati khawpa inthurual si kha engvang nge school timing chungchangah hian an ngaihdan a inanloh tih hi zawhna lian tak pakhat a ni. Pu Chhantea tanna lam hi a tha vek e tih emaw Pu Mahima tanna lam hi a diklo hulhual tihna lam nilovin Pu Chhantea hi chuan an party in an lo tlangaupui tawh ang khan kan khawsak dan pangngai mila sikul tan hun kan hman thin kha hman a nih lehna turin hma a la vat tura ngaih a ni a, hei hi mipui tam zawk duhdan pawh niin a lang.

Sikul tan hun hma emaw tlai hrim hrim hi a thain a thalo hran lova, a thenah chuan tan hma te kha a thatna lai a awm a. Tan tlai (tlai tih lemah a hmaa kan tan hun) pawh a thatlohna a awm chuang lo thei a ni. Kan sorkar hmasain DAWT chiang tak hmanga sikul tan hun sawn hma chhan a han sawi chiam te kha mipui, a thlangtlingtute zahlohna leh mipui rorelna mausamna a ni a. Dawt hmang kher hi chuan kan politician te hian policy hi kalpui lo se a tha hle a ni.

Sikul tan hma a ni emaw sorkar hmalakna tur engpawh nise, sorkar hian thuneihna a neih rualin mi zawng zawng huap thilah hi chuan mipui duhdan hi a ngaipawimawh tur a ni a. A chhan pakhat chu anmahni thlanglotu tam tak te duhdan pawh democracy-ah hian zah tel tur a nih vang a ni. Sorkar hian policy lian tham a bawhzui dawn hian mipui mar ena kaltlangpui rem leh remlo a thliarhran thiam a ngai a. A nih loh chuan anmahni vote tlingtu, a ruaitu te hian an term a zawh hma pawhin kan paih thei a ni tih an hriat a tha.

Sikul tan hun chungchang hi a reh dup tawh nain a hunlaia Zoram pumpui min tibuaitu a nih avang te leh sorkar leh mipui inlaichinna bul a nghawng avangin kan puten an siamthat hma pawh hian I lo en nawn leh lawk teh ang. Zir thar theih kan neih tak mialin.

Khatih hunlaia Parliamentary Secretary Pu Joseph Lalhimpuia khan Lungleia an Congress bhavan ah hemi chungchang hi sawiin, “Sorkarin education siam tha tura hma a lak naah hian kan nunphung thenkhat mil tur ringawta education hi kalpui chi a ni lova, education kalphung mil tur hian mipuite kan insiamrem a tul zawk a, kan mut hun leh thawh hun te, kan ei leh in leh kan thil tih dan thenkhat thlak danglam a tul a nih pawhin i thlak danglam ngam ang u” tiin sikul tan hun sawn chungchangah thil tullo thleng thleng a sawi duah a. Kan mut hun leh ei leh in chungchangah te hian sorkar hi inrawlh turin tuman kan la thlang ngai lova, kan inchhungkhur inrelbawl dan min rawn relsak tur pawhin thuneihna (mandate) kan la pe ngai lo a, min relsak tur pawh an ni lo a ni.

“…School education ruahmanna milin kan mut hun leh thawh hunte, kan ei leh in (hun)te pawh mipui in kan thlak ve tur a ni” tia kan Education Minister puitu-in sorkar aiawh ang maia a tawng phei kha chu mipui chhiahhlawhin a ruaitu mipui a zahlohna lian tak a tling a ni.

TUALCHHUNG CHANCHINTHAR - EDUCATION MINISTER LEH SIKUL TAN HUN (NEWS COMMENTARY)
Sikul kal hun chungchangah hian sorkar hotute zingah Education Parl Secy chauh lo pawh hian an ngaihdan te an sawi ka ring a. Tun atan chuan ani thusawi hi sorkar sawiah ngaiin lo en bik ta ila. “Kan nunphung thenkhat mil tur ringawta education hi kalpui chi a ni lo” tih leh “education kalphung mil tura” kan insiamrem a “tul” zawk thu a sawi hi thil nihphung letling hlauh niin ka hmu. Kan nunphung leh khawsak dan inherrem a tul tih hi chu khawvel changkang zelah kan tih ngei ngei ngai a ni tih kan hre vek anga. “Education kalphung” mil tura in her danglam tih erawh hi chu a awmzia chiah hriat a har hle. Parl.Secy hian, sawi ang khan midangin an report-naah chuan, “…kan mut hun leh thawh hunte, kan ei leh in (hun)te pawh mipui in kan thlak ve tur a ni…” tiin a sawi a. Kalphung chhe mek ni lo, sorkarin policy thar a siam mil tur ringawta mipui khawsak phung kan thlak ve tura ngaihna emaw kan khawsak phung thlak danglam “ngam” a tul anga ngaihdan an nei leh chumi ngaihdan hmanga kalphung her danglam lawih an tum hi mipui rilru leh duhdan zahlohna niin ka ngai. Sorkar hian mi zawng zawng ngaihdan a lak vek zel a tul loh laiin tuna a tihdan hi chu mipui rorelna democracy lungphum innghahna leh nihphung a kalh hle a ni.

