KOHHRAN LEH POLITICS HI - 2

KOHHRAN LEH POLITICS HI - 2

~ Ṭpa Ngente

Kohhran hmakhua tur ngaihtuahin hei hi sawi ngei a ngaiin ka hria.

A hmasain hei hi han sawi hmasa ila. Kohhran hi Pathian rel lawk angin Krista'n a thisena min din sak a ni a, Krista chu kohhran *lu* niin kohhran hi a taksa a ni a, ringtu mimal tin tan hian a hluin ram leh khawtlang tan pawh a hlu em em a. Hmangaih leh dimdawih tak leh a hmakhua tur uluk taka thlir chunga enkawl ngai a ni a. Hruaitu fimkhur lo leh dik lote avangin kohhran hian nasa takin a tuar thei a ni.

Kohhran hi thianghlim tak leh nghet taka a din zel theihna turin a enkawlnaah member tinten mawhphurhna kan nei ṭheuh a, chutih laiin Pastor leh Upa te, kohhran chhawr speaker te, kohhran hnuaia thawktu zawng zawngte leh tualchhung kohhran rawngbawltute chungah hian member pangngaite aiin Pathianin mawhphurhna a nghat lian bik hle a.

Kohhran chhunga rawngbawltute zingah leh a puipate zingah hian hman aṭangin kohhran hmakhua thlir lem lo leh mi dik lo deuh an awm ve fo a, chung mite avang chuan kohhran hian harsatna a tawk fo ṭhin a. Chuvangin, kohhran hmangaihtute chuan hmangaihna avangin chung mite chu dodal an ngaih chang a awm fo ṭhin a, amaherawhchu, hmangaihna tel lova kohhran chhunga indona leh inepna thlentir erawh a ṭha lo em em thung a ni.

Aw le, kan sawi tum takah kan lut dawn a, a thu kalphung ngun taka ngaihtuah chungin, kohhran sêlna ni lovin a chhunga rawngbawlna fawng pawimawh chelhtu felhlel deuh site chungchang chauh a ni tih hre hmasa ila. Tin, politics leh political party lam topic a ni lo va, kohhran chhungah dikna vawng nung ngei tur kan nih tar lan tumna a ni tih leh, he thuziak hi politics ni lovin *'Pathian Thu'* a ni tih hriatthiam tum chungin chhiar kan tum hram dawn nia.

Kum 2018 MLA General election chu kohhran chhunga politics sawi rik tam ber ṭum a ni awm e. Zêp thu a chêng lo, election campaign hun lai khan Pastor ṭhenkhat leh revival speaker ṭhenkhat te, kohhran upa leh rawngbawltu engemaw zat ten hmun tam takah, kohhran huangah leh pulpit tlangah te politics an sawi hlawm a. Hmun ṭhenkhatah phei chuan ṭan bik nei anga ngaih loh theih loh ṭawngkam an chhak chhuak hlawm a. An thusawi tlangpui khaikhawmna chu *'sawrkar tawhte demna leh la sawrkar ve lo pawl pakhat fakmawina'* ti ila a dik mai awm e.

Political party ṭhenkhatte hun hmasa lam chhui kir sakin, politician te sawi awm tawk lek lek ṭawngkam hriat tur a awm nual a, hmun hrang hranga an thusawite chu social media lamah luang khawmin a thawm a ri ring hle a ni.

Political party te hun kal tawh an chhui kir sak dawn a nih rau rau chuan an zavai khan politics a hnuhma tam tak nei tawh vek an ni a, a ṭhente chu hun rei lehzual deuha lo sawrkar tawh ve tho te, MP leh MLA lo ni tawh te an ni a, mimal ang pawhin hnuhma mawi leh mawi lo tam tak nei tawh vek an ni hlawm a, thil ṭha duh an intih rau rau chuan hmaih bik nei lovin an zavai khan kan chhui kir vek mai awm a nih laiin hmaih bik an nei ta tlat mai a, khatiang kha kohhran huang chhunga sawi dan tur a ni dawn em ni? Kohhran rawngbawltute tih atan chuan a felhlelin kohhran hmakhua atan pawi lian tak a thlen ang tih a va hlauhawm em, chin fo atan a ṭha ang em tih hi ngaihtuah tham tak a ni.

