HELLO CHINA, BYE BYE INDIA

~ Vanlalngaia, Kulikawn

HELLO CHINA, BYE BYE INDIA : Poster dêngkhâwng zet mai, khawvel nghawr dawt tham Look East Policy, Hello China tih leh 23.01.2019 MZP kawng zawh a ni a, Hello China, Bye Bye India tih duhna hial lo piang ta mai hian mihlim ho thu khawchang min ngaihtuah tir a.

Kan Independent zawk laia Ṭawi tlanga kan hotupa Pu R. Vanmawia (RIP) thusawi, "India hnuaia State puitling neih aiin China hnuaia Village Council neih ka duh zawk" a tih hunlai te min hriat chhuah tir a. Pu Laldênga'n, "Kan in a kan chuan a ṭhelh nân tuinû pawh kan hmang mai ang" tih chang chawiin China sawrkar puihna dil mai chu Ram leh Hnam dam khawchhuahna ni-a ngaiin Look East Policy bawhzui turin ruahmanna siam a ni zui ta rup mai le! Kan hruaitu chhuanvawr Senator Malsawma Colney, Senator R. Thangmawia (RIP), Maj. General Thangkima (RIP), Brig. General Sapzova (RIP), Brig. R.Sangkawia te chu mission ropui tak pek an ni ta. Brig. General Sapzova (RIP) phei chu Thailand-ah a awm hlen ta nghê nghê a, a thih ni thlengin Mizoram tan thahnem a ngai hle. Ka Salute e. Senator Thangmawia (RIP) pawh mission kal zêl Zofate insuihkhawm lehna bawhzuiin Geneva khawpuiah a Martar ta, Salute ka pe e. Tunah Brig. General Sângkawia ZORO President chuan mawhphurhna a la chho ta, duhsakna sâng ber ka hlân e. Kei, a ziaktu pawh hi mawhphurhna hraw zet mai pek ka ni ve asin le. 

Burma Sipai sawrkar duhlo tute zawng zawng ṭan hona ALLIED FORCE din tûr te, China sawrkar ṭanpuina, Standing Army 50,000 (sing nga) tal training na leh ralthuam famkim dil tûr tein KIA (Kachin Indendendence Army) kaltlangin China ram Yunnan Province-a PLO (People Liberation Army )Headquarters chu ka lum thleng ve râwih a. Chairman Mao Tse Tung cultural revolution sosan lai ber 1968, July - November khân Mizoram kâng hluah hluah mai ṭhelh sak tûrin thla 5 zet ka han châm ve a. Mao Tse Tung-a selected writing lehkhabu te ka chhiar ṭhin a, 'Political Power Grows Out of the Barrel of a Gun' tih chu ka tuipui ve hle a ni. Khawvel ram hranga awp beh, tihduhdah tuar ten an bawh ruih ruih a, chu'ng zîngah chuan ka han tel ve a ni. A khât tâwkin, "700 million Chinese people support Mizo cause" tih chu ka dawng ve ṭhin a, Look East Policy chu fuh hle turah ka ngai a. Mao Tse Tung-a lehkhabu Religion is Spiritual Opium tih chuan Communist ka ngaihdan a paihthla dawrh mai a, Pu R. Vanmawia (RIP) thusawi, "India hnuaia State puitling neih aiin China hnuaia Village Council neih ka duhzâwk" a tih pawh chu ka paihthla ta a ni.

East Pakistan khawpui Dhaka-ah Pu Laldenga'n kum 1969 June thla a Rev. E.L Mendus thurâwn bawhzuiin India sawrkar nên inrem lehna (reconciliation mission) tûra min tirh pawh khan thu tlûkna min siamtir tu chu 'Sakhuana hi Spiritual Opium' tih hi a ni nghê nghê. Democracy sawrkar hnuaiah Kristianna leh hnam him zawka ka hriatna chuan Look East Policy, Hello China tih chu min hnâwl tîr ta zâwk a ni.

