Mizoram sorkar Social Welfare Dept chuan hmeichhiate chawikan a, ti changkanga, humhim turin hma hrang hrang a la mek a, chung a hmalakna hnuaiah chuan mahni intunnun theihna tur thlengin zirtirna pek a ni.
Social Welfare Dept hnuaiah hian State Mission for Women Empowerment din a ni a, Social Welfare Dept Asst Director Pi Chauzikpuii sawi danin, he mission hi hmeichhiate hamthatna tihchangkanna tur zulzuia din a ni a, he mission hnuaiah hian hmeichhiate himna tur ang chi te leh an hamthatna te kalpui a ni a, chumi hnuaiah chuan State Resource Centre for Women din a ni leh bawk a ni.
Hmeichhiate Chawikan An Ni Theihnan Mizoram Social Welfare Department Hmalakna
Tunah hian Aizawl Mualmam ah hmeichhia te tan bik Protective Home din a ni a, hetah hian hmeichhe rahbi tleu tawh te, Drug Addict leh baihvai hrim hrim te dah a ni a, Central Sorkar hnuaia hetiang lam hawi scheme Ujjwala Shelter Home te nen suihfin a, hmunkhatah dah an ni a, puanthui leh puantah te zirtir an nih bakah computer zir thei te pawh course lak tir an ni a, an chhuah hnu pawha anmahnia eizawnna kawng an hmuh theih nan te leh an intundin theih nan hmalak a ni.
Mahila Police Volunteer pawh siam ni tawhin tunah hian Aizawl leh Lunglei Dist ah te kalpui mek a ni a, hmeichhe mangang tanpui ngai ten humhimna an mamawhin police te mipui inkara ding tur hmeichhe police volunteer dah an ni a, heng volunteer te hi dist dangah pawh dah leh zel tur an ni.
Hengte bakah hian Mahila Shakti Kendra kalpui a ni bawk a, sorkar dept hrang hrang te nen thawhho a, thingtlanga cheng hmeichhiate thiamthil lampang te, ziak leh chhiar lam te, hriselna leh ei leh in tur tha inzirtira kawhhmuh tu tur an ni a, dist 4- Champhai, Siaha, Serchhip leh Mamit ah te kalpui a ni a, thawktu tur pawh lakfel a ni tawh a ni.
Social Welfare Dept Dy Director Pi Lallianpuii chuan, inchhungkhura hleihlenna tuar hmeichhiate humhimna pawh tha taka kalpui a nih thu kan corr. a hrilh.
He hmalakna hnuaiah hian Protection of Women from Domestic Violence Act 2005 chu 2006 atang khan hman tan a ni a, he dan hman anih hnuah hian Mizoramah mipa ten an hrethiamlo fo a, hmeichhiate chhanna deuh bikah an ngai thin a ni a ti a, amaherawhchu he danin humhim a tum te hi an nupui te an farnu te, an nu te leh an fanu te ngei an an ni tih hi hriata pawmtlan a pawimawh hle a ni a ti.
Inchhung khura harsatna tawk hmeichhiate tan hian, Women Helpline Aizawlah a awm tih a sawi bawk a, nileng zankhuain biakpawh theihin an awm a, phone no- 181 ah biak pawh mai theih a ni tih a sawi a ni.
Harsatna leh kut tawrh avang te leh chhan dng avanga mahni in tlan chhuah san, pan tur nei lo tan pawh Aizawlah hian One Stop Centre siam a ni a, hmeichhe baihvai, an pasal ten an umchhuah pan mai tur hrelo in an pan theih a ni a, hetihlai hian he centre ah hian zan 5 aia tam a riah theih a ni lo a, an awm zuina tur ngaihtuahsak mai thin an nih thu a sawi a ni.
One Stop Centre hi kalpui ve turin Lunglei leh Kolasib ah a building sak hna tan a ni tawh a, heng bakah hian, chawmtu neilo leh hmeichhe baihvai t tana an mahni inchawmna khawp inzirtirna Residential Institute for Wowen in Distress kalpui a ni a, hetah hian puanthui, beauty culture leh computer zirna te kalpui a ni. -AIR
Post a Comment