- James Ramdinmawia
“Hrilhlawkna ka dawn : Mizoram Synod hnuaia Pastor Bial zawng zawng deuhthaw-in tunah hian Bial KȚP Conference kan hmang mek a. Kristian nula leh tlangval, khawmpuia tel te thlalak mawi tak tak Facebook, Whatsapp leh Instagram lamah te kan hmu leh chuai chuai dawn. Mahse thlarau lama an hlawkpui thu post erawh a vâng leh pharh ang!
‘Kristian Țhalai chu a thatchhe tur a ni lo, a hlemhle tur a ni lo, a zelthel tur a ni lo, mahni ke-a din a tum tur a ni, mahni a inhmangaih angin a vengte a hmangaih tur a ni, etc.’ tih te hi han paw haw țheuh ila kan ram hian hma a sàwn zawt ang maw le!”
Khi thu khi Pathianni (27.1.2019) zinga Facebook-a ka post a ni. Hmun dang ang bawkin Electric Veng (Aizawl) Pastor Bial KŢP pawhin 25th – 27th January 2019 chhungin Bial Conference kan hmang a. Pathianni (27.1.2019) chawhma Inkhawmah khan Bialtu Pastor, Rev. P.C. Pachhunga’n thuchah a sawi. Mak tak maiin kan Pastor hian Facebook-a ka thu post last para zulzui deuh hi Sermon Thupui-ah a rawn thlang chat mai nia! “Ringtu chu a taima tur a ni, a thatchhe tur a ni lo, thawh hreh a nei tur a ni lo, a hmaa tihtur awm apiang taima takin a ti miah miah mai tur a ni, midang thawhchhuah sa ring ringawtin a khawsa tur a ni lo,” tiin uar takin a sawi a ni.
Kan Pastor Sermon hi a Nationalist hle bawk. Mizo ţhalaite tan thawh tur a vâng tia kan sawi fo chungchangah Bihar, Myanmar leh Nepal aţanga rawn lutte’n thawh sèn loh an neih thu sawiin thawh hreh leh hna hniam anga ngaih kan ngah lutuk a vei thu a sawi a. Pu JF Laldailova thuziak sawichhuakin Vai Sipai ho chuan an awmna hmun an sawn dawnin Kuli (puakphur) an ruai a, inthiarna tlabal pawh an thawm peih lo, hnam hnuaihnung leh rethei deuhte thawh turah an dah zel tiin Sap Sipai rawn lut ve te erawh chuan an awmna hmun an sawn dawn pawhin Kuli ruai lovin anmahniin bâwr takin an in-ak mai a, inthiarna tlabal leh siamţhat ngai pawh anmahni vekin an tih mai thu a sawi. Hnam changkang zawkte’n thawh hreh an neih loh thu uar takin a sawi a ni.
Japan ho taimakzia sawiin kum eng emaw zat kal ta khan hna an thawh nasat lutuk avangin Sports Good Company ho Market a tlahniam nasa a. Chu’ng Company ho chuan ţhalaite’n infiamna hun an neih theih nan leh an Market a rawn arh chhoh leh theih nan tiin Sorkar hnenah hnathawh hun pawt tawi turin an ngen a. Sorkar pawhin infiamna leh hriselna a lo ngaihpawimawh avangin hnathawh hun, ban hun chu darkar khatin a titawi a. Mahse hnathawktute an lo lawm hauh lo; hnathawktu inzawmkhawm chuan ban hun pawh hmà a nih rau rau chuan ţan hun darkar khatin pawh hmà ni ve leh thung se, tichuan hnathawh hun pawt tawi lovin ruahmanna a siam theih ang tiin Sorkar an ngen ve leh a ni. Chutiang khawpa hnathawk nasa leh hnam taima chu hlawhtling tlak leh dingchhuak tlak an ni. Kristian ţhalaite fuihna ţha tak a va ni em!
