JEREMY LALRINNUNGA NUAIH 15, LALREMSIAMI NUAI 20 MIZORAM SORKARIN PE DAWN
25th January, 2019 (MSR) : Nimin chawhma khan 2nd Khelo India Youth Games, 2019 a Medal dawng mi 47 hnenah Sports & Youth Affairs Minister Pu Robert Romawia Royte chuan Assembly Conference Hall-ah lawmpuina a hlan a, Lunglei South Bialtu MLA, Pu K. Pachhunga chuan a telpui.
He hun hi Pu Zothanmawia, State Nodal Officer, Khelo India Youth Game 2019 chuan a kaihruai a. Sports & Youth Affairs Minister Pu Robert Romawia Royte chuan thu sawiin, 2nd Khelo India Youth Games, 2019-a Medal dawngtute zawng zawng leh an mahni hruaitute a lawmpui a. Mizorama infiam mite hlawhtlinna avang hian sawrkar pawhin policy thar a nei dawn tih a sawi a, Mizo tlangval, Youth Olympic Games-a Gold Medal hlawh chhuak Jeremy Lalrinnunga chhuanawm a tih thu sawiin, "Mizoram sawrkarin lawmpui nan Rs Nuai 15 a pe ang" a ti. "India ram huapa Mizo Nula Hockey khel thiam Lalremsiami pawhin Asian Games leh Youth Olympic-ah Medal pahnih a lak avangin Rs Nuai 20 pek a ni ang" a ti bawk.
2nd Khello India Youth Games, 2019 hi Pune, Maharastra-ah 9th – 20th January inkara neih a ni a. Mizoram atangin infiam mi 114 leh team officials 24 an kal a. States leh UT atanga tel hi 36 niin, Mizoram chuan Medal 13; Gold 4, Silver 4, Bronze 5 lain, 16th Rank a ni a, state te zingah Manipur tih loh-ah chuan Medal la hnem ber a ni. Khello India Youth Games-ah hian infiam mi 7000 chuang an tel a ni. - Vanneihtanga Vanchhawng
Post a Comment