Kohhran huangchhungah chuan party mal bitum lovin, sawrkar-in a tih atan kohhranin a duh zawng leh duh loh zawngte sawi sela, kohhran mipuiten political party tinte manifesto aṭang leh an hun kal tawha an thiltih te enin kohhran duh zawng leh duh loh zawng chu ngaihtuah chungin ngaihdan kan lo siam mai tur a ni a, hemi chin hi kohhran tan a him tawk hle ang. Chumi bak kal thui deuh hlek a, *"Kum chuti khati zat an sawrkar tawh a, chutiang khatiang chu kan hria a ni lawm ni...."* tih ang te, *"Zarkawt tlangval leh Ramhlun tlangval chuti khati..."* tih ang te, a bak pawh election campaign hun lai khan sawi tur a tam mai a, khatiang kha chu kohhran hmakhua atan a pawi thui thei viauin a rinawm a, chin zui fo tlak a ni em tih hi kohhran hnarkaituten beng sikin ngaihtuah sela a duhawm hle a ni.

*Aw le, eng pawh ni se, khangte kha Revival speaker ṭhenkhatte leh pastor ṭhenkhat te, kohhran upa ṭhenkhatte leh rawngbawltu ṭhenkhatte thiltih mai a ni a, khang kha kohhran tihah kan puh phal lo va, kohhran chhunga mi ṭhenkhatte thiltih ve maiah ngai hram hram ila. Chuvangin kohhran chu kan dem lo vang a, mahse, a chhunga dinhmun pawimawh luahtu kohhran hmakhua thlir si lo leh fimkhur lote, politics hmanrua atana kohhran hmangtute erawh kha chu kan demin kan dodal ngam thung ang.*

Tichuan, khang an hmalaknate avang khan kohhran mipui thlarau nun pachhe tak tak tam tak thinlung a hliam a, revival speaker-te leh pastor ṭhenkhat te, upa leh rawngbawltu ṭhenkhatte kohhran behchhana an chet dan kha kohhran hian a ṭhatpui ang nge a chhiatpui ang tih hi ngaihtuah tham tak a ni.

*Kohhran hi politics-ah inrawlh suh se kan ti hauh lo va, a chhunga dinhmun pawimawh luahtute pawh inrawlh hlek suh se kan ti hauh lo. Amaherawhchu, kohhran behchhan leh kohhran hmanruaa hmang chunga politics-a an inrawlh dawn a nih chuan, an inrawlh dan erawh a dikin a Pathian thu hle tur a ni a, Pathian pawmpui tlak thlapa dik leh thianghlim a ni tur a ni thung. Chuti a nih loh chuan kohhran hian nasa takin a chhiat phah thei a, kohhran mai ni lovin ram chhiatna thlengin a thlen thei a, chutah chuan kohhran hi mawhphurtuah an siam thei tih hi an ngaihtuah thlen a ngai hle mai.*

Khai le, kum 2018 MLA General election dawna kohhrana mi pawimawh hote politics-a an inrawlh dan leh, Kohhran leh Biakbuk leh pulpit tlang an hman dan thinlung kha a dik leh dik loh te, Pathian malsawm tlak a nih leh nih lohte chu a hnuaia mi hmang hian i han enfiah chhin dawn teh ang.

Kohhranin kum thum dawn kan aupui leh ram pum huap ṭawngṭai te kan buatsaih khan enge kan dil ṭhin kha? Kohhran mipuite hnenah eng thu nge kan fah ṭhin kha? Sawrkar Zu zawrh tih tawp a nih theih nan a ni lawm ni? Tichuan, election a lo hnai a, party tin manifesto a lo chhuak a, ziak meuha Zu zawrh tih tawp tum chu party pakhat chiah a rawn awm a, a dang zawng chuan tih tawp tumna an rawn ziak lang ve lo va.

Zu zawrh duh lova au aute khan zu zawrh tih tawp tuma ziak meuha manifesto-a rawn dah awm chhun chu kan ṭawngṭai chhannaah kan pawm ta em? Pawm lo a ni lawm ni? A kohhran ang pawhin kan ṭawngṭaina kan hre rengin chutah chuan kan ding reng em? Ding lo a ni lawm ni?