Remna palai ber te Assam sawrkarin min man tak avang khân 1986-ah India leh MNF inremna kha a awm thei ta chauh a. Independent sual chhung aiin remna zawnin hun a awh thui ta zâwk a ni. Look East Policy chu theih ang angin ka bawhzui ta zêl a, 'India sawrkar ah Zofate rorelna pakhat hnuaia kan awm hma chuan Political Final Settlement a awm thei lo ang, chuvangin India sawrkar hian Bangladesh a Champion pui ang hian Mizo te hi min champion pui ve law law ula, India sub-continent tan a tha ber ang' ti a rawtna ziak meuha thehlut tûra min ngen angin Bhutan type chu ka rawtna a ni.

Look East Policy hmasa zâwk kha a hun lovah Chin Hills Operation kha tih a ni a, a fuh lo hle a ni. Khawchhak unauten "In hneh leh silo a, in hlawk lo ngawih ngawih a nih hi" min tih sak a. Lt. Chama, Mizo Army huaisen, tuna Home Minister ni ta ngei hi a hretu pawimawh ber te zinga mi a ni.

Central sawrkar an thlâk a, Pu A.B. Vajpayee Prime Minister lai khân BJP hman ṭangkai theih beiseiin BJP- ah ka lut ve nghe nghe a, 'Indian Foreign Policy ennawn a tul' tih article pawh ka ziak a. Hei hi Chairman, ‘Mizoram Committee for Democracy in Burma’ ka nih laia ka ziak a ni.

Tunah Central sawrkar, Pu Modi-a kaihhruai hi hman ṭangkai theih beiseiin 'Kristian BJP sawrkar I din teh ang u' tiin ka sawi mawi ve hman pek a. Chil per pawh a hul hmain 'Sakhuanna hi Spiritual Opium' tih ai maha hlauhawm HINDUTVA thli chhia chuan min rawn nuai ta bawrh bawrh mai a. Hei zet chuan kan hnam Kristianna lungphum a khawih dawtin ka hria. India khua leh tui rinawm, ṭangkai ni turin kan inzirtir a. By accident avâng maia India Citizen ni ve ta mai kha 'MNF ber an lo kîr leh tâkah chuan' tiin India Citizen rinawm ber hial nih kan tum ta a ni. Ram buai laia sawisak, tawrhna rapthlak pui puite rilru nâ pawh a la dam fel hma a, HINDUTVA thli chhiain min rawn nuai ta chiam mai hi Mizo hnam thinlung (sentiment) a khawih na hle a ni. Tunhmaa awm ngai lo, hnam hnatlang, kawng zawh, North East pumpui a kâng ta hluah hluah mai. Kan do ber CAB tih puitlin a nih a, HINDUTVA thli chhiain min nuai mai chuan mithiamte lo sawi lâwk angin Soviet Union angin India Union a keh darh anga, duhlo chung chung pawh kan Independent sup sup mai ang tih chu a hlauhawm ta hle a ni. Hello China tih pawh a ngai kher lo ang.

Kum 83 a naupang ka ni a, ka naupan lai thil tawn te hi thangtharten hmathlir an thiam theih nân leh Hnam dam nân kut khûr dar darin ka han ziak a ni e.

A tawp ber atân ka ngaihpawimawh ber chu thil eng pawh thleng se ei leh bâra kan intodelh nân kan ram ṭha lai ber Cachar Forest kuta awm mêk, Inner Line Reserved Forest square miles 509 hi a ram neitu Mizoram Forest Department kutah 'Pathian leh kan Ram tân' ti meuha din MNF sawrkar hian TOP PRIORITY-ah dahin hmâ la rawh se. Bible Society-ah pawh Life Member a ni tawh nghê nghê. Dân awmsa Foreigner Act., Forest Act, leh SC/ST Prevention of Atrocity Act. te hmang hian RAM LEH HNAM I humhalh ang u.

MIZO RAM LEH HNAM DAM RENG RAWH SE, KA LAWM E.

(A ziaktu Pu Vanlalngaia hi Mizo hnam zalênna suala ramhnuai sorkara War Council Secretary leh Director General - Mizo Intelligence Service a ni.)