REPUBLIC DAY AH PEACEFUL DEMONSTRATION LAN TIR TUM A NI
Citizenship (Amendment) Bill duhlohna lantirna atan Joint NGOs ten Republic Day boycott an tum chungchangah vawiin khan Chief Minister Pu Zoramthanga hovin Secretariat Conference Hall-ah Minister hrang hrangte leh Joint NGOs hruaitute bakah Home Department hotute an thukhawm.
Meeting-ah hian sawihona tha tak neih niin, Joint NGO te chuan Citizenship Amendment Bill an duhloh entirnan leh Rajya Sabha in a pawm loh nan naktuk Republic Day lo awm turah hian tharum tello in lungawilohna lantir an tum thu an sawi a. Sawrkar hotute chuan Joint NGO ten Republic Day boycott an duhna chu an hriatthiam pui thu sawiin, chutihrual chuan Republic Day chu ram pum tan ni pawimawh a nih angin a ni lawmna chu kalpui a tul thu an sawi a. Sipai lammual a Republic Day lawmnaa kal tur zingah VIP leh official pawimawh chin chu duty ten an dang dawnlo a ni.
Chief Minister chuan NGO te leh sawrkar chuan duh thuhmun an neih thu leh amah ngei pawhin Prime Minister leh Union Home Minister bulah Mizoram sawrkarin Citizenship (Amendment) Bill a thlawp loh thu a lo thlen tawh tih a sawi bawk a ni.
Vawiin meeting-ah hian Speaker Pu Lalrinliana Sailo bakah Home Minister Pu Lalchamliana, School Education Minister Pu Lalchhandama, I&PR Minister Pu Lalruatkima, Law & Judicial Minister Pu TJ. Lalnuntluanga leh Sports & Youth Services Minister Pu Robert Romawia Royte an tel a ni. - DIPR
Post a Comment