HNAMCHHAN HNATLANG: NESO leh MZP huaihawt Citizenship Amendment Bill, 2016 duh lohna lantir nan'Hnamchhanna Kawngzawh' nimin khan neih a ni a, Siaha tih loh district hrang hrangah school naupang leh thalai tam tak telna kawngzawh huaihawt a ni.
Aizawl ah chuan hmun hnih atanga zawh niin, Khatla atanga Vanapa Hall leh Zarkawt atanga Vanapa Hall thleng mi Sing chuangin kawng hi an zawh a. Intawhkhawmna Vanapa Hall kawtah MZP President L. Ramdinliana chuan thusawiin, ram leh hnam chhan a ngaih avangin vawiinah ram tan ke an pen chhuak ta a ni a ti a.
Citizenship Amendment Bill, 2019 chu Mizoram tana a hlauhawm bik nachhan chu Chhim lama Chakma foreigner Sing 3 chuang awm mek te chu he Bill hi passed a nih chuan Mizoram khua leh tui nihna pek an ni nghal dawn a, Mizo thalai te'n chanvo an neih te chu chuhpui an ni dawn a ni a ti a, CAB chu Hindu lal ram siam tumna a nih avangin Kristian te tan a hlauhawm dawn a, Kristian ram a nih angin Mizo te hnuk chah hma loh chu Mizo te'n an dodal ngam tur a ni a ti.
MZP President chuan he Bill duhlohna leh dodalna chu kum 2017 atangin he Bill zirchiang tu tur JPC hmuh a nih thu a sawi a, Mizoram dinhmun hrechianga rawn tlawh tura an tih na chu tun thlengin an la ti lova, an sawmna an bengkhawn duh lo chu India sorkarin North East mite an hmuhsitzia lantirna a nih thu a sawi. Mizoram tlawh miah lovin he Bill zirtute hian January Ni 7 khan Parliament-ah an thehlut a. An zirchianna an thehluh ah hian Mizo te'n an dodal ve na pakhatmah a chuang lo a ni a ti a. Citizenship Amendment Bill chu Mizo mipuite duh dan ni loa passed a nih chuan Mizo mipui te'n Independent sual leh an hreh lo a, ramhnuaia silai put leh chu an hreh lo tih India Sorkar chuan lo hria se a ti a ni.
MZP President L. Ramdinliana hian Mizo mipui zawng zawngin an dodalna an lantir tawh a, NGO Co-ordination Committee hmingin Political Party zawng zawng pawh kohkhawm an ni tawh a, Memorandum in ang tlang pawh an kut ngeiah pek an nih tawh laiin Party Politics inbeih nana lo la hman fo te, party hamthatna atana he Bill hi hmanga ke lo la pen awm te insawisel bansan a hnam tana ke pen rualna hun a nih tawh avanga tawp turin leh he Bill hi Party Politics game a hmang lo turin a ngen a ni.
MZP President chuan Central Sorkarin Mizo te 'aw' an hriat ngei theih nan NGO Co-ordination Committee chuan Mizoram pumpuiah Republic Day chu Boycott a ni dawn tih a sawi bawk. - AIR Aizawl
Post a Comment