IAS nih an châk tawh lo a ni zawk ! - TIMES OF MIZORAM

Home Top Ad

Post Top Ad

IAS nih an châk tawh lo a ni zawk !

IAS nih an châk tawh lo a ni zawk !

Mizo IASTun dinhmunah IAS Mizo 10 chiah kan nei twh a. Kum 10 dawn lai IAS kan nei tawh lo bawk.

Mi tam tak chuan lehkha kan thiam tawk loh vang leh kan tumruh loh vang an tih hi dawt mai a ni.

Rambuai hma leh buai hlim khan IAS (Central Service dang nen) kan nei zut a. A chhan pawh a hun laia miin an ngaihsan hna leh dinhmun nuama an ngaih a ni.

Tin, Zoram boruak nuam lo tlansanna hmanrua pakhat a ni bawk. Kan IAS hmingţha an han pension sap sap a, Biography an ziak ta chiah a.

Central lama an rank aia hniam MCS khan office thuam a chhawm ţhat zawkzia an hre ta a. Jt Secy ni chunga Public Bus hmanga pisa kai ngaihzia pawh an chhiar chho zel a.

An awmna State fuh lo laklawhte phei chu State CM Blacklist an ni tih chhiar phei chuan IAS nih kha a ropui viau tlat lo. An lo eirûk loh rah lawmman lah an dam laiin seng tik ni an nei hlei thei hek lo.

Huhoa khawsa dual dual hnam zinga mi kha IAS hna avangin mal tak leh khawhar ru takin an nun an hmang ta fo a. Thil lawmawm lam aiin buai vanga pùr an hlawh zawkzia leh lawmman an dawn zawng chu, 'Zopa' nge nge tihte chu thil awhawm takah an ngai thei meuh tawh lo.

Nupui pasal neih hmaa IAS & IFS nih phei chu mahni hnampui nupui pasal hmuh mai mai theih lohna a nihzia leh nupa paa IAS nih ngawtte hi kum tam tak chhûng nupaa chen dun theih lohna mai a nihzia thlengin kan hre ta a nih hi.

Chhûngkuaa IAS nih lah fate nun tihbuaina pakhat, Mizo an mang lohna dawn dawn a nih theih chang a tamzia lah an hai lo telh telh a!

Indian Politics hnuaiah ngat phei chuan dik taka thawh hian lûkhawng em em a neih lohzia chenin mi tin hriat a ni tawh a nih hi.

MCS Jr ve mai ai pawhin in leh lo ram din thuah an nep zawkzia an hre vek tawh a. Chutih laiin IAS meuh ni a, mahni lawina State-a kohhran khai dingtu leh Upa an nih laiin Zoram lama Jr Officer mai maiin Sunde Sikula an zirtirziate hi ţhangtharte hian an hai mawlh lo a nih hi!

Nulat tlangval laia IAS nih phei chu an hlau hliah hliah tawh a nih zawk hi. Anmahni rim ngam leh chhaitu tur an kawppui awm mi Mizo an awm ta lo emaw tiin a rûkin an ţap ta zawk a nih kha!

He Zoram, kristian rama chhal mekah hian IAS nun ngil leh dik, Pathian ţiha nun dan mawi chelhtu, mangan laia chhantu bân chak leh rintlakte chu kohhran huangah, nulat tlangval kawngah leh in leh lo dik taka din kawngah ngaihsan hlawh lo leh entawn ngai loh an nih tak avangin ţhalaite hian IAS nih hi an thluakin a phak loh vang ni lovin an peih ta lo a ni mai zawk e. ~ Lalremliana Pachuau

No comments:

Post a Comment

Post Bottom Ad