Mizoram CM Zoramthang
Nimin khan Raj Bhavan tualah minister 12 awmna Pu Zoramthanga kaihhruai sorkar thar lak luh a ni.

Larsap Pu Kummanam Rajasekharan chuan Chief Minister atan Pu Zoramthanga rinawmna thu tiamtirin a la lut a. Tun hi Pu Zoramthanga tum 3 Chief Minister a nihna a ni a. Deputy Chief Minister atan Pu Tawnluia lakluh a ni a. Cabinet Minister dang 4 leh a vawikhatna atana Minister atana ruat MLA paruk te pawh rinawmna thu tiamtirin Governor chuan Minister of State ni turin a lalut nghal bawk a ni. Pu Zoramthanga leh Pu Tawnluia baka Cabinet Minister atana lakluhte chu Dr. R. Lalthangliana, Pu Lalchamliana, Pu R. Lalzirliana leh Pu C. Lalrinsanga te an ni a. Minister of State atana lakluhte chu Pu K. Lalrinliana, Pu Lalchhandama Ralte, Pu Lalruatkima, Dr. K. Beichhua, Pu T.J. Lalnuntluanga leh Pu Robert Romawia Royte te an ni.


Sorkar thar lak luhna inkhawm hi chawhnu dar 12-ah tan niin, Chief Secretary Pu Arvind Ray chuan a kaihruai a. Council of Minister lakluh thar te hian a vawi khatna atan Mizo tawngin rinawmna thu an tiam vek a ni. Tun tuma Sawrkar thar lakluh inkhawmah hian a vawikhatna atan Kohhran mite pawh hun pek a ni a; Synod Moderator Rev. R. Lalhmingthanga chuan hunserh hmangin Leprosy Choir chuan Handel-a hla “Haleluiah Chorus” an rem bawk a ni.

Deputy Chief Minister Pu Tawnluia hi kum 1998-2003 leh 2003-13 khan Cabinet Minister a ni a tawh a, Cabinet Minister atana lak luh takte ho pawh nihna pawimawh tak tak chelh tawh te an ni a. Dr. R. Lalthangliana, Pu Lalchamliana leh Pu C. Lalrinsanga te hi 5th Mizoram State Legislative Assembly-ah khan Cabinet Minister, Speaker leh Deputy Speaker te an ni a; Pu R.Lalzirliana pawh hi kum 2008-2013 leh 2013-18 chhung khan Home Minister a lo ni tawh a ni. 

Mizoram sorkar thar lak luhna inkhawmah hian Chief Minister hlui Pu Lal Thanhawla te nupa pawh an tel a. State pawnlam atangin Meghalaya Chief Minister Pu Conrad K Sangma, Pu Keshab Mahanta, Minister, Water Resources, Pu Prafulla Kumar Mahanta,MLA, Assam Chief Minister hluite, MLA tling thar leh MLA hluite, official te, Minister nupui leh fanaute leh sawmbik te an tel a ni.

MIZORAM CABINET PORTFOLIOS: Nimina Cabinet Ministers 6 leh Minister Of State 6 lakluhte hna chanpual chu tih fel a hriattirna chhuah nghal a ni.

Minister portfolios Mizoram

Chief Minister Pu Zoramthanga chuan Finance, PWD, GAD, Political & Cabinet, Planning & Programme Implementation, Secretariat Administration, Vigilance leh Horticulture Department te a chang a. Deputy Chief Minister Pu Tawnluia chuan PHE, Animal Husbandary & Veterinary, Urban Development & Poverty Alleviation leh Dept. Of Personnel & Administrative Reforms a chang. 

Cabinet Minister dang Dr. R. Lalthangliana'n Health & Family Welfare, Higher & Technical Education leh Commerce & Industries department te a chang a. Pu Lalchamliana chuan Home, Taxation leh Disaster Management & Rehabilitation Department a chang a. Pu R. Lalzirliana chuan Power & Electricity, Art & Culture, Land Resources, Soil & Water Conservation leh District Council & Minority Affairs a chang a. Pu C.Lalrinsanga'n Agriculture Dept. Irrigation & Water Resources leh Co-operation Department a chang thung a ni.

Minister of State zingah Pu K. Lalrinliana'n Food, Civil Supplies & Consumer Affairs, LAD leh Fisheries a chang a, Pu Lalchhandama Ralte chuan School Education, Labour, Employment, Skill Development & Entrpreneuship leh Printing & Stationery Department te a chang a. Pu Lalruatkima'n Rural Development, Information & Public Relation leh Land Revenue & Settlement Department te a chang. 

Dr.K. Beichhua chuan Social Welfare, Excise & Narcotics leh Sericulture department te a chang a. Assembly-a vawikhat luhna Pu T.J. Lalnuntluanga'n Law & Judicial, Parliamentary Affairs, Transport leh Environment, Forest & Climate Change Department te a chang a. Pu Rober Romawia Royte chuan Sports & Youth Services, Tourism leh Information & Communication Technology-te a chang bawk a ni. 


CHIEF MINISTER ZORAMTHANGA: Chief Minister Pu Zoramthanga chuan tunhma a an sorkar ang ni lovin tun umah chuan hmasawnna hna thawk nghal phat turin an inruahman fel a ni a ti

Nimina a sorkara council of ministers te lakluh zawh hnu a Raj Bhavan tuala chanchinbumite a kawmnaah Pu Zoramthanga chuan an flagship program SEDP hmangin Mizoram chu India ram puma hmasawnna lama thang ber leh mitin sum lakluh chawh rual (per capita) a sang ber ni turin tan an la dawn a ni a ti a. Mizorama ram awl tam a nih avangin chu chu hmang tangkaiin nasa takin sum lakluh tihpun a ni dawn a ni a ti a. An ngaih pawimawh tur zingah chuan zu leh ruihhlo vanga harsatna tawk thalaite chhanchhuahna tur home changtlung tak din tura hmalak nghal a nih thu a sawi a. Hemi kawngah hian doctor-te, tlawmngai pawl leh kohhrante nen tanhona tha a pawimawh dawn a ni a ti bawk.

Pu Zoramthanga chuan kawngpui tha nei turin tha thawh nghal a ni ang, a ti a kawngpui chhe zualte siam\hat hna thawh nghal a nih tur thu a sawi a. |halaite hmakhua atan infiamna lam leh information technology lam uar a nih tur thute, district 3 an lo puan tawh – Hnahthial, Khawzawl leh Saitual te chu a taka tipuitling turin kum thar budget-ah sum dah nghal a ni ang a ti. Aizawl lirthei tawt lutuk tihziaawmna’n kawng chhawng (elevated road) leh lirthei hunna tam tham tak siam a nih dawn thu a sawi bawk a. Hemi atan hian Assam Rifles chhuahsan tur ram chu hman tangkai tum a ni a ti.

Zawhna chhangin MNF president chuan BJP kaihhruai NDA leh NEDA ah an tel ve ve a, chuvangin an party thuneitu sangin thutlukna dang an siam a nih loh chuan an la tel zui zel dawn niin a sawi a ni. - AIR

Post a comment

Powered by Blogger.