SUIHLUNGLEN
By : C. Lalthazuala
Phuahtu (A thu leh a thluk): RTC Lalduhawmi
Satu: RTC Lalduhawmi
Zorimawi chanchin hi Sap Missonary ten Mizo te sakhaw thar a min inleh tir vek hnuah a kalphung a danglo theilo a ni ta ber mai a. “Traditional tone” chu “western tone” in alo inthlak ta vek a ni ber ang chu. kan hmanlai hlathluk chi hrang hrang te chu hluihlawn anni ta a. a vawna vawnthat hial lo ngaita in, Kutni vangthla ah bak sak pawh anhlawh talo kher mai.Western Music chu Mizo te Music thar alo nita a, Khawvel tukverh a dak phave turin alo pawimawh bawksi a, “Western Music” kan Culture thar in kan Mizo nunphung hrim hrimah hmun a changthuk ta hle mai a, kan nunphung a kan senglutve ta tlat hi a pawi lemlo khawp mai.
“Western Music” nghahchhana hmang a hla leh a thluk han phuah te, zaidan kalphung hrim hrimte, Mizoten kanlo chinve tak hnuah Music Instruments te pawh kan hmangtam ve ta telh telh a, kan duhtui chho ve telh telh bawk a, Zaithiam leh hla phuahthiam hmingthang Saikuti te kha chuan RTC.Lalduhawmi te hla phuah leh thlik siam mawi dangdai tak tak te hi han hrephave ta se, a mawi dangdaina lai tak te hi a varpawh pha tawh ngut lovang. A chhan chu, RTC.Lalduhawmite chuan hlaphuahnan leh a thluk siamnan “Western Music” leh “Western tone” ke nghahchhanah an hmang tlat mai a, Zorimwi hmasawn chhoh zelnaah hian hmanlai hlathluk kalphung leh tunlai hlathluk thliarhranna tha tak chu Traditional Tone leh Western tone ti a sawimai hi a tha ber ang.
Zorimawi khawvel, lengzem huang bik hansawi ta lawk ila, hlaphuahthiam ropui leh hmingthang Vankhama Fanu Vanlalruati chuan Kum 1969-1979 chhung chu ro arel a ni ringawt mai a, a zai dan kalhmang changkang tak chu lehkhathiam rual lawm chi tak alo ni bawk nen, Sawrkar ni pawimawh leh puipunna zahawm leh lianthamah an thehlar hle mai bawk si a, a lar rual pui te el phakloh boruak a kengtel lo theilova, atan pawh a vanneihthlak hle awm e. Kum 1969 a tang a Zorimawi khawvel, elphak ruallohva Vanlalruatin a awpbeh lai mek chuan zaithiam tharlam zawk, hmeichhe zaithiam Lalneihthangi, Lalrinmawii, Sailothangi Sailo, RTC.Lalduhawmi te chuan Zorimawi lipui an rawn hleuh ve ta a, anni Pali hi 1970 chawhnu lam leh 1980 chawhma lam hunlai vela Zorimawi khawvela amaka maka Rimawi thlipui rawntlehtir tu te anni. A hunlai na na na chuan mahni tawk a a ber tlingthiau anni a, zaidan kalhmang in anglo vek, zaidan changkang tak nivek bawksi, Mizo te hlathluk lunglen zawng thlawh bosan chuang silo, Zorimawi huang a zaidan kalphungthar leh dangdai rawn sengluttute anni a, an fakawm hle a ni.
Khawvel nghawrnghing tham zaithiam hmingthang tak takte pawh hi hlaphuahthiam anni vek kherlova, hlaphuahthiam ni bawk, zaithiam ni bawk te hi chu Siamtu Chung Pathianin talent pahnih a dawntir te anni bik a, an vannei em em bik a ni. Zaithiam hmingthang RTC.Lalduhawmi pawh hi hlaphuahthiam hmingthang ani tel lehzel hian Zorimawi khawvel huangah a boruak a tinungrei bik em em mai a, hlaphuah mai bakah thu ziakmi alo ni leh zel mai te hian a chanchin sawitur leh ziahtur hi a titam telh telh zel dawn bawk a ni.
Post a Comment