Mahni awmna lam bawk hi han sawi leh thin ila, Sydney khawpui awmna state New South Wales (NSW) leh Melbourne khawpui awmna state Victoria (VIC) a sikul tan hun te hi en ta ila. Australia-a state dang te nen pawh a inang viau. NSW ah hian a tlangpuiin zing dar 9 atang tlai dar 3 hi sikul kal hun chhung a ni a. Amaherawhchu, sikul hotuten nu leh pa te rawnin a tul an tih dan azirin darkar chanve vela tlai emaw hma deuhvin sikul tan hun hi siam thin. Zing dar 9 bawr vela tan deuh vek an ni. Chumi tan hun chu tun hma atanga sikul dintu ten mipui nawlpui khawsak phung nena inmil tura an siam a ni a. An tihtirh lai leh tun hun hi in ang tawhlo viau mah se tha an la ti a ni ang, thlak tumna hi nu leh pa te lam atang chuan a awm lo nia hriat a ni. Sorkar hian thlak tum ta se, policy thenkhat an tihdanglam dan enin, mipui an rawn nasa hle anga. A tawpah thutlukna siamin an thlak dawn a nih paw’n, vawilehkhata ti thut lovin hun engemaw chen notice an pe ngei ang tih a rin theih a ni. Chutiang chu mipui rorelna democracy hmang dik thawkhat ram te kalphung a ni a, a hrisel viau. Kum kha leh chen zing dar 9 bawrah sikul an lo tan tawh a. An chhiatpui lem lo.

Sorkar hmasa in sikul tan hun a sawn hma chhan kha sorkar document-a a lan dan ang ngeiin Aizawla traffic jam nasa lutuk tihthawl tumna vang a ni a. Traffic jam hi khawvel hmun dangah pawh buaipui niin hman kumah Sydney ah pawh hian zing office kal huna traffic jam nasat avangin sikul tan hun sawn an sawi a. An Education lam hotuten zirtirtute leh nu leh pa te a han rawn chu Mizorama kan duhloh ang deuh chiah khan an duhloh thu an hrilh a. "A lo ni tak maw!" tiin mipui harsatna thlentu lian zawk kha barhluih tum lam a lang reng reng lova, nu leh pa te berin an duhloh chuan kan ti lui lovang tiin press conference an ko hial zawk a ni. 

Democracy ah hian mipui kan lal ber a, mipui duhdan nilova sorkar rorel hi a thianglo tawp a ni tih hriatchiannaah chuan sorkar policy reng reng hi mipui remtihna lovin an kaltlangpui ngai lo tluk a ni. Party in a policy a neih a duh chuan inthlan dawnah mipui hmaah a zuar a, mipuiin an duh chuan an vote tling mai thin a ni. Keini chu inthlan dawna sawi pawh awm lo khan kan vote tlin tawh hnuah dawt hmang lehnghalin sorkar khan min barhlui ta a nia, a zialo takzet. Ngaihdan a lak te kha hmaiphihnan lek a ni tih a chiang hle a ni. Zu khap leh khap loh chungchangah pawh chuti tho chu. Tuna MNF ni ta Pu Zirliana'n "kohhran kan rawn dawn lo" tia a tawng khaw khaw ang khan inthlan hma khan tawng ta se emaw Pu Hawla khan 2013 inthlan dawn khan an tih tum dik tak kha sawi ta se vote an hmuh dan chu a dang mai thei a ni. Khap hi a tha kan ti emaw ti lo emaw tuna MNF in a khap tum dan hi mipui mandate neia sorkar policy kalpui tumna a ni a, hei hi democracy ah chuan a kalphung tur a ni reng a ni.

TUALCHHUNG CHANCHINTHAR - EDUCATION MINISTER LEH SIKUL TAN HUN (NEWS COMMENTARY)
Awle, kan sawi ta duah a. Sikul tan hunah kir leh ta ila, Pu Chhantea hian Zosap ten Mizo te zinga zirna (formal education) an rawn hawn atanga sikul tan hun tlangpui kan hman dan kha mipui tam zawk duhdan a nih avang te, an party auhla a nih avang te hian khawmuang lovin vawiin la la hian a department secretary Pi Esther Lalruatkimi hi phone in be nghal se, sikul tan hun pangngaia let a nihleh na tura ruahmanna siam nghal turin thu pe se mipui duhdan a tihlawhtling tan a ni anga, mipui sorkar zia kan hmu tan a ni ang.

Beiseina sang tak nen kan thlir e Pu Chhantea pawh!

No comments:

Post a Comment

Post Bottom Ad