Mizo te hian thih hnua in sawi mawi te, mitthi kan sun tak te thatna lai leh mawina lai in sawi sak hi kan tih thin dan a ni kumkhua thin.
Mafaa Zofate Librarian, ziak mite tana inhawng em em mai leh advice pe reng reng thin chawlhna tuikama chawl ta hi engvanga diriam zui ta mai nge i nih?
Zoram hian Mafaa hi a sun a, a thihnaa kal ve thei lo te pawhin mittui kan seng a, a mitmu em pawh a keh hmaa Vanglaini chanchinbua Mafaa chungchang mawi lo taka i ziak duh mai hi eng ang pastor maw i nih ve le?
Zu in mi lo ni tehreng pawh ni se, 'a buan hneh loh zu' i han ti duh ta mai te, vanramah chuan chawltui ningzu a awm tawh lo ang han tih te, A thih chhan tak chu natna dang pawh nise zu vanga natna nei a ni ang i han ti ta mai duh te hi kei mizo tlangval thih hnua thenawm khawveng te sawi mawi thin te zinga mi hian ka hrethiam hrep lo ve.
Mihringte hian hun ropui pathum kan nei an lo ti thin. Kan pianni, nupui pasal kan neih ni, kan thih ni te an ni a, Mafaa ropui hunlai bera a tlin lohna lai a mawi lohna lai i sawi chhuah sak duh hi Pastor inngaitlawm tak zawng i ni lo tih a va chiang em.
Ka lo hriat dan hi a dik em tih zawng ka hre lo. Pu JF Laldailova kha'n, Bible lehlin dik loh te tih kha a ziak a, nangni sakhaw puithiam rual ho khan zu in mi mai mai in lo ti ta mai mai a, zu in mi mai mai nia in ngaih pu JF-a Dictionary buatsaih hi Zofate hian kan va chhawr teh reng em aw!
Zu hi in duh lo bawk a, zu khap a ni leh dawn. Zu chhia a pun avanga thi ta te mawh hi in chungah awm sela, state pawn, ram pawna kan rama zu a awm loh avanga kan mualphona rah hi a mawh in phur ngam dawn em? Whatsapp a lar em em mai Rihdila nuchang pahnih zu rui mualpho vang kha kan rama zu a van tak vang asin.
A buan hneh loh zu tiin ka lakah ngaihdan i lo siam ve ngawt ange, zu hi ka in ngai lo. Zu in mite hi ka ngaisang hek lo. Mahse zu khuahkhirh lutukna vanga zu chhia a tam em em mai te, ram pawna kan mualpho leh tur te hi ka ngaingam lo mai chauh a ni. Thil vang apiang a hlu mai si a. Zu tihlutu te tiin ka la chhal ang che u.
Rev. David Wilkerson chuan New York khawpuia Gang president hlauhawm ber chu a pianthar tir thei tlat. Gang hi awm tawh lo se a ti ve lem lo. America sawrkar hnenah Gang te a awm tawh loh nan hma a la lem lo. Mahse a nun an hmu a, a hmangaihna avangin Bishop pawl, Mau Mau pawl zinga mi tam takin Lal Isua an hmu mai chauh a ni.
Pastor te nun atangin zu in mi tam tak an piangthar a ni, kan pastor ten zu aiin zu in mi te hi tihtakzetin an vei avangin zu in mi tam tak ten Lal Isua hi pan sung sung mai se, zu hi khap ngai loin thil a ni ve mai mai tur.
Mafaa zu in thin nia i ngaih hi vawili chiah i hmuh thu i sawi a, amah tawngtai sak tura i kal thu te, zu a nghei theih nan i tawngtai sak thu te hi han hre ta hlawm zawk ila, zo talk a in inhmuh dan chanchin aiin kan ngaihvenin kan ngaihsan phah daih zawk che in ka ring.
Post a Comment