REVD. CHUAUTHUAMA'N ZIAKMI BIRUTE A CHO CHHUAK DAWN EM ?

~Lalrinliana Colney

A va mawi em, 'A tlawm hlain a hril kalvari suai a zam chiai e a sakhmela'n' han tihte hi. "Hawlmei rawhnaah lam a thai 'Misual mai ka ni' tiin!". Fam Mafaa thluak hnutchhiah a chhar ta hial em ni!!?

Lalrinfela ChanchinThu leh hla-a, Mizo ṭhalaite hruaitu Arsi a liam hnu lawkah, Vanglaini chanchin bu-a Revd.Chuaṭhuama'n MAFAA LEH KEI (Chawngkhum dan tlang huat loh) a rawn ziah chuan tâwngtu a ngah hle a, ṭhenkhatin a thu ziah an hâlsak a, a tâwngtute chet dan chu, Revd. Chuauthuama chuan nasa a ti ve ngang a ni ang, "A ṭhenin vaivut min theh a, a ṭhenin lungtêin min vawm a, a ṭhenin rawra-in min vawm a, a ṭhenin lungtumin min dêng a, a ṭhen phei chuan lungpuia min delh hlumtîr tumin min lum khum bawk a", tiin social media lamah a sawi a.

Fam Mafaa thlavang hauhtute chuan, a nu tawngka chhuak, “A thih hlimchhawn, rilru mumal pawh kan la put theih loh laia anni Pastor meuhin khatianga Mafaa chungchang, zu vanga thi ang leh nawi taka Function pawimawah che ţhin anga a rawn sawi duah kha chu, a nu ka nihna angin ka zak ngawih ngawih a, ka rilru a na khawp mai,” (- James Ramdinmawia https://tinyurl.com/y7eh93rk) a tih avangin, Revd. Chuauthuama an ânkhumna thu pawh a na dawt dawt hlawm khawp reng a ni.

Amah Revd. Chuauthuama hi ziaktu huaisen a nih avangin, heng an vawmna thute hi, menah a thlak thei niin a sawi bawk.

Kan tunlai Zoram titi pui berah hian, kei chuan rah chhuah ṭha ka lo zawng ve a. Revd. Chuauthuama hi kan hriat angin, ziaktu huaisen, a rilrua awm ang ang ziak pawp mai ṭhin a ni a, thu kha deuh pawh lo ziak se, nghawng ṭha a neih ṭhin hi ka lo thlir ve ṭhin a. Tun ṭumah pawh hian chu mawlh chu ka lo thlir ve tawp mai a ni.

Mafaa thihna hian Zoram khawvela thu leh hla ril min pek tur tam tak a liampui a, chu hmun ruak chu luah tur an rawn tho chhuak ve ang em tih hi, nghâwng fân dawr dawrin ka lo thlir ve ngawt mai.

Mafaa uina leh Revd. Chuauṭhuama demna thuah hian kei chuan comment siam ka tum lem lo, ka lo thlir zawk chu, Mafaa hmun ruak zau tak hi, mi pakhat mai chuan an luah zo dawn lo tih hre chungin, Mafaa dungthula aurawl ri hriat tur a awm em tih ka lo zawng a ni.

Mafaa thlavang hauhtu, thu sep thiam tak tak karah, Puipuii Mizo Diktak -Ziakmi Bîru- hi a la bihruk tlat avangin, a bihrukan ata, a rawn inhailan hun ka lo nghakhlel khawp mai. Mafaa thlavang hauha, a thu chheh vel dan hi, Mizo thu leh hla huangah chuan a ril khawp asin.

Mafaa thih hnu lawka selna ankâ lo chhuak chu nâ tiin, amah Mafaa a rawn auchhuahtir nghal a.

"Muang leia chhâm ang ka zâl hnuin,
Ka thlân vûng lai phutin chil min chhâk khum a,
Ka mit naute keh hmain chéksawlhna tinreng nen,
Vaihna varṭianah hlado min chham khum elo?" tiin, mitthi tawh Mafaa thluak ngei kha a hmang ta emaw tih mai turin, a rawn au chhuak a.

Mafaa chhungte tahna mittui luang thar leh chu nâ tihpuiin,

"Ka ziah zawh loh kawlàwm hmangin,
'Ropuina' silhfen lem inbelin, ka thlàn vûngah pàr i chhuang vel a,
Ka hmangaihte biangah mittui i luan nawn tir amaw?" tiin thiam tak maiin selna ânkâ chu, Ka ziah zawh loh kawlawm hmangin ti meuhin, Mafaa kha, chu kawlawm chu a rawn hmantir ve nghal a.

Mafaa seltu chuan hmangaihna a tlachham hle nia ngaiin,

"Thla em àt hnu leh ramtuilèilote pawh hian,
Duhsakna ṭawngkam chu an hài bik lo asin!
Ka dung chhir zat pawh hmangaihna lipui la hleuh lo hian,
Ka khawhâr chhan i hrethiam tehreng emaw chu?" tiin rilru na takin a au chhuak a.

A au chhuahna zawng zawng ka thur chhuak vek dawn lo, a thu chheh hi a mawi vel vek mai, in diriamna thu chu duhtawk tawh ila, mawi ka tih zual chauh ka'n thur chhuak ang e.

Amah seltu chu Vanram a lo thlen ve huna Van nun an lo chenpui dan tur hetiang hian rawn auchhuahpui leh ta.

"Kei zawng ka damlàini aliamin,
Ka khualzin kawng ka zawh tawp ta,
Chawlhna tuikâm i lo la thlen ve hun chuan,
Mi hrâng vâlrual kal hmasate nen pialrâl kawtchhuahah,
Khawngaih chhandamna hla mawi ber sa chungin,
Khuang nufa nen pialral sûtpui vuanin,
Kan lo hlân na'ng che Van Lal uaiin thlûm tui ber chu.!!!" tiin.

