Kum Thar Lawmna: Mizoram hmun hrang hrangah kumthar lawmna zawhfel a ni a, vawiinah hian sorkar pisa te inhawngin sumdawnna hmun te pawh hawn a ni tawh a, khawsakphung pangngaiah mipui te an let tan tawh a ni.
Kum thar lawmna nimin thleng khan Mizoram hmun hrang hrangah Kohhran thahnem takin ruai an theh a.
Aizawl bikah chuan nimin khan Kohhran thenkhat chuan Pathian biak inkhawm an nei leh a, Kohhran thenkhat chu chawhma lam atangin Pathian fakin an zaikhawm a, ruai an theh hnuah zanah an zaikhawm a ni.
Tlai ruai theh zawhah mi tam tak chu khawlaiah lirthei leh kea chhuakin khawlai an fang a; kawn chei te pawh a lun leh hle a. Nizan khan veng thenkhat chuan khawlai hmun remchangfah intihhlimna an buatsaih a ni. Hriat theih chinah buaina leh chetsualna lian tham a thlen hriat a ni lo.
Lungleiah chuan nimin khan Kohhran hrang hrang ten kumthar lawm nan ruai an theh a. Chawhma lamah inkhawmin inkhawm banah thingpui ruai kilho a ni. BCM hmunpui Serkawnah chuan ruai theh a ni lova, intihhlim nan special item hrang hrang hmangin hun hman a ni a. Ruaitheh zawhah mi thahnemngai ten Social Welfare Dept. office kawtzawl Zotlangah Charity Concert an buatsaih a, heta sum hmuh hi Christian Hospital Poor Fund atan an pe ang.
Mamita Kohhran tam zawk te pawhin nimin khan ruai an theh a, nizan khan Pathian faka zaikhawm zawhah kum thar lawmna hi an tiak a ni.
Mamita Kohhran thenkhatin kumthar niah ruai an theh tawh avangin kum thar lawmna hi chhuzawm tawh lo mah se Kohhran tam zawk chuan ruai nen kum thar hi an la lawm a; chawhmaah Pathian biak inkhawm an nei a, chawhnu lamah zaikhawmin ruai an theh a, zanah Pathian biak inkhawm neih zawh hnuah Pathian fakin an zaikhawm leh a ni.
Krismas leh kumthar lawmna vuakvet chhungin Mamit khawpui chhungah boruak duhawm lo lian tham thleng a awm lova, mipuiin hlim takin hun an hmang a, kum dang zawng aiin zu rui, khawlaia buaina siam, rui chunga lirthei khalh leh zana veivak hmuh tur an tlem a ni.
Champhaiah chuan kumthar niah Kohhran tam zawkin kumthar lawmna ruai an theh hnuah niminah Kohhran ṭhenkhat chuan ruai an ṭheh ve leh a; Boruak duhawm lo thleng report a awm lo.
Siaha-ah pawh nimin khan Kohhran tam zawkin kum thar ruai an theh a. Veng hrang hrangah Kohhran zaikhawm thawm a tha hle niin kan Corr. chuan a sawi a, Evangelical Church of Maraland chuan vawiinah awmni khamin ram tana tawngtai rualna hun an hman zui dawn a ni.
Serchhip dist.-a Thenzawlah chuan Lungrang Veng Isua Krista Kohhran leh Thenzawl Vengthlang Presbyterian Kohhrante chuan chhiat tawk chhungkua an neih avangin vawiinah ruai an theh ve thung dawn a ni. - (Corr & PTCs)
Post a Comment