PASTOR MAR DEK VE ANG (Tuang chhah ve tak maw)
Politician ten tlawn an hlawh viau laiin a ka kaw nazawng sawi leh sel an hlawh viau mai. An tuang a chhah ang reng viau mai. Kan Pastor te ve thung pawt parh ve chhin teh ang.
AN DINHMUN -
Khawiah pawh Bial nei Pastor te chuan a bikin Kohhran lian deuhah chuan Quarter nuam tak an nei deuh vek a, heng bakah hian bungrua, Sofa, Almirah, Fridge etc dahsa a ni fur bawk. Bial thenkhatah phei chuan an Phone Top-Up thlengin an tum sak bawk thin. Hetiang zawnga ngaihtuah chuan Group A Officer aiin an chungnung zawk mah a ni.
Headquarter lama thute zingah lirthei dawng an kat nuk a, Sorkar hnathawk thenkhat angin Designation Plate an tar vu vu bawk thin. Bial nei Pastor aiin an in dahsang hret a, Headquarter a vawikhat an luh fuh tawh chuan an chhuak mawh hle. Zirtirtu Senior atanga DEO, Dy Director vela chho hi an ang ber mai. Mission Field awptute pawh chutiangin lirthei an dawng deuh vek bawk a, an thûna bialah chuan bialtu MLA ang mai bawk an ni.
HUN HMAN DAN -
Committee/Meeting leh inkhawm hi an hna ber a ni a, a hawizau deuha ngaihte chu eng eng emaw Seminar/Leadership Training/Retreat tih velah Resource Person ah an sawm bawk thin. Bial vawngtu thenkhat chuan hunawl an ngah ang hu in an taima lo hle a, mi pantu aiin pan nih an duh tawk viau hlawm. Zing atangin savun chapal nawhtlet chi leh T-Shirt nghawng nei ha in felfai takin Quarter ah inleng an chhawn chawt thin. Inkhawmpui, Inneih, Mitthi vui hi an hna tla chawp zinga mi a ni bawk. Phone khawih nasa ber pawl an ni a, Whatsapp Group hrang hrang, Kohhran huang angah te hian a rak tam ber an ni duh viau bawk.
Bial fan dawnin Upa neinung deuh lirthei hawlchhuak maithei an kaichhuak thiam hle a, hetiang mi hi lamtang tha tak 2/3 kawp bik an neih duh viau bawk. An hna in a zir vang nge Pro-Pastor atangin an kum a phu lovin an inti puitling al thin.
THLARAU LAM -
Pastor thar lak reng a ni a, bial a zim telh telh a, tunhmaa Pastor, ke ngata bial fang, lawmman tlem bawk si, khatiang harsatna nasa tak paltlangte kha Thlarau lamah an lo tuihnang duh viau mai. Tunah zawng hrehawm tawrhtur avang lutuk tawh a, mitthi vuinaah pawh Thlamuanna thuchah nung tak aiin Politics te an sawi dum dum tawh mai.
Camping/Crusade a chhawr tlak an vang telh telh a, thusawi nung tak Pastor hriattur a vang tan a, ram pum huapa thuhriltu ropui leh hriat hlawh Pastor sawi tur an awm mang tawh lo. Thenkhat thih dawn tep ah pawh Pulpit tlanga Wheelchair a thu a rawngbawlna nung kalpui tawk tawk an la awm laiin a hrisel tha zawk ten Politician leh Senior Pastor, Headquarter hruaitute laka tlaktlum lamah ke an pen chak tawh zawk a, Transfer/Posting a awmin boruak a awm leh hat bawk thin.
THLARAU BO MAN -
Programme ah hian Direct taka Thlarau bo manna Programme a awm mang tawh lova, mahni mizia piahlama in lak khunkhan leh urhsun hi an nunah a bet nghet hle tawh. Pastor thenkhat Evangelism lam tuipui, thlarau bo ten a ruka an pan thin tlem a zawng erawh an la awm. Kohhran 5 vel chauh an awp a, Kohhran kai harh tur erawh chuan hlawhfa, Evangilistic Team rawih tho a ngai thin. Bialtu, Full Time a inpe, lei lamah pawh lawmman hmu tawhte hi rawih enah kan en lo tlangpui a, mahni in en nachang hre ve thin tak maw.
Thlarau bo chu sawi loh Upa chhumchhe deuh tan phei chuan an bulhnai chan phak pawh a harsa lek lek tawh zawk a ni. Thlarau bo an pan lova, thlarau bo ten an pan hek lo. Hetiang hi chu Kohhran thalai Evangelical Cell tih vel kutah an papek deuh tawp a, URHSUN leh KHUNKHAN, Suit ha rual ten an uap thapna ah lo chuan an tlingtla vel ve mai mai bawk thin. Entawnin nau an hlan a, entawnin an Baptist a, Entawnin an inneih tir bawk thin. Kum 20 Service tawhte pawh hian Entawn bawkin Serh leh sang an kalpui thin a nih hi.
Miin ring ngam taka an hnena harsatna an thlen te pawh hi Bial danga an awm hnu ah fiamthu rawngkai lek lek a Sermon a sawichhuah leh mai ching tawk pawh an awm thin. Minister/MLA bathlara thu Regular em em Pastor pawh kan nei thluah tan a, hei vang pawh hi a ni mahna Politician te pawhin eng teh chiamah an ngaih lem loh thin ni.
KUMTHAR PROJECT -
Tualchhung, Bial eng Level pawh Kumthar hmalakna tur relnaah an thu ve thin a, inthlahrung map lova Quarter mamawh sawi zat zat tawk lah bo lo, tlawmngaia keini chu ngaihtuah a ngailo ti thin Pastor hi tunlai khawvelah an vang viau tawh ta ve ang. Bial, Tualchhung Kohhranin a thawm that loh chuan mahni chenna Quarter ngei, mahni thu a thahnem ngaia thawm melh melh duh lah chu kan vang ta viau bawk. Thuthmunah hian mamawh kan sawi zet zet a, kan sa a tha tul a, hrisello hle in kan insawi thei reng bawk a.
THLALAK HI -
Ka thian pakhat atangin ka dawng nawlh mai. BCM Pastor Rev.C.Zatawna a ni a, kum 75 a ni tawh a Pension na pawh kum tam a liam ta, Pension hnu ah ringlo hnamdang zinga rawngbawl turin an nupa in an la inpe a, kumin Krismas pawh Mosolman chhungkaw zinga Krismas hmang turin mahni thuamhnaw khaiin nupa in ke in an la kal miah miah mai.
TLIPNA -
Heng phenah hian hrehawmna, harsatna tam tak an tawk ve ngei ang. Helam zawng hian ka rawn sawi uar ve reng reng duh a, chhiartuten huatah la lo ila, thupui ang khian an mar dehna hmanruaah i hmang thiam ang u. - David Sailo
Post a Comment