CULTURAL DAY - Mizo Cultural Organisation (MCO) - TIMES OF MIZORAM

20 Feb 2019

CULTURAL DAY - Mizo Cultural Organisation (MCO)

Mizo Cultural Organisation (MCO)
Representational Image
Mizo Cultural Organisation (MCO) buatsaihin vawiin nileng khan Aizawl Zarkawt Recreation Centre ah Cultural Day hman a ni a, Art & Culture Minister Pu R.Lalzirlianan he hun hi a hmanpui a ni.

Minister chuan Cultural Day hmang tura kalkhawmte hmaah thu sawiin Mizo hnam ziarang hrang hrang pi leh pu ten an lo hnutchhiah te ngaihhlut leh ngaihsan thar leh a ngai a ti a, Pathianin Mizo te a dahna Mizo hnam hi engtikahmah a thlak theih dawnlo a, Mizo nihna kengtu anih miau avangin ngaihhlut chu tihmakmawh ani a ti a, Tlawmngaihna chu taimakna leh tumruhna nen kal kawp tir a ngai a ni a ti bawk.

Mizo Cultural Organisation hi kum 1993 February ni 13 ah Aizawl khawpui chhunga Cultural Club pasarih kalkhawmin an din a, Art & Culture Department chu Nodal Department ah neiin tun dinhmunah hian Aizawl khawpui chhungah branch 68 an nei a, Sub-Headquarters pali - Kolasib, Champhai, Serchhip leh Mamit an nei a, hei bakah hian Group Headquarters pahnih Khawhai ah leh Chhawrtuiah an nei bawk. Sub-Headquarters leh Group Heqdquarters zawm remchang lo thingtlang khaw engemawzatin direct in General Headquarters an zawm bawk a ni.

Mizo Cultural Organisation hian a tum ber chu Mizo hnam ziarang humhalh te, Mizo hnam zai leh lam te humhalh a tihhmasawn te, thangthar lo awm zel te hnena zirtir chhawn te hnam inpumkhatna vawn nun te a ni a. Mizo hnam ziarang chi hrang hrang te lam leh zai hmangin an phochhuak thin a, Tourism Department nen pawh thawkhovin India ram hmun hrang hrangah Cultural Troupe an tirchhuak thin a ni.

Vawiin Cultural Day ah hian MCO club hrang hrang te leh Cultural Troupe ten hnam lam chi hrang hrang entirin, zaithiam ten mizo hla chi hrang hrang an sa a ni. ~ AIR Aizawl

No comments:

Post a Comment