A la duh tawk lo. Mafaa, thu leh hlaa mi khawhar chu *MÀFA LAWNG MI KHAWHÂR !* tih thupui hmangin a rawn auchhuahtir leh ta.

"Kùtpui a ṭiak, ni bî a herliam,
Lâ an lâ reng lo, Vâl an vâl reng lo an ti maw?
Kha keimah Hauhnar keipui thlawi lungmawla,
Kalvari uaiin thar ruiin ka pai ṭiang ṭiang Lalnunnema tualah,
A thlûkah vàl ka buai ve lo ka chan tawk tur lah bo lo,
Ka duhsam ber ka rauthlain a tho vel e, Ziakfung chawi laisuih thai thiamte." tiin van nun chena a hlim zia thiam takin a septir vel a.

Amah seltu nen chuan thiamna lamah inthlau hle mah se, piallei thuah riat atangin a ziakfung kawlawm chu rawn hmang chhuak lehin ;

"Ka zawt nawn dawn lo ve ka uang ve lûl lo ve,
Uan pui tham degree tlar tur ka nei ve hek lo,
Ka neih chhun kawlawm tlawmte thaikawi palai hi,
Ka thai zel dawn piallei thuahriat hnuaia'n.
Ka lai-ah hming chhâlin an pau vel maw,
Pial thìn thèn tlânga buhtlei sîn awrh hote,
Kanan uaiin tih pun kha an rui em ni,
An hlìm san poh leh alang thui mai mai e an vawk chaw bêl" tiin.

A seltu chu Pathian thu zir sang a ni. Mahse a zir san chhan anga awm lo nia hriain, hetiang hian a rawn auchhuak leh ta.

"Hei hi em ni kan zir san chhan chu le,
Heti-ang hian em ni kan lo zir ṭhin chhandamtu nunchan hi,
Kha kha em ni in sawi fo ṭhin thlarau rah chu?
Saw saw em ni i malsawm dawngtu mittui sûr si saw!
Dikna..dikna..tlawmna..tlawmna ti-a an sel sup sup tak che u hi!" tiin mite mittui tlaktirtu zawk niin a hmu a.

Buanglienkunga khan miin sum ru-a an puh pawhin thiamthu sawi a tum loh thute nen lam hetiang hian a rawn chham chhuak leh ta.

"An sawi fàm Bounglienkung rosum ru-a an puh ni chuan,
Kalvari lam a hawia a chhandamtu hmel hmuin,
A hril thei lo a thiamthu a tlantu hmaah,
Tlawmah tlawm luat a dàwn lo, zahah zah luat a dàwn hek lo,
A tlawm hlain a hrîl kalvari suai a zam chiai e a sakhmela'n,
Hawlmei rawhnaah lam a thai 'Misual mai ka ni' tiin!"

A va mawi em, 'A tlawm hlain a hrîl kalvari suai a zam chiai e a sakhmela'n' han tihte hi. "Hawlmei rawhnaah lam a thai 'Misual mai ka ni' tiin!" tia, a meihawl rawhna a hla phuah lar takte kha, thinlungin kan sa ve vawng vawng mai alawm.

Mafaa chuan misual mai a nih inhriain, Isua thisen far chauh lo chu, chhuan tur a neih loh zia hetiang hian a rawn auchhuahpui leh bawk.

"Kei zawng ka dai kai tawh hnu ten nitina,
A hliam nawn fo ṭhin nunkhawhàr mai ka ni,
Ka hàhum thawm ring mah se, ka nunin tu a làwm lo ve,
Ṭhat tum thei si lo hringnun hrualhruiin a zem ât,
Tuifinriat kama lawng mi khawhâr ianga,
Vaihna varṭiana thlaler tuivalawng zai chhawna,
Mahni pawh in ngaidam thei lo Eden natna vei hnu,
Khawngaihna avang chauha chhandamna hla mawi sak ve chàka,
Biakbûk tlar hnung kil thim lai chuh ṭhin,
A kut kilhna thirkhen lo dawm puia,
Hlîng lukhuma thisen far chauh lo chu;
Chhuan tur dang reng nei lo, 
Sikul chhe chhuak ve mai ka ni e!"

A va mawi tehreng em, inngaihtlawmna aw rawl hi chu. 'That tum thei si lo, hringnun hrualhruiin a zem ât', han tih te, 'Khawngaihna avang chauha chhandamna hla mawi sak ve chàka,
Biakbûk tlar hnung kil thim lai chuh ṭhin', han tihte hi, Amah Mafaa kha han chan ila, mittui a ko chhuak thar leh thei asin.

A sei lutuk dawn, duhtawk phawt ang. Mafaa kha lo tho leh se, he 'ziakmi biru' au rawl hi a hriat veleh, zanlai pawh nise, ke chhep chhuak theia chakna a neih phawt chuan, a zawng chhuak ang a, "Lo kal rawh, Zofate thu leh hla lipuiah i cheng dun ang hmiang" tiin, a ban a kai nghal ngei ang.

Revd. Chuauthuama thu ziak hian, he 'Ziakmi biru' hi a kar chhuak a, a bihrukna ata lo chhuak hlen se kan va ti em.

Puipuii Mizo Diktak -Ziakmi Bîru-, i bihrukna ata kha lo chuak la, Fam Mafaa ziah zawh loh kawlawm kha, a bawmah khung leh mai lovin, ṭahna hla mai ni lo, zofate thu leh hla ti hausa turin, rawn hmang chhunzawm ngei ang che.  

Post a Comment

0 Comments