Vawiin Lal Isua pian champha lawmna chu Mizoram pumah urhsun, muanawm leh hlim taka hman a ni.
Nizan atang khan Krismas Urlawk puala kohhran hrang hrang hun buatsaih hman a ni a, Kohhran hrang hrangte chuan urhsun takin an Biakin theuhah Urlawk zan inkhawm an hmang a, vawiinah Christmas lawmna hun siamin Pathianni anga an inkhawm hnu-ah inkhawm banah zaikhawmin Kohhran Hall leh Sande Sikul Hall-ah te hun an hmang. Kohhran tam ber chuan inkhawm leh zaikhawm bakah thingpui ruai an buatsaih a, Krismas ruaipui chu naktuk-ah an theh ang a, UPC tiamin kohhran thenkhat erawh chuan vawiin khan Krismas ruai an theh a ni.
Lungleiah chuan Kohhran hrang hrangte chu thupui thlan bik neiin Biak Inah an inkhawm a. Inkhawm banah thingpui leh chhang ruai theh a ni tlangpui a; thingpui hmeh atan hian Zochhangban, artui leh bal chhum te sem a ni a, bakery chhang sem an awm bawk.
Nizan urlawk zana Lunglei Police ten an man mi 6 te chu Court-ah thawnin an zinga zuruih vanga man mi 4 te chu Christmas Present atan chhuah leh nghal an ni a, buaina leh harsatna buaipui tham a thleng hran lo va. Lunglei khawpuiah vawiinah dawr inhawng a awm mang lova, sumdawng lirthei vakvel an chawl a, khawlai pawh a reh hle a ni.
Mamit khawpuiah pawh boruak muanawm tak hnuaiah Kohhran hrang hrang ten ropui takin Krismas an lawm. Kohhran hrang hrangte chuan thupui thlan bik hmangin Pathian biak inkhawm an nei vek hlawm a, Chawhma inkhawm banah thingpui in-hoin thingpui hmeh atan Kohhran nuho chhang den Mizo Chhangban an hmang a ni.
Kohhran tam takin tlaiah ruai an theh laiin Mamita Kohhran lian ber Presbyterian Kohhran leh Kohhran thenkhat chuan vawiin kha Pathian Ni anga serhin ruai an theh lo a, naktukah an theh thung ang. Boruak a muanawm hle niin Police te’n an sawi a. Nizan urlawk zanah pawh khan Mamit veng hrang hrangah YMA leh Police an duty a, zurui leh buaina siam man an awmlo a, kumdang aiin mi vei vak an tlem zawk a ni.
Lawngtlai District mipuite pawhin nizan urlawk zan leh vawiin Krismas kha boruak muanawm tak hnuaiah an hmang a. Addl. SP Pu V.L.Lura Hauzel-in kan Corr. a hrilh dan chuan nizan khan District chhungah thil duhawm lo lian tham thleng hriat tur a awm lo.
Krismas lawmna pui ber chu Kohhran hrang hrang te’n vawiin chawhma atang khan an nei tan a, Biak In tinah Isua pian thu sawi tura ruatte’n an sawi a, Kohhran hrang hrangte chuan vawiin Krismas ni kha Chhang ruai nen an lawm a, Kohhran thenkhat, vawiina ruai nen Krismas lawm pawh an awm nual a, Kohhran thahnem zawk chuan naktuk khian ruai an theh ang. Zanin hian Krismas lawmna kalzelah Biak Ina inkhawm a nih leh dawn bakah Krismas zaikhawm neih chhunzawm a ni ang.
Serchhip khawpui leh a chhehvelah pawh boruak muanawm tak hnuaiah Krismas hlim taka hman a ni a. Nizan khan Police leh YMA te chu kawn remchang hmun hrang hrangah ngawrh taka duty in, dan bawhchhiatna leh boruak duhawm lo a thlen hriat a ni lo a, Serchhip Salvation Army thalaite buatsaihin Serchhip Bazar tualah Coffee Night hlimawm tak hman a ni.
Vawiin Krismas Ni khan Kohhran tam zawk te’n Pathian biak inkhawm urhsun taka hmangin, chawhma inkhawm banah ruai pangngai theh lovin Thingpui leh chhang Ruai an theh a, naktukah ruai an theh dawn a ni.
Siaha-ah pawh Kohhran hoten hlim taka Krismas lawmin an inkhawm a; Pathian thuchah ngai thla-in Pathian fakna hun hman a ni. - AIR
Post a Comment