Mizoram Sorkarin hun rei tak chhung zu hralh chhuah phal loa ‘Dry Day’ a puang chu Gauhati High Court Mizoram Bench-in a titawp.
Mizoram sorkarin an zu chhekkhawl sa te hralh chhuah phal loa ‘Dry day’ a puan khum vanga lungawi loin sorkar phalnaa sap zu chhek khawltute leh a zuarchhawngtute’n Gauhati High Court Aizawl Bench-ah sorkar thupek hi an khing a. An thubuai hi vawiin khan Gauhati High Court Judge, Justice Michael Zothankhuma’n ngaihtuahin, Mizoram Excise & Narcotics Deptt. Commissioner-in tun thla ni 14-a March ni 15 thleng Dry Day a puang chu tan chhan bulbal nei lo nia sawiin a hnawlsak a. Sorkar chu phalna neia zu chhekkhawltute chu an phalna neihin a huam chinah zu lak luh leh hralh chhuah phalsak turin a hriattir nghal bawk.
Zu chhekkhawlna (Bonded Warehouse)-ah hian kumin January ni 18 thleng khan Cheng Vbch 15 dawn lai man Zu a tangkhang niin a neitute’n an sawi a. Hetianga sorkarin dry day puan hnana tihtawpsak a tum ta mai hian sum leh pai nasa takin a hlohtir dawn niin an sawi.
High Court chuan sorkarin dry day a puan chhan ber chu zu khap burna dan kalpui an tum vang nia a lan thu sawiin, inthlan dawna an manifesto tihhlawhtlin an tumna kawnga phalna neia zu zuarte tuarna tur a ngaihtuah tel lo chu thil dik a ni lo, a ti a. Zu khapna Dan siam a nih hmaa hman an tum nghal mai chu Dan ding lai kalh a ni, a ti.
Dry day an puan chhan ber hi Republic Day leh Chapchar Kut vuakveta boruak tha a awm theihna tur nia sorkarin a sawi chu Republic Day hman zawh fel a ni tawh a, Chapchar Kut lah a hun a la hlat deuh avangin High Court chuan thu awmze nei loah a ngaihsak a. Council of Minister chuan eng thu pawh rel se Governor-in a pawmpui phawt loh chuan state sorkarin a bawhzui nghal tur a ni kher lo a, state sorkar pawh hi he MLPC Act., 2014 hian a phuar ve tho a; he dan hi a la ding reng a ni, High Court chuan a ti. AIR (Aizawl News)
Post a Comment