Vanglaini chanchinbu palai in lifetime vehicle tax chungchanga Transport Minister a kawmnaah Pu TJ Lalnuntluanga'n, " "Road tax-ah hian option (duh thlan tur) pathum - kum 5, kum 10 leh kum 15-te thlan theih a ni dawn" tiin a sawi a. Transport Minister in Mizoram sorkar thuneihnaa lirthei chhiah pek dan tur thar a sawi hi in lo chik chuan Congress sorkar-a Chief Minister leh Transport Minister in kum 15 lirthei chhiah vawi khata lak tur an tih kha dawt a ni tih a rawn tichiang a ni.
May 19, 2016 khan Mizoram Taxation Service Association (MITSA) General Meeting vawi 10-naah Chief Minister hlui Pu Lal Thanhawla'n khuallian niin hun a hmanpui a. Chutah chuan CVJAC-te nena an inkawmnaa lirthei lifetime tax lak chungchang a sawi a sawichhawng a. Chief Minister sawi dan chuan lirthei lifetime tax kum 15 chhung atana lak nghal tur tih kha "sawrkar laipui thu chhuak" a ni.
Oct 23, 2013 dar 11.00 AM-a NASC Complex, DPS Road, Pusa, New Delhi-a Transport Development Council meeting neih a nih khan lirthei chhiah zat tur te sawiho a ni a. Chutah chuan Ministry of Road Transport and Highways in lirthei lifetime tax 6% chu 2 wheeler, car leh LMV ah te lak turin "recommendation" a siam a. Meeting neih zawhah khatih laia Road Transport Secretary Pu Vijay Chhibber-a'n sorkar thuchhuak nilovin sorkar laipuiin state tena an hman atana a rawtna a nih thu chiang takin a sawi a, "These are recommendations to the states, we are trying to prevail upon them" tiin news correspondent te hnenah a sawi a ni. Meeting-a tel tur zingah State Transport Minister te, State Principal Secretary (Transport) te, State Transport Commissioners te an nih avangin Mizoram sorkar Transport Minister leh sorkar hotu lian te pawh kha meeting ah khan tel tura ngaih an ni.
Pu Vijay Chhibber-a sawi leh chu central sorkarin state sorkar hnenah 6% a ni emaw engzat pawh nise lifetime tax lak hi vawi khatah a ni emaw a "instalment" pawhin a ti lui thei lo tih a ni a. A sawi nachhan chu sorkar laipuiin India constitution hnuaiah state in thuneihna a neihna lai a va tihbuai theih loh vang a ni. Hei hi federal system kan neih kalphung a ni a, kan Transport Minister bawk hian a chiang em em a ni.
Chief Minister-in Taxation hotute hmaa a sawi "sawrkar laipui thuchhuak" tih kha Indian constitution leh Road Transport Secretary thusawi atang tea ngaihtuah chuan thil awm theilo a ni a. Sawrkar laipui khuan Mizoram sawrkar hi kum 15 chhung atan vawi khatah lirthei chhiah lo la rawh u tia thuchhuah kha vawiin thlengin hmuh tur a la awm loh avangin a sawitu Chief Minister khan thudiklo a sawi tihna a ni a. Hre reng chunga thudik anga a sawi a nih phei chuan dawt muhlum a sawi tihna a ni. Kan Chief Minister chhuak ta khan dawt a sawi mai nilovin chu dawt tlawhchhan chuan chhiah tam tak a la tihna a ni.
Khami a sawi tukah khan Congress party mi leh sa te hmaah, "hmun dang aia Mizoram kawng a chhiat avangin ram dang angin lirtheite a tlo thei lo" tih a sawi a, "motor chhiah pek hun chu kum 10 tala tihniam a rawt tawh thu leh, ṭum khata pek tlak nghal lohin, instalment-a pek theih tura tih Central-ah a rawt tawh thu a sawi bawk" tih chanchinbu lamah kan lo chhiar leh a.
Khatah tak khan khatih hunlaia Transport Secretary Dr Franklin Laltinkhuma'n khan mawhphurhnaa ngaiin khatih hun laia Transport Minister Pu John Rotluangliana leh Chief Minister te kha thurawn a pek hun tak a ni a. Chief Minister leh Transport Minister te kha Transport Secretary khan thudik a hrilh lo nge a hrilh vek hnuah pawh kan sorkar hotute khan thudik chu pawm duh lovin mipui hnenah dawt an sawi tih kha zawhna lian tak a ni.
Tum khata pek tlak nghal tura sawrkar laipui thuchhuah a awm tia a lo sawi tawh avangin Chief Minister khan "instalment-a pek theih tura tih Central-ah a rawt" angin a sawi a. Mahse, transport hi state subject a nih avangin Chief Minister khan central sorkar a hranpaa a rawn a ngai lova, rawtna zu siam ngai thil nilovin ama hovin emaw Transport Minister hovin an rel fel vek thei a ni. Khatia sawi kual leh kha mipui bum tumna a nih loh chuan kan Chief Minister khan dan a hrelo tihna a ni anga, chu chu a nih loh pawhin Transport Secretary khan dan tlawhchhanin thurawn kim a pe lo tihna a ni ang. A enga pawh chu ni se, rorel dan fello tak chu a ni ta reng reng a ni.
State dang en lawk ila. Haryana sorkar in 2013 TDC meeting hunlai vel khan an tih dan an sawi a, vehicle lifetime tax kha vawi khata pek nilova a "instalment" ang zawnga pek/lak turin anni chuan an lo ti hrim hrim a. Khatih hunlaia Haryana Transport Commissioner Pi Ashima Brar-i'n TDC meetinga a sawi chu chhiah tihpun a nih chuan vawi khata pek nilova a "instalment" ang zawnga motor neituten chhiah an pek khan an tan phurrit a nih loh tur thu a ni.
Kan Transport Minister hi dan hria a nih angin India constitution 7th Schedule List II a state list tia hriat state sorkar thuneihna pawh dan ang thlapin tunah a rawn hmang a, Congress sorkarin mipui phurrit a siam tikiang tura hma a la hi a fakawm hle. Amaherawhchu, "A duh tan chuan kum khat zel atana pek theiha siam pawh kan duh a, mahse, hei hi chu thawktu indaih lohna vangin kan ti thei rih lo ang," a tih hi ngaihtuah chian chuan mipui tan harsatna siam a nihlohnan Transport department thawktute'n ruahmanna an siam a pawimawh a nih hi. Thawktu indaih loh vanga kum tin chhiah lak theihloh chu a mak deuh hlek. Mizoramah kum 5 chhungin lirthei a tha reng si lova, kum 5 chhiah pek ngawt chu a fuh chiah lo a ni.
Engpawhnise, kan sorkarin DAWT tellova ro a rel hi a lawmawm a. DAWT hmanga mipui sum rawktute kha engtinnge kan lo dawh theih tih hi zawhna lian tak a ni ta a ni! @Matana Pachuau
Post a Comment