Indopui Pahnihna-ah nasa taka Japan ram chhutchhiat a nih thu sawiin, chumi hnu-a an ram siam ţha a, tungding leh tura an ţhalaite khawthlang ram thiamna leh finna zir tura an thawn thlak ruih ruih thu a sawi a. An zìrlâi an zir zo, lawng hmanga tuipuia an ram lam pana an haw kawngah an Certificate te tuipuia an paih vek thu te, chu’ng Certificate te chu an ram tan ţangkaina nei lo-a an ngaih thu te, an ramin a mamawh ber chu an thinlunga thiamna tak tak an zu zirchhuah chu a ni tih te a sawi a. India ramah hian thiamna tak tak aia Certificate leh Marksheet kan ngaihpawimawh zawk thu te, chu chuan chhawrtlak loh mithiam, Certificate leh Marksheet nei ţha ringawt a chherchhuah hnem thu te sawiin, Japan ho anga ram leh hnam hmangaihna thinlung nena chhawrtlak thiamna tak tak nei tura ţang nasa turin ţhalaite a fuih a ni.
Isua leh Tirhkoh Paula te kha mi taima, hna thawk nasa an nih thu uar takin a sawi a. Kan Pathian Thu-in rim taka thawka ei hmu tur kan nih thu min zirtir thu te, taimak leh thawhrim chu a Pathian Thu hle tih te uar takin a sawi. Tirhkoh Paula phei chuan ringtute chu taima tur leh nasa taka hna thawk tura min fuih thu sawiin amah Paula ngei pawh kha rawngbawla a chetvelna leh a zinnaah te pawh mi thawhchhuah sa ringa nuamsa taka rawngbawl a nih loh thu te, a rem rem thawka a intodelh ţhin thu te a sawi bawk. Kristian ţhalaite chu kan taima tur a ni a, thawhchhuah neih kan tum tur a ni, thawh hreh nei lovin hna hniam leh hna sang thliar hrang lova kan hmaa tihtur awm ang ang, inchhung sekrek khawih leh khawlai phiah fai thlengin kan ti mai tur a ni, mi thawhchhuah sa ring ringawta khawsa tur kan ni lo, tih lam hawiin a tlangkawmna a siam a ni. Mi ţhenkhat tan ngaihthlak a nawm tehlul nen ka hnunga ţhute kha chuan lem nuam an ti chiah lo a niang, “A va ninawm tawh, a va rei tawh,” an ti sar sar a, lem nuam ti lo fe fe chu an kat nuk ngei ang!
Pastor-in Bial KŢP Conference-a hetiang thupui a han thlang chat mai hi ka lo lawm ru veng veng mai. Politician te’n an sawi chuan, anni State intodelha min siam thei lo leh ţhalaite eizawnna min siamsak thei mang si lo, eiru ţun ţun si te’n min fuih ve khanglang a, tiin lem har kan ti a. Bureaucrats te’n an sawi lahin eiru inla milian thusawi tiin kan ngaisang bawk si lo. Kohhran leh Kohhran Ţhalai Programme hi hetiang sawina Platform ţha ber a niin ka hre ta. Kohhran Ţhalai Hruaitute pawh hian an sawi uar a va ngai ta em! A dik tak chuan nula tlangval mut nachang hre lo, zing thawh nachang hre bawk lo, online tluk tluk, chhungte thawhchhuah sa leh eirawngbawl sa ei a, thuamhnaw manto leh changkang tak tak inbel hi kan va ţhahnem ta em! Kohhran Ţhalai activity-a kan tel tam deuh a, zu kan in loh bawk chuan Kristian ţha takah kan inngai leh mai. Hei hi Kristianna aţanga thlir pawhin Kristian ţha tak nihna chu a ni mawlh lo.
Kan ram ţhalaite kan harh chhuah a va hun ta em! Nu leh pa pawhin fapa / fanu fel kan tehna criteria hi thlak a hun tawh hle a ni. Direct IAS, IPS, etc. pawh kan neih hleih theih tawh loh hi. Hetiang renga kan kal zel a nih chuan kum 20 lo kal leh turah chuan hnam dangin min awp bet ngei ang a, kan hnam hian boralna kawng kan zawh riai riai ang. Chutiang chu a thlen loh nan i harh mawlh teh ang u!
(Vanglaini, 27.1.2019)
Thu belh : Rev. P.C. Pachhunga hi kan naupan lai khan Kawlkulh Pastor Bial vawngtu (1990-1996) a ni a. A nupui, Pi Puii hi Middle School-ah kan zirtirtu a ni țhin!
Post a Comment