JASRAM SINGH ~Keimah Taia

Republic Day kan lo hnaih leh ta a, rilruah a kaihhnawih thil a rawn lang deuh a. Ka’n post ve mai mai ang e. 
(Photo no.1-a mi hi 2016-a Delhi Republic Day-a Jasram Singh te nupa thlalak a ni a. Tin, Photo no.2 a Jeep chunga ding, rin biala mi hi amah bawk niin hei hi nikum(2018) Republic Day-a mi a ni.)

Jasram Singh hi Lunghret khuaa 1968 October 31-a Sgt Lalrinthanga(Maubawk) , Cpl. Lalnunmawia(Khatla) te thihna bâkah Mizo sipai engemawzah hliam leh man an tawh tuma a mawhphurtu kha a ni a. Heta Mizo sipaite nena an inkahnaa a chet that(vaiho sawi dan) avang hian mi huaisente chawimawina Ashoka Award hlan a ni a, Republic Day lawmnaah hian regular taka inlan ziahin thlalaka in hmuh ang hian Deputy Parade Commander hnungah mi special te zingah parade Jeep chungah a chuang ve thin a ni.

Jasram Singh hi 1963 ah commisioned niin 16 Rajput ah post a ni a. A hnuah Centre atangin an battalion chu Sikkim ah sawn a ni a. Sikkim lama a mawhphurna lâk(tenure) te a zawh hnuin deputation-in 6 Assam Rifle, Mizoramah sawn(transferred) a ni a.

HE ASHOKA CHAKRA A DAWN PHAHNA, LUNGHRET KHUAA AN INKAHNA CHANCHIN VAI HOVIN AN SAWI DAN:

Mizo Hills, Lunghret-ah hian MNF sipai an awm niin report dawn a ni a, chu chu Captain Jasram Singh chuan chhui zuiin MNF sipai mi 50 vel an awm niin an hre ta a. Chu chu a rang lama bawh zui nghalin sipai Platoon 2 lai nen chuan an thawk chhuak nghal a. Amaherawh chu khaw chhung an luh dawn chuan lambun an tâwk ta hlauh mai a. Amaherawh chu Jasram Singh chu a hmatâwngah lut pheiin a hote nen chuan an bei let a, hmelmate chu an hnawt kiang thei ta a ni. Heta an inbeihnaah hian MNF sipai 2 thiin 6 an hliam a, tin, ralthuam engemawzat an chhuhsak bawk a ni. (Vai ho sawi dan a nih hi aw)

Hemi hnu lamah hian kum tin Republic Day chhim turin a kal thin a. 6 Assam Rifle-a a awm hnu hian Low medical category(fit tawk tawh lo) avangin General Service ah sawn a ni a. Tichuan, 1990 ah Army general service atangin a chawl(retire) ta a ni. Tunah hian an khua Gautam Budh Nagar District, Uttar Pradesh ah a cheng mek a, tunah hian kum 87 vel a ni.

Post a Comment

Powered by Blogger.