~K.Remruatfela
Editor – Dan Hriatna (Legal Journal)
Ni 6 Jan, 2019 (Sat) Vanglaini Chanchinbu chhuaka Revd Chuauthuama`n ama column-a ‘Mafaa leh Kei’ (Chawngkhûm dan tlang huat loh) tih a artcle ziah kha ka lo chhiar ve a. A tirah chuan, ‘Pu Chuaua hian a ziak hun lo mah mah a ni’, ka lo ti rilru ve a. Amaherawhchu, a hnu zela Pu Mafaa thlavang hauh vang pawh ni hran lo, a hma atanga amah lo era lo itsk tawh tu, ‘Rulin ka mei rap se, chu ila’ tih rilru pua lo thlir reng tuten hetia kan Kohhran Pastor chhuanvawr ar chukka tui lo khawpa an lo chhuah chuai chuai takah chuan he article hi ziak lo theiin ka inhre ta lo!
Pu Chuaua hi kum lamah ka pu rual hial ni mah se, tuina kawng inang kan nih avangin kan inhmu ve zeuh zeuh thin a. A pualin Lehkhabu hialte kan siam bakah Group te pawh kan siam a, chungte atang chuan a mizia pawh hi hre chiang ve tawk viau chuan ka inhria. A thuziak leh thusawi ringawt ngaithla thin tan chuan mi nellawm loh leh hrohrang na deuh anga a lan laiin a taka han belhchian chuan a nelawm em em a. Amah belchiang apiangin chu a nihna chu an hrechiang! A nuna ngaihsanawm ber chu mi principle nghet nei a nihna leh keimah thoa literary criticism ngaisang mi a nihna hi a ni. A thuziah reng renga mi hnial remchang tak tura, hlauh leh tim nei miah lova thu a chheh thin avang hian mi tam tak chuan mi chapo leh thinchhia, thinrimna alhchhuaka thuziak thi angah an ngai thin a. Chutiang ngaihtuahna atang chuan Vaglaini Chanchibua Mafaa chugchang a ziah pawh hi mi tam tak chuan an thlir niin a lang! Mahse, chutiag chu a ni hauh si lo!!!
Mi tam tak chuan Pu Chuaua te, R.Vanlawma te, HK Bawichhuaka te, M. Lalmanzuala te, Rev. Thansiama te ang hi a mizia a hriatthiam loh avangin mi chapo leh rilru diklo pu angah kan ngai thin a. An mizia ang hrethiamtu chu mi tlemte chauh kan nih hmel! Keimah lam han insawi lut lawk ila, keipawh hi ni 14 December, 2013 khan Bangalore hmuna Zirlai Pawl hruaitu ka nih chhunga ka experience chu bu aga siamin a ‘Ka Tlanchhe Dawn Lo’ (My Life in Bagalore) tih bu ka chhuah ve a. Chu ka Lehkhabuah chuan mi tam tak hming ziak langin Literature hausak nan thu leh hla hmangin min rawn chhang let ngei se tih beisei ru chungin ka kap fiam zeuh zeuh hlawm a. Chung ka mi kah fiamte nena kan inkar leh kan tum lam hre ve lem lo te chuan a mimalin ka bei ta chiam chiam hawm emaw tiin huat pui tawk an lo awm hlawm a. Kei leh ka mi kah fiamte rilruah erawh chuan literary value tih san nan thinlung inpawh tak leh inhuatna engmah awm lovin kan han inkap fiam a ni si a. Kawng lehlama ngaihtuah chua a nuihzatthlak duh lek lek mai. Chutiang bawk chuan Literature ka sawi apianga Zofate zinga hmig dai tawh lo tur leh amah ang hi chhuak leh thei tur ang pawha ka ngaih loh, Pu Mafaaa kha lo thovin lo dam leh se, he article hi chhiarin kan boruak hi lo hre ve se la chuan huat a hnekin a nuih a zat ve ngawt zawk ka ring!
Pu Chuaua te ang hlutna em em chu mi huat leh sawisel pawh pawisa lem lova huaisen taka a nih ang rawt rawt a thudik an auchhuahpui ngam thin hi a ni. Mi tam tak, Kohhran hruaitu, ram hruaitu leh Khawtlang hruaitu te chu kan dawihzep luat vang leh mipui lawm zawng nih loh kan hlauh luatah kan rilrua awm angte leh kan vei zawng te pawh kan sawi chhuak ngam lo thin a. A dera nung tam tak kan awm thin a, chung chuan kan ram a eichhe mek zel a nih hi! Pu Chuaua te rilruah erawh chuan ‘Ni chu ni’;/ ‘Ni lo chu ni lo’, a ni tawp a. Thu zep tit tet leh thukhuh a awm ve lo va. Huaisen takin dikna an auchhuahpui ngam thin a, hetianga mi rilru paukhauh leh lang tlang ngamte hi mi tak tak zawkte an ni a, an hlu takzet a, an hlutzia kan la hrethiam tawk lo mai mai chauh zawk a ni. Kei zawng zan khat mit chhin tawk tur chuan Pu Chuaua hi ka ui ber a ni hial awm e!!!
Post a Comment