MAFAA HAUHNAR CHUAN REVD. CHUAUṬHUAMA THLAVANG A HAUH!

MAFAA HAUHNAR CHUAN REVD. CHUAUṬHUAMA THLAVANG A HAUH!

- Little John

Pu Mafaa hian a dam lai khan Revd. Chuauṭhuama hi a fak thu leh, mi dangin an lo hnial pawh a chhan ṭang ṭangna thu hi ka hmu tawh a. Chu chu ka zawng ru char char a. Ka hmu chhuak ta nge nge e. Zolife Group-ah July 12, 2015 khan a lo post thlap tak alawm maw le. Ani kha chuan a ṭhatna lai kha a hmuh sak a, a fak hreh lo reng reng. Hnial kalhtu an awm pawhin Pu Chuaua thlavang kha a hauh ṭang ṭang zawk a. Hetianga a fakna thu leh a chhan ṭang ṭang zawkna thu hailet tur a lo awm hi ka lawm hle mai. Pu Chuaua tak hian hmu se, a lawm ka ring. A hnuaiah hian ka lo dah ang. Sawifiah pahin.

Heti hian a post phawt a, a thuziak pawh hi a chhiarsak nasa tih a hriat. Pu Chuaua ziah tukah a faksak nghal nghe nghe a nih hi.

"Kan berampu retired Revd. Chuauthuama hi a hûk fuh ve leh khauh thin:

"Tunlaia biak ina hnehna puan tih leh “Haleluia” ti-a au rual thup thupte hi a Presbyterian lo a; heng thil hi thenawm kohhran zia kan lak mai mai a ni a; intihhmuh zel chi a ni lo a; lo ti tawh thin pawhin Biak Inah chuan chhunzawm loh a tha ang.

"Biak In hi sapa talna hmun tur a ni lo a, duh duha au chhuahna hmun tur a ni hek lo. Worship hi inthununna (discipline) nen lo chuan a mumal thei lo a, rau ze nawi te te hi Biak Ina tih vek tum tur a ni lo, sihal anga û duhte chu daiah û sela, sakei anga hâhum duhte chu ramhnuaiah hâhum rawh se; chung chu sihal leh sakeite tana hmun siam a ni.

"Nau phuahchawp hring duhte pawhin damdawi inah emaw inah emaw hring rawh se; Biak In hi nau tak emaw nau lem emaw hrinna hmun tur a ni lo a, zahawm taka Pathian biakna hmun a ni. Harhna thlen vanga Biak Ina Pathian biak inkhawm kan ching phul lutuk pawh hi sim a tha.”

Revd. Chuauthuama Vanglaini July 11, 2015"

(Khi khi a thil lo post chu a ni a, an lo hnial ve laih laih a; mahse, Mafaa chuan Pu Chuaua thlavang a hauh sak zel zawk. Mi dangin an lo comment-na kha a chhang zeuh zeuh a, a comment zuina hi en ula, Pu Chuaua hi ani kha chuan a ngaihlu thiam asin.)

"Ama awmna kohhran, ama lo enkawl tawh kohhran a ni a, a kohhran dang zawng zawng pawng hmer vek lo va, mahni hrawn ṭhin kohhran ngei entirnaa a hmang hi a fuh ka ti asin."

(A hnu deuhah heti hian a comment leh a)

"Lalthutphaha thu khi Presbyterian emaw, Baptist emaw, Catholic emaw a ni lo hlauh a; chhawm lam a ni lo. Leiah chuan administration fel tak neih a ngai a; kalphung mumal nei lo kohhran chu rei a ding thei ngai lo vang. Mizoram presbyterian te hi inrelbawlna fel tak nei lo se chu a kal phirna a rei tawh ang chu kan ramah na na na chuan kohhran lian ber a ni a, phel darh nuaih tawh awm tak hi, heti taka a la nghet thei hian Rev Zairema te, Rev Thansiama te, Revd Chuauthuama te ang kan nei hlutzia a tilang a ni."

(Hnial kalhtu an lo lang zel a, tlemin a ṭang na ve ta deuh a, Pu Chuaua tan khan...)

"Dik leh dik lo hi kan lo rel fel hmiah hmiah mai chu a ni hlawm awm si a, Rorelna hnuhnunga Lalthutthleng Var Ropuia thu khian tih tur a nei dawn lo mang e. Hei chu ka pawm lo, te chu kan ti thiang alawm, mi tinin ngaihdan kan nei thiang; mahse, a dik lo, a dik lo ti a thutlukna lo siam zung zung chu kan portfolio piah lam a nih hmel mang e. Kan kohhran kal chiri nuai nuai tur hi ani Revd Chuauthuama te ang mi huaisen hian an khalh ngilin an khalh ngil hram hram chu a nih hi. Lalpa, i berampute hi mipui lawmna zawng leh tlawn ringawt lo va, nghet taka i thutaka ding ngam turin thuam zel ang che."

Amah Pu Mafaa khan Pathian hnenah Pu Chuauṭhuama kha a lo ṭawngṭaisak dim diam tawh zawk asin. "Lalpa, i berampute hi mipui lawmna zawng leh tlawn ringawt lo va, nghet taka i thutaka ding ngam turin thuam zel ang che." tiin.

Zu in ṭhin ṭawngṭaina chu chhanin a awm zawk a nih tak hmel. Pu Mafa, i lo hnutchhiah kim mang e!