JET WITHDRAWS FLIGHTS FROM LENGPUI: Hmun dang leh Mizoram thlawhna tumhmun neih chhun Lengpui tumhmuna lo kal thin Jet Airways-in vawiin atanga an tihtawp tak avangin Air India chauh Mizorama thlawk a awm ta.
Jet Airways hian India hmarchhaka an thlawhna zawng zawng chu, Guwahati tih loh an titawp vek a, Mizoramah pawh nimin khan Jet Airways thlawk thin hnuhnung ber chu lo tumin a thlawk chhuak leh a. Hetiang a nih tak avang hian kar khata ni 4 Delhi-a direct a thlawk thin leh Lengpui leh Guwahati inkara nitin thlawk thin chu a awm ta lova. Lengpui leh Imphal inkara thlawk thin tihtawp a lo nih tawh bawk avangin Air India-in Lengpui leh Kolkata inkara a thlawh tir chiah thlawhna hmanga Mizoram leh khawvel hmun dang inpawhna awm chhun a ni dawn ta a. Hemi avang hian damlo leh mitthi ruang phurh chungchangah harsatna a thleng ngei dawn ni a rin a ni.
Hetih lai hian, Civil Aviation a Principal Consultant Wing Commander Joe Lalhmingliana chuan company sumdawnna a nih avangin sorkarin tih theih a nei tam lo hle niin a sawi a. Tunah hian Indigo leh airlines dang dang nena an indawr mek thu a sawi a. An tum ang a hlawhtling thei a nih chuan hei aia thlawhna hmanga intlawhpawhna tam zawk la neih theih a beisei thu a sawi a. Lengpui a\anga ramdang khawpui pakhat emaw a aia tam emaw Mizote tlawh tam leh hlawkpui tura thlawk tur pawh dap mek a nih thu a sawi a. Lengpui tumhmun tih changtlun pawh sorkar thar hna hmasa tur a nih thu a sawi bawk a ni.
~AIR Aizawl
Post a Comment