Manifesto-a ziak meuha zu zawrh tih tawp tumna rawn chhawp chhuak awm chhunte chu kan ṭawngṭai chhannaah kan pawm duh leh si lova, political party pakhat ni ve ang maiin chumite chu sawrkar lai mek nen chhuanlam chi hrang hrang dapin sawiselna tur kan zawng khawm a, Kohhran leh Biakbuk leh pulpit zahawmna pawh ngaihtuah lovin kohhran behchhanin kan vawm chiam chiam a, ar chuk tui lovah chhuah kan tum a ni ber a. *Sawrkar-in Zu zawrh tuma mipui mar min deh vel laia nasa taka zu zawrh fakmawia mipui thinlung hmin tumtute pawl din, an manifesto-a zu zawrh tih tawp tumna pawh ziak ve hauh lote chu hriatthiam theih takin revival speaker leh pastor ṭhenkhat te, upa leh rawngbawltu ṭhenkhatte chuan pawl thianghlim ber ang hialin lantir an tum a nih kha.*

Anni pawl kha sawisel kan tum a ni hranpa hauh lo, kohhranhote leh kohhran hnarkaitute hi kan ṭawngṭaina leh kohhran mipui hnena kan thu fah ṭhinah khan kan ding nghet em, kohhrana mi pawimawh tam takte chet lak dan kha Pathian mal sawm tlak a ni em tih hai lan nan hmanruaah ka han hmang mai a ni.

Tichuan le, kan han inthlang zo ta a, sawrkar thar a lo piang ta a. Revival speaker leh pastor ṭhenkhat te, upa leh rawngbawltu ṭhenkhatten kohhran hmanruaa hmang chunga kohhran mipui thlarau nun pachhe tak tak mi tam takte thinlung hliam khawpa an aupui kha Pathianin a chhang ta em le? An au hlawhtling ta em le? Hlawhtling lo a ni lawm ni? Eng vang nge ni ang? Tihhlawhtlinsak tlak a ni lo em ni ang?

*Kum thum dawn thaw kohhranhote kan ṭawngṭaina kha, kan ṭawngṭainaah ding reng lo mah ila Pathianin a hre reng zawk a, kan dil ang takin min chhang ta zawk a ni lawm ni? Pathian chuan a pawm tlak inthawina hlantute hlan chin zawng a ngaihthlak sakin a chhan sak a, keimahni duh zawng kan aupui chin zawng min hnawl sak a ni mai awm e.*

Ṭhiante u, khatianga kohhran mipui tam tak thinlung hliam khawpa kohhran huanga politics seng luh kha enge a ṭhatna ni ta? Tunah hian kan tum hlawhtling chuang si lovin kohhran mipui tam tak thinlung nâin kan siam ngawt mai a ni lawm ni.

*Mahni ṭawngṭai chhanna pawm duh lova mahni duh zawnga a chhanna thlen tir tum, kohhran hi hmanruaa hmanga ṭan zawngte campaign pui anga ngaih theiha kohhran huanga politics seng luh nasat lutuk hi a hlawkin kan hria em le? Chin zui zel tlak niin kan hria em? Pathianin mal a sawmin kan hria em?*

*Kohhran chhunga dinhmun pawimawh luahtute hian politics-a inrawlh dan chintawk hi zir ṭhat leh kan ngai deuh em le? Tin, kohhran slogan aupui tura tirh chhuah turte pawh hi thlan fimkhur deuh a ngai a ni lo maw? Hetiang reng reng chuan kohhran hi kan ti phirsi chhe zo vek ang tih a va hlauhawm em.*

Tunah chuan a kohhran angin han sawi ta ila. Kohhran tan hian sawi tur awm zawng zawng sawi vek hi a hrisel lo thei a, kohhran chhungah inremlohna a thlen phei chuan ṭhalo tak a ni.

Chuvangin, kohhran hian kan role dik tak kan hriat fuh hun a nghahhlelhawm hle a, kan role dik tak kan thawh fuh hun pawh a nghlahhlelhawm hle mai bawk.

Kan role dik tak chu, kan mipuite thlarau nun siam thar saka, Pa leh Fapa leh Thlarau Thianghlima an nun zawng zawng chiah pil sak a ni a, chu chu tling zo takin thawk ila tunge zu zuar ang, tunge eiru ang. Politician leh official eiru zawng zawngte pawh hi (eiru angah ngai ta ila), kohhran member vek an ni a, an nun siam thar saka, Pa leh Fapa leh Thlarau Thianghlima an nun zawng zawng chiah pil sak an nih chuan *'Eiru suh u'* tih an ngai dawn em ni?

Thlarau Thianghlima baptist si lova zu zuar lo tur te, eiru lo tur tea kan phût avangin kan phut hlawhchham ṭhin a nih hi.

Lalpan a kohhrante hi kan fellohnaah min mgaidamin min tithianghlim zel sela, he khawvela min dah chhan ang taka rawng bawl thei turin a thlarauin min thuam thar zel mawlh rawh se, Amen.