PU LALTHANHAWLA HMALAM THLIRSAKNA - TIMES OF MIZORAM

Breaking

Home Top Ad

Post Top Ad

PU LALTHANHAWLA HMALAM THLIRSAKNA

PU HAWLA HMALAM THLIRSAKNA(Chawlhtir nge Chawlh nachang hriat)

~David Sailo
16th January

LalthanhawlaPu Lalthanhawla chuan Congress Bhavan ah thu sawiin "Congress Party thatna tur chuan châwl tawh rawh min tih pawhin ka chawl mai ang" tiin a sawi a, sawi zui teh ang.

PU HAWLA MIMAL -

Zoram tan hian theih tawp a chhuah a, kum 25 a CM chhunga a tih hleih theih loh a awm a nih chuan a theih bak thil tihna a ni tawh ang. Hei bak hi phût chi niin a lang tawh lova, phut chhuah tur awm chuangin a lang tawh lo bawk a ni. Hetiang hruaitu nihna neitha bik hi Mizo pa ah kan tam lova, sawi chhiatna hrang hrang awm mahse Politics khelmual a ni miau a a ken tel a ni ve hrim hrim bawk. Pa ropui tih loh rual a ni lo. A zahawmna, changdang kan lova ram hruaina a tin zawn ve ngar ngarna te hi hriatsakin "Hawlek-a" tih hi ka ka atangin a chhuak ngai lo bawk a ni. Pu Hawla a nih vang chu thuhran nise CM a nih fo tawh avang pawh hian a namai lo a ni.

A HUN LIAM VE TAWH -
Rilru lamin la zuam viau mahse, mahni inhmuh danah in Fit viau mahse a thlangtu mipui zawkin kan hmuh dan hi a pawimawh zawk a ni. "Upa tawh Zoram tan a tih theih ti zo tawh" tih hi kan thlir dan a ni thup tawh a ni. Kum 80 a pelh hnu ah MLA 34 atangin MLA 5 ah a tlakpuia, amah ngei pawh bial 2 ah a tla bawk a, heng hunah tawh hi chuan mi hmuhdan hi inmanin, a kul a tai ber nih a hun tawh loh zia hi in hmu se chhungkua, ram leh Party in an thatpui zawk ngei ang.

MIDANG CHAWLHTIR CHI A NI EM?
"Chawl tawh rawh min tih pawhin ka chawl mai ang" tiin a sawi a, ngaihtuah thuak chuan ropui deuhin a lang a, chik zawka ngaihtuah erawh chuan "Chawl tawh rawh" tih hma chu hruaitu nih reng a tum dawn ni te pawhin a ngaih theih. Tun hnaiah Congress hruaitu lawk pahnih hmaichhana ka kawmna ah chuan "Kan hotute tih dan dan" a ti fo hi kan buaina a ni, ama thutlukna a ni zel tho si a tiin an sawi a, a dik duh hmel viau mai. "Kan Party that zawk nan lo chawl tawh la" han ti ngam tur hi tumah Congress ah ka hmu lo. Amah hian ngun takin thlir se, thutlukna zahawm tak siam se a hmingtha zawk tawh maithei a ni.

CONGRESS PARTY DINHMUN -
Hetiang taka parvul leh changtlung hian a lo hruai tawh a, amah hi Congress tan chuan malsawmna a ni ngei mai. Hawla Auditorium, Hawla Park, Lalthanhawla High School etc a awm thluah ta mai. Tunah erawh a Battery a Low tawh a, a rilru taima mahse a taksa in a zui zo tawh bik lo. Chu chu Party mi thenkhat thlirna pawh a ni ve tawh a, mipui thlirna phei chu a ni leh zual. Hruaitu tharin han kaihruai ve thung se, thurawn pek, ankaihza venpui kawngah tha a la thawh thei ngei ang.

Central lamah Congress hian vûng rawn chhuah thar leh mahse Pu Hawla hnuaiah hi chuan kan Zoramah hian Congress an parvul viau a rinawm tawh loh. Amah a sual vang lam ni lovin tunlai khawvel thlirin an lo rei ve ta deuh a ni. Hei tak hi kan Politician te thil thlir thiam loh thin chu a ni.

CHAWL TAWH TURA DUHSAKNA -
Mizo Political History a hming dai tawh ngai lo tur Pu Hawla hian Zoram tan la tihhlawhtlin ngei ngei turin bat nei tlatin a la inhria nge, ama thu in a chawl thiam lo zawk. Khati taka an tlak chian hnu khan a hminga mawi tal pawhin Banna a thehluh kan hre lova, kum 80 râl ah ram tan thil tih tum ropui tak a neih kan beisei tawh bawk si lo. Congress Party tha tho thar leh nan, Kan ram Party lianah hruaitu thar hmel hmuh beiseina nen, ama nun hahchawlh ve tawhna tur nen tlang reng rawngin tu in nge hruai chhunzawm ang tih lam ngaihtuah buai lovin in hnukdawk ngam sela kan ram hian Politics bung thar kan kai vena a ni ngei ang.

Hetiang hian hruaitu ropui a nih angin huaisen takin hma han hruai leh se, tuna kan CM Pu Zoramthanga leh Politician upa ho tan pawh entawn tur ropui a hnutchhiah anga, mipui pawhin huai takin tawk chin kan la siam sak zel ngei ang.

No comments:

Post a Comment

Post Bottom Ad