ASSAM RIFLES SAWN CHHUAH CHUNGCHANG - TIMES OF MIZORAM

Post Top Ad

27 Feb 2019

ASSAM RIFLES SAWN CHHUAH CHUNGCHANG

Nimin piah khan Ministry of Home Affairs chuan Assam Rifle te chu tuna an awmna hmun atanga Zokhawsanga in sawnchhuak tur a tihna order an chhuah a. An lehkha ah chuan ni 31/05/19 hmaa insawnchhuak tura tih a ni.

Assam Rifle sawnchhuah chungchang ah hian inhnialna a nasa hle a. MNF Ministry hmasa khan AR ho hi an awmna atanga sawnchhuah turin theihtawpin hma an la a. Kum 2008 April thla khan khatihlaia Mizoram Chief Minister Pu Zoramthanga chuan Central Sorkar-a Union Home Minister chu zuk hmu in a ni hian Assam Rifle te an ram luah atanga sawnchhuah phalna an pek chu a rawn hawn a. Hemi bakah hian Assam Rifle sawnchhuahte awmna tur an ruahman Zokhawsang-a an in benbelna atana an chenna in tur leh thil pawimawh dangte (residential and non residential) sakna tura pawisa sanction na Rs.145,17,30,000/-(cheng vaibelchhe 145 nuai 17 leh sing thum) lehkha chu Home Minister hian CM hi a hlan nghal bawk a.

Tichuan hma an la a, an sa ta nghal a. Mahse kum 2008 Nov. thlaah State inthlanpui hmachhawnin Congress sorlar a lo piangta a. Congress sorkar hian hma la chhunzawm duh lovin an pamtul ta a ni.


CM hlui leh tuna MPCC President Pu Lalthanhawla chuan "Khawpui chhung atanga Sipai sawn chhuak ka hre ngai lo," tiin an sawn chhuah loh tur thu a sawi kha kan la hre vek awm e.

Aizawl Assam Rifles campSorkar inthlakin MNF chuan an Manifesto ah hian AR sawnchhuahna chu an tel reng a. Nikum inthlanpuiah MNF sorkar thar piangin an hmalak tawhsa, Congress sorkar in an tihhlawhtlin theih, mahse an chhunzawm duh lo chu an buaipui leh nghal ta char char a. An sorkar atanga thla thum pawh la tling lova chu a hlawhtlinna chu an hmu ta a. Kan CM Pu Zoramthanga hmalakna a zarah Assam Rifle te chu Zokhawsangah sawnchhuah an ni dawn ta a ni.

Hemi chungchangah hian Congress Zirlai Pawl NSUI President chuan Sorkar thar hmalakna hi pawm thei lovin midang hmalakna avang a nih thu a lo sawi ve mek bawk a. Heta a tan chhan NGO Co-ordination a tih hian lo bawhzui ta se MNF hma khan sawnchhuah an ni daih tawh ang.


A sawitupa ngei RB Lalmalsawma, MSU President chhuak ta chiah leh tuna Congress Zirlai Pawl NSUI President nita hian politics thilah hamthatna zawngin sorkar hmalakna hi sawi nawi tur a zawng mai niin a lang. Congress a a luh hma, NGO Co-ordination a a tel lai khan engvangin nge hma la si chuan an hlawhtlinpui loh? Congress Party hian ram an vei tak tak lo, khawtlang hmasawnna an ngaihtuah loh zia leh NGO hmalakna an thlawp lohzia a sawina zawk mak niin a lang. NGO Co-ordination khan hma an lo la a nih chuan Congress Ministry khan an hmalakna kha a buaipui peih lova, a enliam vel mai mak tih a tilang chiang zawk hle.

MNF Party in mipuite a ngaihtuah zia leh ram hmasawnna a thlir thui zia te, NGO Co-ordination hmalakna chu kan ram tan thil tha a ni tih hriaa a bawhzuina te hi a fakawmin a tichiang hle a. NSUI President thusawi atanga thil chiang tak lo lang chu Congress Sorkar in ram a vei loh zia leh MNF Sorkarin ram hmasawnna a ngaihtuah zia a tihlanna niin a lang. Congress Sorkarin NGO hmalakna a hriatpui that duh loh zia a tarlanna mai niin a lang. Politics game a khelh tumna nasa lutukah an party Congress chu a timualpho der niin a ngaihtheih. @Chhana Vidìc Vanchhawng

No comments:

Post a Comment

Post Bottom Ad