International news & politics: Israel sorkar chuan a U, America thiltih tawmpuiin New Year Day, 2019 atangin UNESCO (UN's Educational, Scientific and Cultural Agency) chu a chhuahsan fel ta. UN a Israeli palai Danny Danon chuan, "UNESCO chu Israel hmel a ten duh duha an chin kual leh, Israel demna tur maia thutlukna siam leh hmalatu a ni" a ti. US chuan Oct 2017 khan UNESCO hi chhuahsanah a lo vau tawh a, Oct 2018 ah a chhuahsan a, Israel chuan US thiltih chu a zui ve ta a ni.
Hetianga UNESCO Co-founder US ber a chhuak leh Israel an chhuak hi Paris base, UNESCO tan chuan a tha lo hle a, Israel ram chhunga hmun thenkhat chu World Heritage ah UNESCO in a puan a ni. UNESCO hian East Jerusalem lama hman lai thil hlui leh ropui awmte chu Israel kuta dah vek duh lovin, Israel ram sawisel a nasa tak an lo tichhuak tawh thin a ni. UNESCO hian Managing Director atan Jewish-Morrocan Andrey Azouly a nei thar a, mahse, US leh Israel hian charge a lak hnuah an chhuahsan ta tho a ni.
Kum 1984 khan US- Reagan Admin chuan UNESCO chu Russia duhdan a che kual thin, eirukna tam tak awm tiin a chhuahsan a, kum 2003 ah a lut leh chauh a ni. UN's World Heritage venhim nan sum tam tak a ngai a, hetianga sum thawh tam ber thin US chhuak daih hi a van- duai thlak hle a ni. US hian UN ah budget 22% lawih (US$ maktaduai 600)a thawh thin a, Israel pawhin US$ maktaduai 10 a thawh thin.
PRESIDENT ASSAD KAHHLUM A NI DAWN EM?
Israeli Defense Force Chief of Staff thar tur Maj. Gen. AVIV KOCHAVI chuan, Syria rama Iran leh HEZBOLLAH te ngampa taka an sapa tal zel loh nan leh bu an khuar loh nan Syrian President Bashar al-Assad chu KAHHLUM a, dah that mai tulin a hria a, mahse, Israel sorkar chuan rem a ti rihlo niin, Saudi Arabia chanchinbu Elaph Daily chuan a ziak.
Mossad Spy Chief Yossi Cohen chuan, Assad chu nakinah biak pawh emaw, thlak theih an inring niin a sawi a, mahse, Defense Force hotu lam erawh chuan President Bashar al-Assad chu KAHHLUM mai an duh a ni. Israel chuan Syria tualchhung buai a kum 8 chhung in Assad KAHHLUM mai theihna hun remchang a hmu zing hle niin an sawi.
Israel leh Saudi Arabia chuan Shia Muslim Iran hoten Middle East ah influence an nei nasa leh Gulf-Bahrain, Yemen leh Red Sea thleng a an rawn inzar pharh chiam chu an mit timimtu a ni a, hei hi Syria President Assad a inphal rai vangah an puh a ni.
IDF Chief of Staff chawl tur Lt. GEN. Gadi Eisenkot chuan, Saudi Arabia tan Iran rawn tuilian zel chu ngaih theih chi a ni lo, a ti.
Nikum khan Israeli Housing Minister Yoar Galant chuan, President Assad KAHHLUM mai a that thu khawvel hriat ah a lo sawi chhuak tawh a ni.
Hetih lai hian Iran thlawp HEZBOLLAH hote chuan Galilee region lam chu leiverh (tunnels) hmun 6 atangin tihbuai an tum a, leiverh hmunte hi IDF lam chuan an ti chhe nual tawh a, mahse, hmuh chhuah loh la awm nual in an ring. PETERA len den thinna Galilee dil awmna lam-bial chu venghim ngai zual tiin, Israeli Security Force chuan a bika battalion "Gates of Fire" (Shaare Haesh) tih an din thar a, hengho hi inring takin an cheng rang kau chungin ramriah an duty tawh a ni
~CT Lalrinawma
Post a Comment